БАЙГОМ КОДТОЙ ТАРНИЗÆЙ ХОСГÆНÆН НОГ ДИСПАНСЕР
Республикæйы байгом тарнизæй хосгæнæн ног диспансер. Афæдз æмæ æрдæг рацыд, аразын æй куы райдыдтой, уæдæй. Æмæ кæдæй-уæдæй уыцы куыст кæронмæ æрхæццæ. Кадджын бæрæгбонмæ ма суанг Уæрæсейы Хицауады Сæрдары хæдивæг Виталий Мутко æмæ Уæрæсейы æнæниздзинад хъахъхъæ-ныны министр Вероника Скворцова дæр ссыдысты.
Республикæйы хицауад ног диспансеры кой фыццаг хатт куы скодта, уæд адæмæй бирæты уырнгæ дæр нæ бакодта æмæ йæ сараздзысты. Фæлæ ныхæстæ хъуыддагмæ рахызтысты. Медицинон уагдонæн аккаг аргъ скодтой Виталий Мутко æмæ Вероника Скворцова дæр. Æнæниздзинад хъахъхъæныны министр куыд загъта, афтæмæй Цæгат Ирыстоны фæлтæрд-дзинадæй спайдагæнæн ис æгас бæстæйы дæр.
Уазджытæ сæхи цæстæй федтой ног диспансеры авналæнтæ. Хирургион хайад, исæн, карджын адæмы æмæ сывæллæтты поликлиникæтæ, стæй бирæ æндæр хайæдтæ ифтонг сты нырыккондæр ифтонггæрзтæй. Рынчынты искуыдæм цæуын нал хъæуы ныр сæхи дзæбæх кæнынмæ.
Раздæр ацы диспансер йæхи цæстæй чи федта, уый йæ ныр зонгæ дæр нал бакæнид. Æрдæгпырх къултæ, кæддæры зæронд кусæнгæрзтæ, коммуналон æвадатдзинад – æппæт уыдæттæн сæ кой дæр нал ис. Ног диспансеры арæзтад федералон хицаудзинады раз йæ рæстæджы æрæвæрдта Битарты Вячеслав. Æмæ сæ абон бузныг у, йæ ныхасмæ йын хъусæг кæй разындысты.
Ног корпустæм уал раивтой 248 рынчыны. Зæронды бæстыхайы бынаты та хъуамæ саразой сывæллæтты рынчындон.
Виталий Мутко, Вероника Скворцова, Битарты Вячеслав æмæ Цæгат Кавказы хъуыддæгты фæдыл министр Сергей Чеботарев бабæрæг кодтой æндæр медицинон уагдæтты уавæр дæр. Сæ фæндаг ракодтой онкологон диспансерыл. Йæ уавæр хæрзтæй нæу уымæн дæр. Вероника Скворцова ныфс бавæрдта, национ проекты фæлгæтты Дзæуджыхъæуы ног онкологон диспансер кæй фæзындзæн, уымæй. Æххуыс хъæуы Беслæны медицинон центрæн дæр. Вероника Скворцова сæм куы æрцыд уазæгуаты, уæд байхъуыста дохтыртæм. Рабæрæг, арæх сæ техникæйæ кæй фехæлы. Министр зæрдæ бавæрдта уыдонæн дæр баххуыс кæнынæй.
Нæ уацх.
Comments are closed, but trackbacks and pingbacks are open.