Путин бахæс кодта ирон æфсæддонты мыздтæм бафтауын

Уæрæсейы Федерацийы Президент Владимир Путины уынаффæмæ гæсгæ, Уæрæсейы Федерацийы Хъахъхъæнынады æмæ Фæсарæйнаг хъуыддæгты министрадтæ бадзурдзысты Республикæ Хуссар Ирыстоны Хицауадимæ, контрактмæ гæсгæ цы æфсæддонтæ службæ кæнынц, уыдоны мыздтæм азты сгуыхтдзинады тыххæй æрвылмæйон уæлæфтауæн æхцайы фæрæзтæ бафтауыны фæткы тыххæй.

УФ Президент бардзырд радта, цæмæй райст æрцæуа Уæрæсейы Федерацийы Хицауады фæндон Республикæ Хуссар Ирыстонимæ Сразыдзинадыл къухтæ æрфыссыны тыххæй, кæцыйы руаджы фæтк æвæрд æрцæудзæн контрактмæ гæсгæ службæгæнæг æфсæддонты мыздтæм азты сгуыхтдзинады тыххæй æрвылмæйон уæлæфтауæнтæ снысан кæныны тыххæй. Документы нысан æрцæудзæн, пенсийы цы æфсæддон службæгæнджытæ ацыдысты, уыдоны пенситæм дæр азты сгуыхтдзинады тыххæй æрвылмæ-йон уæлæфтауæн æхцайы фæрæзтæ снысан кæныны фæтк.

 «Уæрæсейы Федерацийы Хъахъхъæнынады министрадæн бахæс чындæуæт Уæрæсейы Федерацийы Фæсарæйнаг хъуыддæгты министрады хайадистæй хуссарирыстойнаг фарсимæ бадзурын æмæ  бадзырд сæххæст кæныны фæдыл Уæрæсейы Федерацийы номæй банысангонд сразыдзинадыл къухтæ æрфыссын, йæ проектмæ йын Уæрæсейы Федерацийы Хицауады сразыгонд ивындзинæдтæ бахæссыны бар ратгæйæ, кæцытæн нæй принципиалон ми-дис», – дзырдæуы уынаффæйы.

– Амæйразмæ куыд хъусын чындæуыд, афтæмæй  документыл къухтæ хъуамæ æрфыссой февралы мæйы, кæд сæ коронавирусы пандеми кæнæ æндæр форс-мажорон уавæртæ нæ бахъыгдарой, уæд.

Бæрæг куыд у, афтæмæй сразыдзинады проектыл сразы Уæрæсейы Федерацийы Хицауад. Дарддæр документ ратификацийы тыххæй æрвыст æрцæудзæн УФ Паддзахадон Думæмæ æмæ Республикæ Хуссар Ирыстоны Парламентмæ. Сразыдзинад йæ тыхы бацæудзæн, дыууæ фарсы дæр æмбæлон процедурæтæ сæххæст кæныны тыххæй куы фехъусын кæной, уæдæй.

***

Контрактмæ гæсгæ æфсæддон службæгæнджытæн азты сгуыхтдзинады тыххæй æрвылмæйон уæлæфтауæн æхцайы фæрæзтæ бафтауыны фæткы сæраппонд Владимир Путины уынаффæйы тыххæй барадон куысты фæдыл РХИ-йы Хъахъхъæнынады министры æххуысгæнæг Собаты Григол журналисттæн куыд радзырдта, афтæмæй Уæрæсейы Федерацимæ сæ пенситæ цы æфсæддон службæгæнджытæ ахастой æмæ ма пенсийы ацæуын чи фæнд кæны æмæ йæ Уæрæсемæ ахæссынвæнд чи кæны, уыдон æввахс перспективæйы райсдзысты уæлæфтауæн æхцайы фæрæзтæ 40 проценты онг, сæ азты сгуыхтдзинадмæ гæсгæ (выслуга лет).

«Къухтæ æрфыссынмæ цы сразыдзинад цæттæ цæуы, уый анхъæвздзæн, æрмæст пенсиисджытыл нæ, фæлæ ма ныртæккæ чи службæ кæны, уыдоныл дæр. Бæрæг куыд у, афтæмæй Уæрæсейы Гарзджын тыхтæм Хуссар Ирыстоны националон æфсады иуæй-иу дæлхæйтты бацæуыны фæткы тыххæй Уæрæсейы Федераци æмæ Республикæ Хуссар Ирыстоны ‘хсæн 2017 азы арæзт æрцыд сразыдзинад. Уыцы сразыдзинадмæ гæсгæ,  не ‘фсæддонты иу хай службæ кæнынмæ бацыдысты 4-æм уæрæсейаг æфсæддон базæмæ», – загъта Собайы фырт.

Уый бамбарын кодта, зæгъгæ,  Уæрæсейы Федерацийы æмæ Республикæ Хуссар Ирыстоны ‘хсæн цæттæ æрцыд сразыдзинад, службæйон азты куыст  банымайыны фæткы тыххæй, кæцыйы руаджы контрактмæ гæсгæ чи службæ кæны, уыцы æфсæддонтæн нысан æрцæудзысты æмбæлон æрвылмæйон уæлæфтауæн æхцайы фæрæзтæ. Афтæ ма фæнд цæуы, пенсийы чи ацыд, уыцы æфсæддонты пенситæм дæр азты сгуыхтдзинады тыххæй æрвылмæйон уæлæф-тауæнтæ снысан кæныны фæткмæ æркæсын.

Бæрæг куыд у, афтæмæй Уæрæсейы Федерацимæ сæ пенситæ чи ахаста, уыдонæн пенси нысан цыд, цы бынаты куыстой, уыцы оклад æмæ сын цы æфсæддон чинтæ уыдис, уымæ гæсгæ. Ныр та йæм бафтдзæн æртыккаг пункт – азты сгуыхтдзинады тыххæй процентон уæлæфтауæн.