СÆЙРАГ  – ÆНÆНИЗДЗИНАД

Фæстаг рæстæг бирæ трагикон цаутæ ‘рцыди коронавирусы аххосæй. Улæфæн аппаратты куыст кæй фехæлд, уый аххосæй æртæ бонмæ амард 18 адæймаджы. Ныр уыцы къуыхцы кæд иуварс æрцыд, уæддæр уавæр нæ хуыздæр кæны. Фæстаг суткæйы дæр та амард фараст адæймаджы. Уый стыр трагеди у нæ чысыл республикæйæн. Ныртæккæ вирусæй рынчынтæ ис 291, уыдонæй 76-реанимацийы.

Уавæр хынцгæйæ, Хуссар федералон зылды æфсæддон дохтыртæ  сæхимæ райстой баххуыс кæныны хæс. Хуыздæр специалисттæ ацы бонты æрбацæудзысты Дзæуджыхъæумæ. Уый тыххæй  рынчынтæн рæстæгмæ госпиталы байгом кодтой  эндокринологон бæстыхайы 100 бынатимæ. Дохтыртæн улæфæн бынат скодтой йæ фарсмæ буары низтæ дзæбæхгæнæн диспансеры. Кусдзысты ма дзы æфсæддон медицинон академийы студенттæ дæр. Ис сæм нырыккон медицинон техникæ: рæуджыты улæфæн аппараттæ, рентген, МРТ, лаборатори…

Æнæниздзинад хъахъхъæныны министрады хатдзæгтæм гæсгæ, æфсæддон фæлтæрд дохтыртæ стыр ахъаз фæуыдзысты низы ныхмæ тохы.

 

* *  *

Цæгат Ирыстоны Сæргълæууæджы хæстæ рæстæгмæ æххæстгæнæг Сергей Меняйлойы хъæппæрисæй респуб-ликæйы кусын райдайдзæн цæугæ поликлиникæ. Медицинон комплекстæ уыдзысты цыппар-æртыгай машинæтæ-ка-бинеттæй арæзт. Ацы проект царды уадзы компани «ПМК-МЕДЭК». Ныридæгæн уал дзы иу комплекс схæццæ Дзæуджыхъæумæ.

Машинæ-кабинеттæ уыдзысты ифтонг алыхуызон медицинон техникæйæ. Кусдзысты сæ терапевт, гинеколог, уролог, нервты æмæ цæстыты дохтыртæ, УЗИ…

Цæугæ поликлиникæтæ ивдзысты сæ бынæттæ. Цæрджытæй сæйраг поликлиникæтæм цæуын зын кæмæн у, уый бацæудзæн, хæстæгдæр æм чи уа адонæй, уымæ. Лæггæдтæ уыдзысты лæвар, медицинон фæдзæхстады полисмæ гæсгæ. Рацæуæн дзы уыдзæн диспансеризаци.

Иу комплекс дзы сæрмагондæй лæвæрд æрцæудзæн сабитæн. Уый зилдзæн скъолатыл æмæ бæрæг кæндзæн сывæллæтты æнæниздзинад сæ ныййарджыты æххуысæй.

Фæлæ уæддæр цæугæ поликлиникæтæн сæ сæйраг нысан уыдзæн республикæйы дæрддзæф районтæ æмæ хъæутыл зилын. Уымыты чи цæры, уыдоны арæх сæ фадат, се ‘нæниздзинад нæ амоны æмæ дард ранмæ цæуой. Стæй сæм нæ фаг кæны медицинæйы алы къабазы специалисттæ. Ныр лæвар медицинон æххуыс исдзысты бынаты.

 

*  *  *

Ивгъуыд аз республикæйы медицинæйы къабазы стыр хорз хъуыддаг арæзт æрцыд: кусын нæм райдыдта медицинон æххуысы вертолет. Афæдзæй фылдæр кусы æмæ уыцы рæстæг фервæзын кодта бирæ тыхст, мæлæтдзаг рынчынтæ. Фылдæр тæхы дард, хæххон, машинæтæн бацæуæнтæ кæдæм нæй, ахæм бынæттæм, стæй фæндаггон фыдбылызтæ кæм æрцæуы æмæ рынчындон дард кæдæм вæййы, уырдæм. Рогдæр рынчынтæн баххуыс кæны бынаты, иннæты раласы рынчындæттæм.

Ныр цыдæр аххосæгтæм гæсгæ республикæйы æнæниздзинад хъахъхъæныны министрад уынаффæ рахаста медицинон вертолеты куыст бауромыны тыххæй. Уый тыххæй куырдиат ныффыстой федералон министрадмæ. Амынд ведомствойы министры хæдивæг Томайты Тамарæ куыд фехъусын кодта, афтæмæй ныртæккæ вертолеты куыст афтæ ахсджиаг нал у. «Иуæй, Мæздæгмæ байгом цыбыр фæндаг æмæ рынчыны рæстæгыл æрбахæццæ кæнын афтæ зын нæу. Иннæмæй, адæмæн сæ фылдæрмæ ис машинæтæ, стæй хъæуты зилдзысты цæугæ поликлиникæтæ. Фæлæ, сæйрагдæр, вертолеттæн нæй районты æрбадæн бынæттæ. Уый гæнæн ис æмæ фыдбылызмæ æркæна», – банысан кодта уый.

Ацы хъуыддаг адæммæ равзæрын кодта æнæразыдзинад. Министрадмæ бацыд бирæ хъæстытæ. Æмæ, æцæгдæр, диссаг куыд нæ у. Мæскуы дын ахæм уавæр саразæд, мацы уæз дыл цæуæд, афтæмæй сæм куырдиæттæ фысс, цæмæй ахæм ахсджиаг мадзал сæхгæной. Цымæ æнцондæр нæ уаид районты æрбадæн фæзтæ саразын? Стæй цы хъуамæ фæуой, дард æвадат хъæуты ма цы иугай адæймæгтæ цæры, фæндæгтæ кæдæм нæй, уыцы тыхст рынчынтæ? Цы хъуамæ кæной, аварийы чи бахауд æмæ рынчындон дард кæдæм у, уыцы бæлццæттæ? Кæй та бахъыгдардта ацы вертолет?

Фарстытæ – бирæ,  дзуапп – нæй.

                                                                             Нæ  уацх.