Хуссар Ирыстоны паддзахадон хӕдбардзинады банымадыл 15 азы сӕххӕсты цытӕн Ӕхсӕнадӕмон форумы фӕлгӕтты агентад «Спутник Хуссар Ирыстоны» фӕзуатыл уагъд ӕрцыд «Ӕргом микрофон»-ы форматыл видеобастдзинад Цхинвал-Сухум. Мадзалы хайадисджытӕ фӕстиуджытӕ сарӕзтой, 15 азы дӕргъы Хуссар Ирыстон ӕмӕ Абхазы бӕстӕты ӕрцӕугӕ цаутӕн ӕмӕ уынаффӕ кодтой дарддӕры рӕзты перспективӕтыл.
Хуссар Ирыстонӕй мадзалы хайад истой РХИ-йы Президенты Администрацийы къухдариуӕггӕнӕджы хӕдивӕг Тыбылты Алан, Информацион-аналитикон хайады къухдариуӕггӕнӕг Уазӕгты Юри ӕмӕ Парламенты депутат Бесаты Зитӕ, «Россия сегодня» медиакъорды ӕфсӕддон афӕлгӕсӕг Александр Хроленко, политконсультант Алена Август, философ, Евразиаг экономикон цӕдисы институты директор Владимир Лепехин.
Абхазы республикӕйӕ видеобастдзинады хайадисджытӕ та уыдысты Ӕхсӕнадӕмон хъуыддӕгты фӕдыл президенты ӕххуысгӕнӕг Максим Гвинджия, Уӕрӕсейы Абхазы базарадон минӕвар Олег Барциц ӕмӕ Абхазы Журналистты цӕдисы сӕрдар Руслан Хашиг.
Хуссар Ирыстоны паддзахадон хӕдбардзинад Уӕрӕсейы Федераци куы банымадта уæдæй абоны онг цы ахсджиаг паддзахадон программӕтӕ биноныг ӕрцыд Уӕрӕсейы руаджы, уыдон йӕ раныхасы банысан кодта Уазӕгты Юри – ӕндидзыд ӕрцыдысты республикӕйы инфраструктурӕ, ахуырад, ӕнӕниздзинад хъахъхъӕнын ӕмӕ ӕндӕр фадыджы объекттӕ. Фӕлӕ уӕддӕр, зӕгъгӕ, сӕйраг хъусдард здӕхт цыд ахӕм здӕхтытӕм, кӕцытӕ дзуапп дӕттынц цӕрджыты царды уавӕртӕ фӕхуыздӕр кӕнынмӕ. Дарддӕр дӕр сӕйраг хъусдард здӕхт цӕудзӕн экономикӕйы фадыджы проекттӕ реализаци кӕнынӕн. Уыдон иууылдæр здӕхт сты реалон кондадтӕ аразынмӕ, уый фӕстиуӕгӕн ног кусӕн бынӕттӕ саразын ӕмӕ бӕстӕйы бюджет фӕфылдӕр кӕнынæн.
Хъӕуы райсын ног экономикон концепци
Владимир Лепехины ныхӕстӕм гӕсгӕ Уӕрӕсейы ӕмӕ ӕндӕр фæссоветон бӕстӕты ныртӕккӕйы уӕззау геополитикон уавӕртӕ хынцгӕйӕ хъӕуы ӕркӕсын ног экономикон модел саразыны уавӕртӕм ӕмӕ Евразиаг экономикон цӕдисы базӕйыл хисӕрмагонд модел са-разын. Хъӕуы ног экономикон концепци, кӕд ыл нырма дӕргъвӕтин куыст хъӕуы бакӕнын, уӕддӕр. Фӕлӕ уымӕн, бӕрӕг ӕмгъуыды фӕстӕ, уыдзӕн фӕстиуджытӕ.
Ныхас дарддӕргӕнгӕйӕ Бесаты Зитӕ афтӕ радзырдта, зӕгъгӕ, Хуссар Ирыстоны социалон-экономикон рӕзты программӕ реализаци цӕуы уӕззаугай.
