Беройты Егор

9-æм октябры популярон уæрæсейаг артист Беройты Егорыл æххæст кæны 45 азы. Уæрæсейы Федерацийы зындгонд артистты хсæн Егор ахсы сæрмагонд бынат. Уый йæ арæхстдзинад, куыстуарзондзинад æмæ профессионализмы руаджы сарæзта æнтыстджын карьерæ. Артистмæ цы хауы, æппæт уыцы миниуджытæй у æххæст, бакастæй дæр у уындджын æмæ уый та ахсджиагыл нымайынц, куыд сценæмæкæсджытæ, афтæ режиссертæ дæр. У интеллигентон, зондджын æмæ принципиалон, цы коллективы хсæн кусы, уыдон ын стыр аргъ кæнынц.

Курдиатджын артист хъазы куыд театрты спектаклты, афтæ киноты дæр. Беройты Егор райгуырд æмæ схъомыл артистты бинонты æхсæн горæт Мæскуыйы. Йæ фыд Вадим Михеенко сæ йæ мадимæ кæй ныууагъта, уый растыл нæ банымадта Егор æмæ йæхи ныффыссын кодта йæ мады мыггагыл, кæцыйы хæссы сæрыстырæй. Йæ мады фыд Беройты Вадим адæмæн зындгонд у киноныв «Майор Вихрь»-æй. Йæ мад – Беройты Еленæ та у Моссоветы номыл театры актрисæ. Беройы фырт Театралон сценæмæ фыццаг хатт рахызт авдаздзыдæй. Скъолайы фæстæ уый каст фæцис М. Щепкины номыл уæлдæр театралон ахуыргæнæндон 1998 азы. Йæ ахуыры рæстæджы лæппуйы курдиат кæй фæбæрæг, уымæ гæсгæ йæ райстой Чеховы номыл театры труппæмæ æмæ спектакль «Борис Годунов»-ы сæххæст кодта йæ фыццаг роль. Ацы театры уый фæкуыста дæс азы бæрц. Ныртæккæ æмгуыстад кæны Алексей Казанцев æмæ Михаил Рощины театр «Центр драматургии и режиссуры»-имæ.

Уæдæ куыд уынæм, афтæмæй Егор æрдзæй рахаста артисты курдиат æмæ диссагдæр уыдаид экраныл кæнæ сценæйыл куы никуы разындаид, уæд. Ныртæккæ Егор у, хъæуæг артист кæй фæхонынц, ахæм æмæ йæ уымæн арæх фенæм æндæр æмæ æндæр кинонывты сæйраг ролты. Йе сфæлдыстадон архайд ис йæ тæмæны, стæй йæ кармæ гæсгæ дæр æвзонг у æмæ йæм разæй нырма æнхъæлмæ кæсынц егъау куыст æмæ бирæ ролтæ. Беройы фырты карьерæйы хуыздæр кинонывыл нымад цæуы «Турецкий гамбит», кæцы йын æрхаста стыр кад æмæ адæмы стыр уарзт æмæ уæд дунейыл айхъуыст йæ ном. Зындгонд режиссертæ йæ уæд райдыдтой хонын æндæр æмæ æндæр ролтæ сæххæст кæнынмæ æмæ та йæ адæм федтой ног кинонывты. Цы бирæ киноты хъазы, уыдоны хсæн сты: «Гражданин начальник», «Десантура», «Индус», «Нереальная любовь», «Территория», «Тонкий лед», «Игра в модерн», «Спасибо деду за победу», «Посвящение в любовь», «В ожидании моря» æмæ æндæртæ. Артисты фанаттæ æмæ йæ цардмæ цымыдисгæнджытæ сбæлвырд кодтой Егоры уæнгты ирон туг кæй зилы æмæ йæ фыдæлтæ Цæгат Ирыстонæй кæй сты, уый. Арæх уазæгуаты æрцæуы Дзæуджыхъæу æмæ Хуымæллæгы хъæумæ йæ хæстæджытæм.

Беройты Егор бинонтæ æркодта 2001 азы. Йæ цардæмбал у зындгонд актрисæ Ирина Алферовайы чызг Ксения Алферова æмæ хъомыл кæнынц сæ уарзон чызджы.

ЦХУЫРБАТЫ Лариса