Президент Гаглойты Алан йæхимæ райста Бенилюксы бæстæты РХИ-йы Мидхъуыддæгты министрады минæвар Пухаты Радионы.
Паддзахады сæргълæууæг бузныг загъта дипломатæн, Европæйы цы куыст кæны, уый тыххæй.
«Европæйы бæстæты ирон культурæ размæ æмæ популяризаци кæныны фæдыл кæныс хъæугæ æмæ ахсджиаг куыст. Ахсджиаг у уæрæх аудиторийы базонгæ кæнын нæ адæмы хæдбындур культурæ æмæ историимæ», – загъта Гаглойты Алан.
Пухаты Радион Президентæн радзырдта бакæнгæ куысты тыххæй, афтæ ма БРИКС-ы бæстæты ирон культурæйы бонтæ ауадзыны фæдыл пълæнтты тыххæй.
«12 азы архайын Европæйы ирон культурæйы бонтæ сорганизаци кæныныл. Æвзæрст æрцыдтæн Европæйы уæрæсейаг æмфыдыбæстæйонты Координацион советы сæрдарæй.
Мах кусæм Европæйы ирæтты ‘хсæн ахастытæ рæзын кæныныл, цæмæй бастдзинæдтæ ма сæфой. Архайæм нæ сывæллæтты ирон традицитыл хъомыл кæныныл, монон-хæрзæгъдаудзинады æргъадты принциптæ сын амонын. Хъæздыг у нæ Ирыстон уыдæттæй», – загъта Пухаты Радион
Уый ма загъта, зæгъгæ, йæ куысты тырны Ирыстоны сфæлдыстадон интеллигенцийæн европæйаг коллегæтимæ контакттæ æрнывыл кæныныл.
«Зæгъын хъæуы уый дæр, æмæ ирон нывгæнджытæн европæйæгтæ кæй кæнынц стыр аргъ. Нæ нываивадон скъола ницæмæй æвзæрдæр у европæйагæй. Перспективæйы мах фæнды ирон культурæйы бонтæ Инди æмæ Бразилийы ауадзын, уый у вазыгджындæр, Европæимæ абаргæйæ. Фæстæдæр фæнд кæнæм БРИКС-ы æндæр бæстæты дæр ахæм бонтæ ауадзын», – загъта уый.
Гаглойты Аланы бацымыдис кодта, зын геополитикон уавæр хынцгæйæ, не ‘мзæххонтæ исты зындзинæдтæ æвзарынц æви нæ.
«Кæй зæгъын æй хъæуы, Сæрмагонд æфсæддон операци райдайыны фæстæ мах сæмбæлдыстæм цавæрдæр зындзинæдтыл мадзæлттæ организацийы хъуыддаджы æмæ цардуагон уавæрты дæр. Европæйы иууылдæр не сты Уæрæсейы ныхмæ, уым ис ахæм æмбæстæгтæ, кæцытæ æнхъæлмæ кæсынц, Владимир Путин сæ кæд фервæзын кæндзæн. Санкцитæ фыццаджы дæр бандæвтой сæхи æмбæстæгтыл, тыхджын сын слæмæгъ кодтой сæ экономикæ», – банысан кодта дипломат.
Фембæлды кæрон Пухаты Радион Президентæн балæвар кодта зынгæ ирон нывгæнджыты куыстытимæ альбом.
