Республикæ Хуссар Ирыстоны Президент Бибылты Анатоли хайад райста Хуссар Ирыстоны Уæрæсейы Федерацийы Æдасдзинады федералон службæйы Арæнгæрон управленийы хыгъдон æмбырды.

Уæрæсейаг арæнхъахъхъæнджытимæ дзургæйæ, Бибылты Анатоли банысан кодта сæ куысты эффективондзинад.

«Сымах хъахъхъæнут Хуссар Ирыстон, хъахъхъæнут æй эффективонæй, Гуырдзыстон цы провокацитæ аразы, уыдонмæ нæ кæсгæйæ. Сымах кадимæ æмæ аккагæй æххæст кæнут уыцы фарстытæ, кæцытæ æвæры сымах раз къухдариуæгад æмæ æххæст кæнут уыцы нормативон акттæ, кæцытæ райста РХИ-йы къухдариуæгад», – загъта Президент.

Регионы цы тæссагдзинад æвзæры, уыдоны ‘хсæн Бибылты Анатоли загъта Ираны алыварс цы уавæр сæвзæрд æмæ ацы бæстæйы политикæйы ахастмæ Гуырдзыстон цы бар дары, уый.

Президент ныфс бавæрдта, уæрæсейаг æмæ хуссарирыстойнаг арæнхъахъхъæнджыты фæлтæрддзинад æмæ профессионализм ныхкъуырд кæй ратдзысты сæвзæргæ тасдзинадæн.

Бибылты Анатоли загъта, зæгъгæ, службæйы арæнгæрон управленийы кусджытæм хауы Хуссар Ирыстоны мидæгаггон политикæ дæр.

«Мæн фæнды, цæмæй сымахæн æмбæрстгонд уа Хуссар Ирыстоны къухдариуæгады политикæ, сæйраджыдæр Ленингоры районы, цыран ис æддейæ карз уавæр саразыны фæлварæнтæ. Сымах ныхас кæнут, арæнгæрон зонæйы зонут алкæцы адæймаджы дæр. Æмæ ахсджиаг у ацы фарсты республикæйы къухдариуæгады позицитыл бындуриуæг кæнын», – загъта Президент.

Уый ма банысан кодта, уыцы позици кæй ис иумæйаг фæткойты æппæт цæрджытæн дæр, цыран цæрынц æмæ цы наци сты, уымæ нæ кæсгæйæ.

«Æмæ кæд махæн Знауыры районы ис проблемæ, уæд уыцы проблемæтæ хауынц æппæт районтæм. Афтæ гæнæн нæй, æмæ паддзахады иу хайы уа проблемæтæ, иннæ та ахса нейтралон позици. Æмæ кæд Хуссар Ирыстоны интерестæ хъахъхъæнæм, провокацитимæ тох кæнæм, уæд уый хъæуы аразын иумæ. Уымæ гæсгæ арæн Раздæхæн æхгæд уыдзæн уæдмæ, цалынмæ Уисты хъæуы æнæзакъонон пост  ист не ‘рцæуа», – загъта Бибылты Анатоли.

Президент бузныджы ныхæстæ загъта арæнхъахъхъæнджытæн сæ службæйы тыххæй æмæ РХИ-йы Уæрæсейы Æдасдзинады федералон службæйы арæнгæрон управленийы хуыздæр кусджыты схорзæхджын кодта «Хуссар Ирыстоны сабырад бахъахъхъæныны цытæн» майдантæй.

Comments are closed, but trackbacks and pingbacks are open.