«Мах райстам программӕ, кӕцымӕ гӕсгӕ цасдӕр рӕстӕджы фӕстӕ рахиздзыстӕм хиифтонгкӕнынмӕ. Мӕ хъуыдымӕ гӕсгӕ, ацы программӕ реализаци цӕудзӕн хъӕууон хӕдзарады фадыджы, туризм ӕмӕ ӕндӕр здӕхтыты. Уый махӕн хорз тырнындзинад у, хорз ӕххуыс экономикон фадыджы хиреализаци кӕнынӕн. Программӕ хорзӕй бандавдзӕн республикӕйы мидӕггагон фӕлхасгӕн-джытыл. Дарддӕр кондадтӕ, амалиуӕ-гад куыд рӕза, афтӕ фадат фӕуыдзӕн ӕддагон фӕлхасгӕнджыты дӕр ифтонг кӕнынӕн. Ахъазгӕнӕг ма уыдзӕн хъӕууон хӕдзарад, туризм ӕмӕ ӕндӕр фадгуыты райтынг кӕнынӕн.
Дывӕр ӕмбӕстагдзинады фарст
Хуссар Ирыстон ӕмӕ Уӕрӕсейы ӕхсӕн Дывӕр ӕмбӕстагдзинады тыххӕй сразыдзинады Парламенты депутат Бесаты Зитӕ афтӕ радзырдта, зӕгъгӕ, ратификацион грамотӕтӕ кӕрӕдзийӕн радтыны фӕстӕ ӕмӕ Уӕрӕсейы Федерацийы президенты уынаффӕйы фӕстӕ реализаци ӕрцӕудзӕн ацы ахсджиаг хъуыддаг. Ратификацион грамотӕтыл сӕ къухтӕ ӕрфыстой дыууӕ бӕстӕйы сӕргълӕуджытӕ. Ӕмӕ ныртӕккӕ дывӕр ӕмбӕстагдзинад райсыны тыххӕй Хуссар Ирыстон ӕнхъӕлмӕ кӕсы Уӕрӕсейы президенты уынаффӕмӕ. Уый фӕстӕ ацы сразыдзинад реализаци цӕудзӕн дыууӕ паддзахады территорийыл.
Видеобастдзинады хайадисӕг Абхазы фарсӕрдыгӕй Олег Барцицы ныхӕстӕм гӕсгӕ ацы сразыдзинад уӕлдай хӕрзвадат уыдзӕн Хуссар Ирыстон ӕмӕ Абхазы цӕрджытӕн.
Уӕрӕсейаг ӕмбӕстагдзинад райсынӕй, зӕгъгӕ, нӕ республикӕты ӕмбӕстӕгтӕн иуварс ӕрцӕудзысты бирӕ цӕлхдуртӕ ӕмӕ бирӕ цардуагон ӕмӕ цӕрӕнуатон ӕвадатдзинӕдтӕ.
Фӕсивӕды монон-хӕрзӕгъдауон ӕргъадтыл хъомыл кӕнын
Тыбылты Аланы ныхӕстӕм гӕсгӕ ахуырады системӕйы бындурон фактор у фӕсивӕды монон-хӕрзӕгъдауон ӕргъадтыл хъомыл кӕнын.
«Уыцы ӕргъадтыл мах цалх кӕнынц нӕ ныййарджытӕ. Уым сӕйраг у патриотизм. Фӕстаг 15 азы дӕргъы схъомыл хорз фӕлтӕр сабыр царды уавӕрты. Уыдон нӕ федтой хӕст, пырхӕнтӕ. Ӕмӕ ахсджиаг у, цӕмӕй сын ӕппынӕдзух сӕ зӕрдыл лӕууын кӕнӕм, 15 азы размӕ цы трагикон цаутӕ ӕрцыд, уыдон, цӕмӕй сӕ ма рох кӕной. Мах хъуамӕ аудгӕ ахаст дарӕм нӕ бӕстӕты историмӕ ӕмӕ, кӕй зӕгъын ӕй хъӕуы, иумӕ ӕмдзу кӕнӕм», – банысан кодта уый.
