Ивгъуыдмæ фæцæуы 2023 аз. Тагъд мах афæлдахдзыстæм къæлиндары фæстаг сыф æмæ аивгъуыйгæ 12 мæйы бацæудзысты историмæ.
Уыцы азы мах бирæ цыдæртæ бавзæрстам: уыдысты зындзинæдтæ æмæ цины бонтæ, хъыгтæ, фæлæ, æнæмæнг, уæлахизтæ дæр! 2023 аз махæй домдта бирæ хъарутæ, фæндвидардзинад, æнгомдзинад.
Кæй зæгъын æй хъæуы, нæ разы чи лæууыд æмæ лæууы абон дæр, уыцы ахсджиаг хæстæй иу у сæрмагонд æфсæддон операцийы раззаг рæнхъыты нæ хæстонты фарсмæ балæууын æмæ ног уæрæсейаг регионты цæрджытæн æххуыс кæнын.
Æрвылбон æнæкомпромисон тох цæуы, хæсты раззаг хаххæй сæдæгай километртæ æдтæдæр дæр – алы уæрæсейаг регионы, нæ республикæйы. Цы фæсидтытыл сæмбæлдыстæм, уыдон махæй домынц нæ хæстæ æххæст кæнгæйæ, хъæддыхдзинад, æмзæрдæдзинад, фæндвидардзинад.
Аивгъуыйгæ аз нын фенын кодта: махæн нæ бон кæй у арæзтад рæзын кæнын, продукци уадзын, æппæт санкцитæм нæ кæсгæйæ.
Ацы аз мах райдыдтам, бирæ кæмæ æнхъæлмæ кастыстæм, уыцы курорт «Мамысон»-ы арæзтадон куыстытæ. Ауагътам «Алана-парк»-ы техникæ сфæлварыны фæдыл куыстытæ. Æрбайгом кодтам картофы тауинæгты кондады фæдыл Уæрæсейы иууыл стырдæр селекцион – тауинагкуыстгæнæн центр. Кусын райдыдта фосдарды холлæгтæ куыстгæнæг куыстуат. Уæрæхдæр кæнæм фæткъуыйы дыргъдæтты фæзуат, фылдæрæй фылдæр кæнæм кæсагдарды гуырахст. Аразæм цæрæнуат æмæ фæндæгтæ. Ахъаз кæнæм сæудæджерадон куыстуæтты рæзтæн.
Мах кæронмæ бахæццæ кодтам не скъолаты цалцæг кæныны дыууæазон этап – цалцæг кæныны ахæм масштаб нырма никуы уыд. Æмæ уыцы куыст мах дарддæр, æнæмæнг, æххæст кæндзыстæм.
Фæткмæ æркæнын райдыдтам республиккæйы донифтонгады хъуыддаг. Национ проекттæ æмæ паддзахадон программæтæм гæсгæ аразæм фельдшерон-акушерон пункттæ, спорткомплекстæ, культурæйы хæдзæрттæ.
О, алцы æнцонæй къухты не ‘фты, фæлæ иумæ куы уæм, уæд алцы дæр къухты бафтдзæн.
Хæлæрттæ! Ног, 2024 азы хæдагъоммæ сымахæн мæ цæст уарзы æнæниздзинад æмæ фæрныгад. Уадз, Ног аз уæ алкæмæндæр æрхæссæт иууыл æхсызгондæр хабæрттæ æмæ стыр уæлахизтæ! Уадз æмæ уый суæт уæ иууыл хуыздæр бæллицтæн сæ райдиан.
Ирыстоны адæм! Ног азы хорзæх уæ уæт! Рæсугъдæй уыл æмбæлæт! Бæркад æмæ циндзинад уæнт уæ хæдзæртты! Сабырдзинад – нæ бæстæйы!
Амондджын, æнæниз æмæ фæрнæйдзаг ут!
СЕРГЕЙ Меняйло, Республикæ Цæгат Ирыстоны Сæргълæууæг
