Æнусон юбилейыл сӕрыстырӕй цы куыстхъом коллектив сӕмбӕлд, уыдон сты сфӕлдыстадон ӕмӕ техникон кусджытӕ. Нӕ уацты руаджы газеткӕсджыты зонгӕ кӕнӕм хицæн кусджыты куыстимæ. Алы куыст дӕр йӕхирдыгонау вазыгджын у, хъӕуы йӕм бӕрнон ахаст дарын. Афтӕ у редакцийы куысты дӕр, уымӕн ӕмӕ нӕ куысты фӕстиуджытӕн ӕвдисӕн сты бӕстӕйы разамынад ӕмӕ газетӕн табугӕнджытӕ. Мах бузныг стӕм, йӕ зӕрдӕ ныл чи нӕ ивы, фыссӕн кампанийы рӕстӕджы ирон мыхуыры фӕрӕзӕн стыр аргъ чи скӕны ӕмӕ нын нӕ газетыл иузӕрдион чи у, уыдонӕй се ‘ппӕтӕй дӕр.
Газеты редакцийы техникон кусджытӕй сӕ иу у Чертхъоты Жаннӕ. Уымӕн йӕ лӕггӕдтӕ бирӕ сты газеты редакцийы кусгӕйӕ. Йӕ фӕллойадон архайд райдыдта типографӕй. Уым дӕр куыста, цӕмӕй газеты радон номыр рухс фена, уый тыххӕй. Газеты фӕрстӕ цӕмӕй арӕзт цыдаиккой, уыцы дамгъӕтӕ раздӕр ӕвзӕрст цыдысты сӕрмагонд станоктæ-линотиптыл. Уым цинк бӕрзонд температурӕйы руаджы дон цыд ӕмӕ адæймаджы æнæниздзинадыл хорзæрдæм не ‘ндæвта. Фӕстӕдӕр, технологитӕ куыд размӕ цыдысты, афтӕ уацтӕ мыхуыргӕнӕн машинкӕты раивтой компьютертӕй.
Типограф ӕмӕ редакци хицӕн куыстуӕттӕ сты – редакцийы уӕды разамынад ӕвзонг чызджы куыстуарзондзинад бахынцыдтой ӕмӕ йӕм фӕсидтысты кусынмӕ. Мыхуыргӕнӕн машинкӕйæ райдыдта уæд. Компьютертыл куыстмӕ куы рахызт редакци, уӕд алчи нӕ зыдта нырыккон технологитыл кусын ӕмӕ Жаннӕйы уӕхсчытӕм ӕрхауд уӕззау уаргъ – уый иунӕгӕй мыхуыр кодта газеты радон номырмӕ ӕрмӕджытӕ фыццаг фарсӕй йӕ фӕстаг фарсмӕ фӕстаг дамгъӕйы онг. Ныхӕстӕй чизоны искӕмӕ диссаг фӕкӕса, ома цас диссаг у ӕмӕ мыхуыр кодта, фӕлӕ мах хорз хъуыды кӕнӕм, нӕ фӕллойы быдыры Жаннӕ куыд фыдӕбон кодта ӕмӕ цавæр куыстуарзондзинад ӕвдыста, уый. Иунӕгӕй ацы куыст уӕззау уыд ӕмӕ йӕм фӕстӕдӕр бамбал Осиаты Индирӕ.
Жаннӕ ма нӕ редакцийы йӕхи бафӕлвӕрдта уацхӕссӕгӕй дӕр. Уымӕн ӕмӕ Хуссар Ирыстоны паддзахадон институты каст фӕцис ирон филологийы факультет. Уӕлдӕр ахуырад райсыны фӕстӕ куыста нӕ горӕты 6-ӕм сывӕллӕтты рӕвдауӕндоны, уыцы-иу рӕстӕджы – типографы дӕр.
«Фыццаг бонӕй мӕ коллектив афтӕ айстой, ӕмӕ мӕ мӕ къах хӕдзармӕ дӕр нал хаста. Улӕфтбонтӕ та-иу мыл ныддаргъ сты – мӕ хъуыдытӕ ӕппынӕдзух баст уыдысты куыстимӕ, ӕмӕ мыл цыма базыртӕ базад ӕмӕ мӕ уыдон скъӕфтой, афтӕ ӕрвылрайсом тындзыдтон «Хурзӕрин»-ы редакцимӕ.
Ӕнгом, ӕмзонд ӕмӕ фӕлтӕрдджын коллективы кусын дӕр ӕнцон у, стӕй мӕнӕн мӕ куыст тынг цымыдисон уыд, алы ӕрмӕгимӕ дӕр лӕмбынӕг зонгӕ кодтон мыхуыргӕнгӕйӕ», – дзырдта йӕ мысинӕгты Жаннӕ.
