Республикæ Хуссар Ирыстоны Паддзахадон тырыса Цæгат полюсы æрсадзыныл 10 азы сæххæсты цытæн Президент Бибылты Анатолийы æрхуынд-мæ гæсгæ Хуссар Ирыстонмæ æрцыдысты Владимир Кошелев æмæ Виктор Бунин.
Владимир Кошелев у Советон Цæдисы сгуыхт полярник, Паддзахадон Думæйы сæрдары фыццаг хæдивæджы уынаффæгæнæг. Виктор Бунин у горæт Цхинвалы цытджын æмбæстаг. Кошелев æмæ Бунин сты, Ирыстоны историйы фыццаг хатт Цæгат полюсмæ Уастырджийы бронзæйæ хуыз чи ахастой æмæ зæххы географион иууыл бæрзонддæр бынаты Республикæ Хуссар Ирыстоны Паддзахадон тырыса чи æрсагътой, уыдон.
Республикæ Хуссар Ирыстоны Президент Бибылты Анатоли фембæлд Ирыстонæн нысаниуæгджын цауы хайадисджытимæ. Банысан кодта, 2008 азы кæй хъуыд аразын ахæм къахдзæфтæ, кæцытæ фæахъаз уыдаиккой адæмы удыхъæд бæрзонддæр кæнынæн.
«Сымах сарæзтат уыцы къахдзæф. Уый, æцæгæйдæр, уыд, адæмы удварн кæмæй фæбæрзонддæр, ахæм цау», – банысан кодта Президент.
Виктор Бунинæн загъта, зæгъгæ, нæ горæты цытджын æм-бæстаг æнæхъуаджы нæ дæ. Хуссар Ирыстонæн хæрзиуæгон хъуыддаг саразынмæ тырнындзинад дæр, зæгъгæ, баст у уыимæ.
Бибылты Анатоли стыр бузныг загъта, ацы хъуыддаджы хайад чи райстой, уыдонæн се ‘ппæтæн дæр. Уымæн æмæ уыдоны руаджы Цæгат полюсы сфæйлыдта Хуссар Ирыстоны тырыса, Хуссар Ирыстоны ном дунейыл айхъуыст æмæ ацы историон цау абон мах нысан кæнæм.
Владимир Кошелевы ныхæстæм гæсгæ, Хуссар Ирыстоны тырыса Цæгат полюсы æрсадзынæй фараст мæйы фæстæ та сагъд æрцыд Хуссар полюсы.
Фидæн аз 200 азы æххæст кæны, денджызиртасæг ленк-гæнджытæ Фадей Беллинсгаузен æмæ Михаил Лазарев æхсæзæм континент куы бакодтой, ууыл. Ацы нысаниуæгджын цау нысан кæнынмæ Владимир Кошелев фæхуыдта бæстæйы къухдариуæгады, кæцы нысан цæудзæнис 7 январы Чырыстийы райгуырды боны хæдразмæ. Балцы фæлгæтты, ныхасгæнæджы фæндонмæ гæсгæ, иу бон, гæнæн ис, æмæ Антарктидæмæ дæр атæхой хæдтæхæгыл.
Виктор Бунин дзырдта, Хуссар Ирыстоны тырыса Цæгат полюсы æрсадзыны организацион мадзæлттыл: «Цæгат полюсмæ мах ацыдыстæм иу къордæй. Хуссар Ирыстоны ныры фæсарæйнаг хъуыддæгты министр Медойты Димитр нын Цхинвалæй экспедицийы размæ æрхаста æртæ уæлибыхы, æртæ фæрсчы, цырæгътæ, сæн æмæ ирон тырыса. Уыдоныл аргъуыд æрцыд аргъуаны. Цæгат полюсмæ, кæй зæгъын æй хъæуы, зын фæндаг у, 43 градусы бæрц уазал, фæлæ уæддæр сæххæст кодтам нæ хæрзиуæгон хъуыддаг. Ирон æмæ уырыссаг æвзæгтыл акуывтам, ссыгътам цырæгътæ, æртæ уæлибыхæй ацаходыдтам, сæнæй дæр арæгъ кодтам. Уазал нæ тыхсын кодта, фæлæ нæ хъуыддаг сарæзтам», – дзырдта Бунин. Йæ ныхæстæм гæсгæ, уым нæ федтой æндæр бæстæты тырысатæ.
Цæгат æмæ Хуссар полюсы басæтджытæн Бибылты Анатоли балæвар бакодта Хуссар Ирыстоны аргъуантæ æмæ сыгъдæг бынæтты хуызисттимæ æвзист æхцатæ, Владимир Кошелевы та схорзæхджын кодта Хæлардзинады орденæй.
Нæ уацх.
Comments are closed, but trackbacks and pingbacks are open.