Республикæ Хуссар Ирыстоны Хицауады сæрдар Джусойты Константин хицауады аппараты кусджыты базонгæ кодта ног къухдариуæггæнæг Джусойты Алан Алыксандры фыртимæ.
«Алан Алыксандры фырты архайд уын зонгæ у, уый рагæй кусы къухдариуæггæнæг бынæтты, йæхи равдыста куыд фæлтæрдджын, энергион кусæг. Ныфс нæ ис, Хицауады аппараты æнгом коллектив йæ ног разамонæгимæ активонæй кæй кусдзæнис æмæ кæй фенын кæндзæнис хорз фæстиуджытæ», – загъта Хицауады сæргълæууæг.
Джусойты Алан йæ рады бузныджы ныхæстæ загъта республикæйы къухдариуæгадæн ахæм æууæнкдзинады тыххæй æмæ банысан кодта, зæгъгæ, æппæт тыхтæ дæр ратдзынæн продуктивон куыст сорганизаци кæнынæн.
«Цæттæ дæн уæ фæндтæм байхъусынмæ æмæ æмсæр, æмзонд æмгуыстадмæ», – загъта уый.
Цыбыр биографион бæрæггæнæн:
Джусойты Алан Алыксандры фырт райгуырд 1974 азы Сусæны мæйы 17-æм бон горæт Цхинвалы.
1996 азы каст фæцис ХИПУ-йы истори æмæ барады факультет. 1993 азæй 1995 азмæ службæ кодта РХИ-йы Æдасдзинады паддзахадон комитеты специалон дæлхайады. 1995 азæй 1997 азмæ – Дзауы районы Мидхъуыддæгты министрады фæдагурæг. 1997 азæй 2001 азмæ РХИ-йы «Сывæллæтты фонды» кусæг. 2001 азæй 2008 азмæ æнæкоммерицон организаци «Агентство по мотивации Общества и Социальному развитию»-йы къухдариуæггæнæг.
2009 азæй 2012 азмæ – Ленингоры районы администрацийы сæргълæууæг.
2016 азæй 2018 азмæ – Президенты администрацийы мидæггагон политикæйы управленийы хистæры хæдивæг.
2018 азæй Президенты администрацийы сæргълæууæджы фыццаг хæдивæг.
Хорзæхджын æрцыд паддзахадон майдантæй: «Хуссар Ирыстоны адæмы Фыдыбæстæйон хæсты уæлахизыл 10 азы сæххæсты сæраппонд», «Республикæ Хуссар Ирыстоныл 20 азы сæххæсты сæраппонд», «Хæлардзинады орденæй».
Ис ын цардæмбал, хъомыл кæны æртæ сывæллоны.
Comments are closed, but trackbacks and pingbacks are open.