Дæргъвæтин æмæ цымыдисаг у постæн йæ истори. Адæм ын йæ лæггæдтæй пайда кæнынц 18-æм æнусæй фæстæмæ, æмæ абон дæр у ахадгæ.
Кæд æмæ нырыккон дуг йæхи домæнтæ амоны, æмæ абон фыстæджытæ раивтой мобилон телефонты уацтæ, уæддæр посты хайадтæ алы районты дæр кусынц æмæ сын ис æнгом бастдзинад цæрджытимæ. Арфæйаг сты нæ постхæсджытæ. Сæрдæй, зымæгæй æнæзивæгæй цæуынц алы хæдзармæ дæр æмæ афоныл æмбæлын кæнынц периодикæ, фыстæджытæ, пенсиисджытæн хæссынц се ‘хцайы фæрæзтæ.
Постхæссæгæй лæггад кæны адæмæн, сæ зæрдæтæм сын хæссы фарны æнкъарæнтæ, афоныл сын байуары, цы газеттæ æмæ журналтæ рафыссынц, уыдон. Хæссы сын сæ пенситæ æмæ пособитæ дæр.
Кæй зæгъын æй хъæуы, ацы куыст иууыл æнцонтæй нæу, уый удуæлдай фыдæбон домы сæрдæй, зымæ-гæй, æнтæф уа æви къæвда уара, уый нæ хатгæйæ. Уыцы уæззау хызын, газеттæ æмæ журналтæ йедзагæй сæккой кæнын æмæ йæ уынгты æрвылбон цалдæр километры хæссын бирæты бон нæ бауыдзæн. Ам, фыццаджыдæр, адæймаг хъуамæ уа æнæниз, куыстхъом, стæй йæ исты хъуамæ разæнгард кæна, ома, адæмæн хорздзинад хæсса æмæ йын хорз мызд фидой йæ фыдæбонæн.
Цард бирæвæрсыг у, æмæ дзы алы къабазы дæр чи цы куыстыл хæст у, уыдонæй иуæй дæр æвзæр зæгъæн нæй, иууылдæр хъæугæ кæнынц нæ царды æмæ сæрмæ хæсгæ сты. Сæрмæ хæсгæ не сты, кусгæ чи нæ кæны, магусайæ, æввонгхорæй йæ царды бонтæ чи æрвиты, уыдон. Нæ республикæйы адæмыл чи хъуыды кæны, сæ цин æмæ сын сæ зын зæрдæйæ чи æнкъары, фарны хабæрттæ сын чи хæссы сæ хæдзæрттæм, уыдонæн зæрдæбын арфæтæ. Уæнгрогæй ма бирæ азты афтæ куыд лæггад кæной сæ адæмæн, уый сын Стыр Хуыцауы цæст бауарзæд!
Дриаты Лейла
Comments are closed, but trackbacks and pingbacks are open.