Президент Бибылты Анатоли хайад райста Æддагон развæдсгæрсты службæйы коллегийы хыгъдон рабадты. Мадзалы фæстиуджытæ арæзт æрцыд Æддагон развæдсгæрсты службæйы ивгъуыд азы архайдæн. Уыимæ иумæ бæрæг æрцыдысты ацы азы приоритетон хæслæвæрдтæ æмæ куысты здæхтытæ.
Йæ раныхасы Æддагон развæдсгæрсты службæйы сæргълæууæг Уарзиаты Алексей банысан кодта, зæгъгæ, регионы æндыгъддзинады сæйраг фактор у «Гуырдзыстоны хæстон-политикон къух-дариуæгады приоритет сæ бæстæйы НАТО æмæ Евроцæдисы структурæтимæ интеграцийы фæдыл, кæцы ахъаз у НАТО-йы инфраструктурæйы элементты Гуырдзыстоны æрæвæрынæн».
«Тбилис æмæ йæ цæдисонтæ дарддæр архайынц Хуссар Ирыстоны арæнты цур æндыгъд уавæр саразыны тыххæй. Хуссар Ирыстон æмæ Гуырдзыстоны ‘хсæн паддзахадон арæн снысан кæныны фæдыл куыстытæ цæмæй æххæст ма æрцæуой, уый тыххæй Тбилис провокацитæ аразы», – загъта Æддагон развæдсгæрсты службæйы сæргълæууæг.
Уый ма банысан кодта, регионы уавæрыл чи æндавы, уыцы фактортæ, ахæмтæ, куыд Азербайджан æмæ Сомихстоны ‘хсæн хæстон архайдтытæ, хæстон-биологион лабораториты хызæджы архайд, кæцытæй сæ иу ис Гуырдзыстоны æмæ у æппæт регионы æдзухон тасдзинады гуырæн.
Æддагон развæдсгæрсты службæйы къухдариуæгады сконды докладтæм байхъусгæйæ, Бибылты Анатоли банысан кодта, зæгъгæ, Гуырдзыстон нæ уадзы йæ реваншистон плæнттæ.
«Уый нæ нысан кæны, æмæ Гуырдзыстон йæ къух нæ фыссы тыхæй не спайда кæныны меморандумыл, нæ нымайы ирæтты геноцид, нæ нымайы Республикæ Хуссар Ирыстоны паддзахаддзинад, нæ нымайы Хуссар Ирыстонмæ æрбабырсты факт, фæлæ ма Республикæ Хуссар Ирыстоны арæнтыл провокацитæн дæр кæрон нæ кæны. Уымæн цæстуынгæ цæвиттон у хъæу Уисты уавæр, цыран Хуссар Ирыстонмæ ахасты Гуырдзыстон йæ агрессивон план æргомæй æвдисы. Ам, æнæдызæрдыгæй, Гуырдзыстоны уромы арæныл æдасдзинадмæ Хуссар Ирыстоны тыхон структурæты лæмбынæг хъусдард, Хуссар Ирыстоны территорийыл 4-æм уæрæсейаг æфсæддон базæйы æмæ Уæрæсейы Федерацийы Æдасдзинады федералон службæйы Арæнхъахъхъæнæг управленийы уæвынад», – загъта Президент.
Уый банысан кодта Хуссар Ирыстонæн йæхи мидæг уавæр дестабилизацийы бафæлвæрдтыты Гуырдзыстоны хайадист дæр.
«Мах хорз уынæм соцхызæгæй пайдагæнджыты активондзинад, кæцытæ сæхи ирон патриоттæ хонгæйæ, кæрæдзийыл ардауынц æндæр æмæ æндæр политикон цæстæнгасыл хæст æмбæстæгты. Гуырдзыстоны ныры онг дæр ис организаци, кæцы арæзт æрцыд 2008 азы размæ, кæцыйы сæргъ лæууы Санахъоты Димитр. Уым ис ирон æмбæстæгтæ, кæцытæ соцхызæджы руаджы хайад исынц уавæр æндыгъд кæныны хъуыддаджы», – банысан кодта Бибылты Анатоли.
Цы докладтæ бакастæуыд, уыдон, афтæ ма Æддагон развæдсгæрсты службæйы кусджыты саразгæ къахдзæфтæ æмæ архайд бахынцгæйæ, службæйы куыст Президент банымадта рæстæмбисыл.
«Æз райгонд дæн Æддагон развæдсгæрсты службæйы куыстæй æмæ мæ фæнды йæ къухдариуæгадæн æмæ кусджытæн се ‘ппæтæн дæр бузныг зæгъын.
Уырны мæ, сымах æппæт дæр араздзыстут дарддæр дæр цæмæй минимуммæ æркæнат, Гуырдзыстонæй цы æртхъирæнтæ цæуы, уыдон. Уыцы здæхты сымахæн стыр куыст ис. Уый уæ къухы кæй бафтдзæн, ууыл æз нæ дызæрдыг кæнын», – кæронбæттæны банысан кодта паддзахады сæргълæууæг.
Comments are closed, but trackbacks and pingbacks are open.