Инциденттæ ма æруадзын æмæ сæм хъусдард здахыны фæдыл механизмты фæлгæтты куыст æдзухон бындурыл уагъд цæуы 2009 азæй фæстæмæ. Традицимæ гæсгæ дзы хайад исынц Хуссар Ирыстон, Уæрæсе, Гуырдзыстон æмæ ЕÆÆО æмæ Евроцæдисы минæвæрттæ. Механизмты фæлгæтты боны фæткы сæйраг фарст у арæнгæрон территоритыл æдасдзинад æмæ Хуссар Ирыстон æмæ Гуырдзыстоны ‘хсæн паддзахадон арæнтæ халыны цаутыл æруынаффæ кæнын.
Механизмты куысты Хуссар Ирыстонæй делегацийы сæргълæууæг, Постконфликтон фарстатæ бæстонкæнынады фæдыл РХИ-йы Президенты Æххæстбарджын минæвары хæдивæг Коцты Егор информацион фæрæзты минæвæрттæн куыд радзырдта, уымæ гæсгæ, куыд хуссарирыстойнаг, афтæ гуырдзиаг фарсæн дæр ис фарстытыл æруынаффæ кæныны фæдыл алыгъуызон хъуыдытæ. Кæрæдзимбарынад сын ис æрмæстдæр æрдзон зынгсирвæзтыты ныхмæ тох æмæ ирригацийы фарстыты фæдыл.
Паддзахадон арæнтæ халыны цаутыл дзургæйæ, Коцты Егор банысан кодта, зæгъгæ, механизмты фæлгæтты фæстаг фембæлдæй фæстæмæ гуырдзиаг фарсы информацимæ гæсгæ паддзахадон арæн чи фæхæлдта, уыдоны нымæц уыд фондз адæймаджы, хуссарирыстойнаг фарсы бæрæггæнæнтæм гæсгæ та хынцыд æрцыд арæн халыны цыппар цауы.
Хуссарирыстойнаг делегацийы сæргълæууæг куыд фехъусын кодта, уымæ гæсгæ Хуссар Ирыстон дарддæр дæр хæрзарæзт кæндзæн йæ паддзахадон арæнтæ йæхи территорийыл.
«Алы фембæлды дæр мах рæгъмæ хæссæм, паддзахадон арæнтæ кæуылты хъуамæ уагъд цæуой, уыцы фарст. Уымæ гæсгæ Хуссар Ирыстон дарддæр кæндзæн уыцы куыст. Делимитаци æмæ демаркацийы фарстытыл дзырд куы цæуа, уæд ацы ахсджиаг фарст та скъуыддзаг цæуы æндæр бынæтты æндæр минæвæртты руаджы», – загъта Коцты Егор.
Механизмты фæлгæтты радон фембæлд уагъд æрцæудзæн августы мæйы кæрон.
Нæ уацх.
Comments are closed, but trackbacks and pingbacks are open.