Президент Бибылты Анатоли прививкæ сарæзта коронавирусон инфекцийы ныхмæ. Паддзахады сæргълæууæг майрæмбоны вакцинацимæ æрбацыд республикон медицинон бирæпрофилон центрмæ. Уæрæсейаг вакцинæ Спутник-V саразыны фæстæ Бибылты Анатоли йæхи æнкъардта хорз æмæ дарддæр кодта йæ кусгæ бон графикмæ гæсгæ.
Президент банысан кодта дзыллон вакцинацийы ахсджиагдзинад, куыд COVID-19 æруромыны иунæг амал, афтæ. «Кæд адæймаг бæрндзинад æнкъары æхсæнады раз, уæд хъуамæ сараза вакцинæ. Хъыгагæн, мах ферох кодтам COVID-19-æй адæм кæй амардысты, уый. Не ‘хсæнадæн уый у стыр трагеди, стыр зиан. Уымæ гæсгæ хъуамæ ахъуыды кæнæм æрмæст нæхиуыл нæ, фæлæ нæ алыварс адæмыл дæр æмæ æнæмæнгæй хъæуы вакцинæ саразын», – загъта Бибылты Анатоли судзин саразыны фæстæ.
Процедурæйы рæстæджы уым уыд РХИ-йы Æнæниздзинад хъахъхъæныны æмæ социалон рæзты министр Наниты Сослан, кæцы Президентæн фехъусын кодта Хуссар Ирыстоны коронавирусон инфекцийы низы уавæры æмæ вакцинацийы темпты тыххæй. Министры ныхæстæм гæсгæ вакцинæ чи сарæзта, уыдоны нымæц бæрæг фæфылдæр фæстаг къуырийы.
Comments are closed, but trackbacks and pingbacks are open.