Абхазы Журналистты цӕдисы сӕрдар Руслан Хашиг куыд банысан кодта, уымӕ гӕсгӕ ацы бонты ӕфсымӕрон республикӕйы информацион фӕрӕзтӕ сӕ каналтыл ӕвдыстой Хуссар Ирыстоны трагикон цаутӕ, ӕнӕуый дӕр абхазæгтӕ дӕр иттӕг хорз зонынц 2008 азы августы ӕрцӕугӕ цаутӕ. Мах, зӕгъгӕ, цас арӕхдӕр нӕ хъус дарӕм ӕгас адӕмты, паддзахадты хъысмӕт чи сбӕлвырд кодта, ахӕм ӕрмӕджытӕм, историон нысаниуӕгджын цаутӕ куы ӕвдисӕм куыд уыд, афтӕ раст ӕмӕ цӕсгомджынӕй, уӕд уымӕй мах фидӕны фӕлтӕртӕн дӕттӕм ахъуыды кӕнынӕн стыр ӕрмӕг.
Политтехнолог Алена Августы ныхӕстӕм гӕсгӕ ныртӕккӕ дунейы цы цаутӕ цӕуы, уый хынцгӕйӕ информацион тохы сӕйраг у фӕсивӕды хъомыл кӕнын ӕмӕ семӕ фаг кусын. Уӕрӕсейы территорийыл фӕсивӕд рӕзын кӕнынӕн цы программӕтӕ ӕмӕ платформӕтӕ кусынц, уыдон сты ӕргом ӕрмӕст уӕрӕсейӕгтӕн нӕ. Уым архайыны фадат ис хуссарирыстойнаг ӕмӕ абхазаг фӕсивӕды минӕвӕрттӕн дӕр.
Истори раст фыст хъуамӕ цӕуа
Видеобастдзинады рӕстӕджы ма дзырд цыд историон факттӕ зыгъуыммӕ кӕныныл нӕ разы кӕнын ӕмӕ уый ныхмӕ куыд тох кӕнын хъӕуы, уый тыххӕй. Ацы ахсджиаг фарсты фӕдыл ӕфсӕддон афӕлгӕсӕг Александр Хроленко афтӕ банысан кодта, зӕгъгӕ, информацион тыгъдады сӕвзӕрынц сӕрӕгас адӕмты историтӕ, уый дӕр у историон фактты ныхмӕ архайгӕ тох. Уыцы тохмӕ махӕн дӕр ис ахаст. 2008 азы августы фӕлтӕрддзинад куы райсӕм, уӕд уыдон ӕвдыст цӕуынц видеоты, кӕм та фыст сты рӕнхъгай ӕмӕ афтӕмӕй баззайынц адӕмы хъуыдыкӕнынады. Йӕ хъуыдымӕ гӕсгӕ уый у историон факттӕ зыгъуыммӕ кӕныны ныхмӕ иууыл хуыздӕр тох.
Александр Хроленко ма дзырдта, Уӕрӕсе цы сӕрмагонд ӕфсӕддон операци уадзы, уый тыххӕй дӕр, зӕгъгӕ, кӕронмӕ конд куы ӕрцӕуа, уӕд уый бандавдзӕн ӕгас фæссоветон тыгъдадыл. Ӕнӕуи та операци уагъд цӕуы ӕнтыстджынӕй ӕмӕ уый ныридӕгӕн ӕмбарынц ныгуылӕн бӕстӕтӕ.
Хуссар Ирыстон ӕмӕ Абхазы республикӕты ма ноджы 15 азы фӕстӕ цахӕм хуызы уынынц мадзалы хайадисджытӕ, уый фӕдыл хуссарирыстойнӕгтӕ афтӕ дзырдтой, зӕгъгӕ, размӕдзыд ӕмӕ дидинкалгӕ ӕмӕ йӕ ӕдасдзинад ноджы тынгдӕр хъахъхъӕдӕй, размӕдзыд экономикӕимӕ ӕмӕ иумæйаг пайдайы проекттӕ реализацигӕнгӕйӕ.
Абхазы минӕвар Олег Барцицы ныхӕстӕм гӕсгӕ та йӕ цӕрджыты царды ӕмвӕзад фӕбӕрзонддӕр кӕнын, кондадты тыхтӕ ноджы фӕхъомысджындӕр кӕнын. Цы бӕстӕтӕ сӕм се ргом здахынц, уыдонимӕ ӕнгом ӕмгуыстад кӕнын. Ӕввахс рӕстӕджы ӕнхъӕлмӕ кӕсынц ахъаззаг процесстӕм, цӕдисон паддзахадтӕ Уӕрӕсе ӕмӕ Беларуссимӕ ӕмгуыстад кӕнын Абхазы республикӕ семӕ баиу кӕнгӕйӕ.
Къæбулты Марина
