НÆ ГОРÆТ ХЪУАМÆ АИВ УА
Дзæуджыхъæуы бынæттон администрацийы разамынд стыр æргом здахын райдыдта горæты аивдзинадмæ. Йæ сæргълæууæг Æлбегаты Барис, администрацийы бæрнон кусджытæн цы хæслæвæрдтæ радта, уыдонæн сæ сæйрагдæртæ сты горæты уынгтæй æнæзакъон рекламæ айсын, хæдæвзæргæ брондæттæ скуынæг кæнын æмæ экологийы домæнтæ æххæст кæнын.
Куыд зонæм, афтæмæй горæты уынгты тынг арæх ис æнæзакъонон рекламæ. Кæй кæм фæнды, уым сæ аныхасы. Уый æвидауц кæны горæты уынгты. Æмбаринаг у, официалон уагæй рекламæ бакæнын аслам нæу. Уый нымайгæйæ, дыууæ, æртæ азы размæ транспортæн чи фæзынд, уыцы аив æрлæууæнты, чысыл агъуыстыты къултыл бакодтой сæрмагонд бынæттæ рекламæ, хъусынгæнинæгтæ ныхасынæн. Фæлæ уæддæр æгъдаухалджытæм уый фаг нæ кæсы æмæ горæты фæлгонц сафынц, зиан хæссынц муниципалон исадæн.
Администрацийы арæзтады æмæ архитектурæйы хайады сæргълæууæджы хæдивæг Хабæты Константин куыд фехъусын кодта, афтæмæй æнæбарлæвæрдæй горæты уынгты цы рекламон хъусынгæнинæгтæ ис, уыдоны тыххæй нырæй фæстæмæ кæндзысты ивар. Хъусынгæнинæгтæн æвæрыны бар уыдзæн æрмæстдæр, кæд æмæ сын горæты администрацийы рекламон хайад бар радта, уæд.
Афтæ ма администраци карз тох расидт, йæ горæты сыгъдæгдзинадыл чи нæ тыхсы, фæлæ ма йæ чъизи дæр чи кæны, уыдоны ныхмæ дæр. Æдзæсгæмттæ нæ тыхсынц, брон, чъизийæ экологийы уавæр заууатмæ кæй цæуы, низтæ кæй хæлиу кæнынц, ууыл. Администраци æмгуыст кæныны нысанæн æрбаиу кодта Æппæтуæрæсейон æхсæнадон змæлд “Адæмон фронт”-ы уæнгты. Уыдонæн куы фехъусын кæнынц, уæд æвæстиатæй ацæуынц æмæ сæ сбæрæг кæнынц. Ахæм рейдтæ уыдзысты æдзухон. Цæрджытæн та сæ бон у, горæты уынгтæ чи чъизи кæна, йæ брон æнæраны чи кала, уыдоны тыххæй администрацийы экологийы хайадмæ фæдзурын, кæнæ сын сæ къам сисын æмæ йæ бавдисын.
Ахæм æгъдаухалджытæй чи рабæрæг уа, уыдон нырæй фæстæмæ фиддзысты ивар. Хицæн адæймæгтæн йæ бæрц у 1-2 мины, куыстуæтты разамонджытæн – 100 мин сомы.
Дзæуджыхъæуы администраци æмæ “Росприроднадзор”-ы кусджытæн ма сæ алы æмбырдты сæ катайы сæр вæййы республикæйы стырдæр цæугæдон Терчы хъысмæт. Мониторинджы бæрæггæнæнтæм гæсгæ, уый экологийы домæнтæн дзуапп рагæй нал дæтты. Специалисттæ сбæрæг кодтой, цæугæдонмæ алы сæудæджерадон брон кæй кæлы. Теркмæ чъизитæ кæцæй кæлы, уыцы рæтты æвæстиатæй сæрмагонд фæрсудзæнтæ æвæрд куынæ æрцæуа, уæд уавæр кæндзæн æвзæрдæр, уымæн та хъæуы бирæ фæрæзтæ.
Терк цæуы Уæрæсейы æхсæз субъекты территорийыл, ахсджиаг у йæ сыгъдæгдзинад. Уымæ гæсгæ Паддзахадон Думæйы депутат Таймæзты Артур бахатыд Уæрæсейы æрдзон гуырæнтæ æмæ экологийы министр Дмитрий Кобылкинмæ, цæмæй йæ бахæссой федералон национ проект “Экология”-мæ. Афтæ куы уа, уæд амынд проект сæххæст кæндзæн Терчы цæугæдоныл экологийы æппæт домæнтæ дæр, æмæ та республикæйы фидауц цæугæдон раздæрау уайдзæн сыгъдæгæй.
Нæ уацх.
Comments are closed, but trackbacks and pingbacks are open.