Жаннӕ у хорз бинойнаг ӕмӕ хорз хъӕбулты мад – дыууӕ чызджы ӕмӕ фырты мад. Уыимӕ иумӕ ма ӕрӕджы ссис хорз нана дӕр.
Ныртӕккӕ та Чертхъоты чызг ӕххӕст кӕны нымӕрдар ӕмӕ хъуыддагдары хӕстӕ. Йӕ куысты спецификӕмӕ гӕсгӕ ӕмбаст у редакцийы бухгалтериимӕ. Уым нымӕцтӕ нымайы ӕмӕ финансон фарсӕн дӕргъвӕтин рӕстӕджы дзуапп кӕны Хуыгаты Маринӕ.
Бирӕ сты йӕ лӕггӕдтӕ Маринӕйӕн «Хурзӕрин»-ы коллективы раз. Уыцы куыст тынг лӕмбынӕг куыст у – Хуыцау бахизӕд, ӕмӕ иу нымӕц дӕр фӕрӕдыдтӕ, раст ӕй нӕ ныффыстай – уӕд та ногӕй хъуамӕ рацаразай ӕмбӕлон гӕххӕттытӕ.
Раздӕр газеты редакцитӕн Мыхуыры хӕдзаримæ иу бухгалтери уыд. Уырдӕм кусынмӕ ӕрбацыд Маринӕ 2000 азы, уый фӕстӕ редакциты бухгалтеритӕ адих кодтой ӕмӕ Маринӕ нӕ газеты разамынады фӕндонмӕ гӕсгӕ кусгӕйӕ баззад «Хурзӕрин»-ы бухгалтерӕй.
Маринӕ ӕвзонг чызгӕй йӕ амонд баиу кодта Джиоты лӕппуимӕ. Мадымайрӕм сын балӕвар кодта иунӕг фырт. Иунӕг кӕй уыд, уымӕ гӕсгӕ сӕ уд ӕмӕ цард нывонд кодтой сӕ хъӕбулӕн. Фӕлӕ цард рӕвдауын куыд зоны, зӕрдӕ дӕр афтӕ фӕриссын кӕны – бынтон ӕвзонгӕй трагикон уавӕрты бабын сӕ иунӕг бындар. Сидзӕрӕй баззадысты йе ‘ртӕ ӕнахъом сывӕллоны – Маринӕ ӕмӕ йӕ цардӕмбал Федяйӕн сӕ удлӕууӕн, сӕ ӕгӕрон маст-иу кӕй руаджы байрох кодтой цыдӕр рӕстӕгмӕ, уыцы хъӕбулы хъӕбултӕ.
Фӕдзурынц, зӕгъгӕ, нӕлгоймаг мастӕн фӕразон у, фӕлӕ афтӕ нӕ рауад ацы бинонты хабар. Сӕ иунӕг хъӕбулы маст бадомдта ныййарджыты, уӕлдайдӕр Маринӕйы цардӕмбал Федяйы, ӕмӕ уӕззау рынчыны фӕстиуӕгӕн ӕрӕджы ахицӕн а-дунейӕ. Ныр Маринӕ дарддӕр йӕ чындзимӕ хӕссынц уӕззау уаргъ – сӕ кӕстӕрты сӕ царды раст фӕндагыл бафтауын, сӕ къахыл сӕ слӕууын кӕнын, ныртӕккӕ сӕ царды мидис у уый.
Маринӕ у намысджын ӕмӕ иузӕрдион йӕ куыстыл. Райсом 9 сахатӕй фӕстӕмӕ вӕййы йӕ куысты уӕлхъус ӕмӕ ӕххӕст кӕны йӕ бӕрны уӕвӕг хӕстӕ.
Жаннӕ ӕмӕ Маринӕ сӕ хорз куысты тыххӕй хорзӕхджын сты Республикӕ Хуссар Ирыстоны Президенты Кады грамотӕтӕй.
Кадджын юбилейы стыр арфæтæ фæкæнынц. Уыцы арфæты аккаг сты, «Хурзæрин»-ы ӕнусон царды алы фадыджы чи кусы, уыдон, се ‘хсæн æнæмæнг сты Жаннӕ ӕмӕ Маринӕ дӕр. Бирӕ, тынг бирӕ адӕм хъазуатон куыст фӕкодтой ӕмӕ кӕнынц, сæ удтӕ нывонд кӕнынц ацы газетыл фæллойгæнгæйæ, хатт æвадат уавæрты, цӕмӕй газет рухс фена, ууыл у сæ фæллой. Ныртӕккӕ та сабыр æмæ хæдбар республикæйы архайынц немæ ирон дзырд, ирон æвзаг бахъахъхъæныныл. Ӕмӕ сын ӕнтысгӕ дӕр кӕны!
КЪÆБУЛТЫ Маринæ
