Президент Гаглойты Аланы разамындæй уыдис 2023-2025 азтæн республикæ Хуссар Ирыстоны социалон-экономикон рæзтæн ахъазгæнæг инвестицион программæ реализаци кæныны фарстытыл контролы фæдыл оперативон штабы рабадт. Йæ куысты хайад райстой хицауады Сæрдар Джуссойты Константин, профилон министрадтæ æмæ ведомствоты къухдариуæггæнджытæ, арæзтадон организациты разамонджытæ.
Рабадты хайадисджытæ æркастысты Инвестпрограммæйы объекттæ æмæ 2023-2025 азты мадзæлттæн проектон-сметæйон документаци куыд цæттæ сты, уыцы фарстытæм.
Арæзтад, архитектурæ æмæ цæрæнуатон-коммуналон хæдзарады министр Елдзарты Константины ныхæстæм гæсгæ 2023 азы объекттæн документтæ цæттæ сты, ацы аз октябрмæ та хъуамæ цæттæ уой проектон-сметæйон документацитæ æртæазон Инвестпрограммæйы иннæ мадзæлттæн дæр.
2023 азы объектты куыстытæ куыд цæуынц, уый тыххæй министр Президентæн фехъусын кодта, зæгъгæ, хъæуæг техникæйæ сифтонг кæныны хъуыддаджы иууыл вазыгджындæр объект у нæ горæты Леуахийы цæугæдоны сæрты хиды арæзтад. Йæ ныхæстæм гæсгæ зындзинæдтæ æвзæры сæрмагонд техникæйæн докумæнттæ аразын æмæ йæ арæны сæрты раласын. Æмæ уый цасдæрбæрцæй фæстиат кæны куыстытæ.
Президент æрдомдта, цæмæй йын бамбарын кæной, кæд адарддæр уыдзæн хиды арæзтад, уый.
«Мах ифтонггæрзтæм æнхъæлмæ кæсæм дыууæ мæйы бæрц. Куыд ис афтæ æруадзæн æмæ уыцы аххосагмæ гæсгæ объекты арæзтад æрлæууа?», – загъта уый.
Елдзарты Константин куыд радзырдта, афтæмæй иннæ къуырийы кæронмæ скъуыддзаг æрцæудзæнис сæрмагонд техникæ æрласыны фарст, иу къуыри та бахъæудзæн йæ монтаж кæнынæн æмæ ныфс бавæрдта, зæгъгæ, куыстытæ куы райдайой, уæд баххæст кæндзысты, цы рæстæг фесæфтой, уый. Президент банысан кодта, зæгъгæ, хиды арæзтадмæ хъæуы бæрндзинады цæстæй кæсын æмæ, гæнæн уæвгæйæ, æппæт дæр саразын хъæуы, цæмæй ацы азмæ цы куыстыты гуырахст хаст æрцыдысты, уыдон æххæст æрцæуой. Хицауады сæрдары ныхæстæм гæсгæ та аразджыты кадджын æмæ ахсджиаг хъуыддаг у куыстыты гъæдджынæй æмæ æмбæлон æмгъуыдты сæххæст кæнын.
Президентæн радзырдтой, нæ горæты Ирæтты уынджы æмæ Знауыры райцентры бирæфатерон цæрæн хæдзæртты арæзтад куыд цæуы, уый тыххæй дæр. Ирæтты уынджы хæдзары тыххæй йæ генералон подрядон куыд загъта, афтæмæй куыстытæ цæуынц графикæй раздæр. Знауыры районы хæдзар та, арæзтады министры ныхæстæм гæсгæ эксплуатацимæ лæвæрд æрцæудзæнис ацы аз.
Мзиугомы сывæллæтты лагеры тыххæй дзургæйæ, арæзтады министр фехъусын кодта, зæгъгæ, ацы объекты газификацийы фарст скъуыддзаг цæуы. Лагермæ, газуадзæны арæзтад райдианы проектмæ хаст нæ уыд, фæлæ фæрæзтæ ссардæуыд Инвестпрограммæйы æндæр объекттæй сэкономи кæныны руаджы.
Министры ныхæстæм гæсгæ Мзиугомы зонæмæ газуадзæны арæзтад фадат ратдзæн газæй асфальтуадзæн заводы дæр сифтонг кæнын, кæцы ис лагермæ æввахс.
Рабадты куыд банысан кодтой, афтæмæй иумиагæй сисгæйæ, арæзтадон процесс цæуы рæстæмбисæй, подрядон организацитæ хъахъхъæнынц куысты темптæ, иуæй-иутæ та, ахæмтæ, куыд гом акционерон æхсæнад “Мегаполис-Т”, кусынц графикæй тагъддæр.
Ныхас цыдис, Инвестпрограммæйы объектты финансон фæрæзтæ куыд хардз цæуынц, ууыл дæр. Президент бахæс кодта подрядон организациты къухдариуæггæнджытæн, цæмæй сæ хъус лæмбынæг дарой хыгъддæттынадмæ æмæ дырысæй хъахъхъæной финансон фæрæзтæ хардз кæныны графиктæ.
Банысан кæнын хъæуы уый, æмæ æртæазон Инвестпрограммæйы финанскæнынады иумæйаг гуырахст кæй у 3,587 миллиард сомы. Уыдонæй ацы азæн рахицæн æрцыд 1,157 миллиард сомы.
БЕСТАУТЫ Валя
