12-æм октябры нæ республикæйы Тыбылты Алыксандры номыл Хуссар Ирыстоны паддзахадон университеты актон залы цытджын æгъдауæй лæвæрд æрцыдысты Джусойты Нафийы номыл национ литературæйы премитæ æмæ Плиты Грисы номыл премитæ фысджытæ æмæ ХИПУ-йы ирон филологийы факультеты студенттæн.
Ирыстоны ацы премитæ снысан кодта æмæ сæ бындурæвæрæг у хæрзаудæн фонд «Амонд»-ы сæргълæууæг Челехсаты Хъазбег. Ацы хæрзаудæн фонд арæзт æрцыд не ‘мзæххон, РХИ-йы раздæры Хицауады Сæрдар Хуыгаты Ростикы хъæппæрисæй. Хуыгайы фырт ныртæккæ цæры Уæрæсейы горæт Самарæйы, бирæ азты дæргъы сæрдариуæг кодта националон-культурон центры ирон диаспорæ «Алани»-йæн. Хуыгаты Ростик, куыд йæ бон у, афтæ лæггад кæны ирон адæм, ирон дзырдæн æмæ йын кад кæнынц Ирыстоны. Цытджын мадзалы куыд банысан кодтой, афтæмæй ацы премитæ Хуыгаты Ростик снысан кодта ирон дзырд, ирондзинад пропагандæ кæныны тыххæй, афтæ ма Джусойты Нафи æмæ Плиты Грисы хуызæн стыр æмæ зынгæ адæймæгты нæмттæн æнустæм кад кæныны сæраппонд. Бæрæг куыд у, афтæмæй Джусойты Нафийы номыл национ преми лæвæрд цæуы ныр æртыккаг хатт, æмæ Плиты Грисы преми та – дыккаг хатт. Джусойты Нафийы номыл преми райсыны фæдыл конкурсы жюрийы тæрхонмæ сæ куыстытæ бавдыстой куыд хуссарирыстойнаг, афтæ цæгатирыстойнаг фысджытæ дæр, æмæ ныр фæбæрæг сты уæлдæр банысангонд премиты лауреаттæ.
Цытджын премитæ дæттыны мадзалмæ æрбацыдысты нæ республикæйы Хицауады Сæрдар Пухаты Эрик, Хуссар Ирыстоны Абхазы республикæйы минæвар Елбачиты Алан, нæ республикæйы районты сæргълæуджытæ, университет æмæ скъолаты ахуыргæнджытæ, студенттæ, интеллигенци æмæ æхсæнады минæвæрттæ. Мадзалы ма сæрмагондæй хайад райстой Цæгат Ирыстон-Аланийы делегацийы уæнгтæ æмæ абхазаг поэт, æхсæнадон архайæг Геннади Аламия.
Хæрзаудæн фонд «Амонд»-ы директор Челехсаты Хъазбег банысан кодта, стыр æхсызгон хъуыддаг кæй у ахæм мадзал ауадзын æмæ уымæй ирондзинадæн лæггад кæнын. Хъазбег ма æрдзырдта, Хуыгаты Ростикмæ преми снысан кæныны хъуыды куыд фæзынд, уый тыххæй. «Зынаргъ адæм, дыууæ ныхас мæ зæгъын фæнды ацы фонды тыххæй. Ныр æртыккаг аз дæттæм ацы премитæ. Хæрзаудæн фонд саразыны хъуыддаг баст у не ‘мзæххон, патриот Хуыгаты Ростикы номимæ. Ростик тынг бирæ уарзы йæ мадæлон æвзаг æмæ йæ æвдисгæ дæр кæны йæ иузæрдион архайд æмæ æххуыстæй. Махæн нæ диаспорæтæй иууыл хуыздæр чи у, уый ис Самарæйы. Ам ирон сывæллæттæн баконд æрцыдис скъола æмæ афтæмæй мадæлон æвзаг ахуыр кæнынц Уæрæсейы зæххыл. Уымæй дарддæр ма фæнысан кæнынц традицион æмæ культурон мадзæлттæ æмæ бæрæгбонтæ», – загъта Челехсаты Хъазбег. Радзырдта-ма Нафи æмæ Плиты Грисы тыххæй йæ мысинæгтæ, банысан кодта уыдон Къостайы фæстæ стыр адæймæгтыл нымад кæй цæуынц æмæ кады аккаг сты Иры дзыллæйæн.
Джусойты Нафийы номыл национ литературæйы 1-аг преми лæвæрд æрцыдис хуссарирыстойнаг поэтессæ, Чехойты Оляйæн. Ацы преми уый райста ХИПУ-йы ректор Тедеты Вадимы къухæй. Преми райсыны рæстæджы Чехойты Оля йæ раныхасы стыр бузныджы ныхæстæ загъта мадзалы æппæт организатортæн æмæ банысан кодта, сæрыстыр кæй у, ахæм стыр хорзæхы аккаг кæй ссис æмæ йын кæй кад кæнынц, уымæй. «Æз банысан кæндзынæн уый, æмæ фыссæг дардыл кæй хъуамæ уына. Мах чысылнымæц адæм стæм, фæлæ нæм, уымæ нæкæсгæйæ, ис бирæ æрыгон фысджытæ. Бирæтæн нæй уый фадат, фæрæзтæ, цæмæй се сфæлдыстад рухс фена æмæ уымæ гæсгæ сæ аив хъуыдытæ адæммæ нæ фæхæццæ вæййынц. Ахæмты фарсмæ та мах, кæддæриддæр, хъуамæ балæууæм æмæ сæ размæ кæнæм. Зæгъæм, поэтессæ Годжыцаты Неллийы чингуытæ куы бакæсай, уæд адæймагæн йæ хъуын барц слæууы. Хуыгаты Ростикæн стыр бузныг, йæ Ирыстоныл афтæ йæ зæрдæ кæй рисы æмæ йæм стыр уарзондзинады цæстæй кæй кæсы, уый тыххæй. Цæмæй ирон æвзаг размæ цæуа, иронау фылдæр фыссой нæ фысджытæ æмæ нæ фидæны фæлтæртæн фæзминаг уæм, уымæн æвдисæн у нæ абоны мадзал æмæ ноджыдæр стыр бузныг Хуыгайы фыртæн», – загъта Чехойты Оля. Уый ма фехъусын кодта, зæгъгæ, цы преми райста, уый кæй адих кæндзæнис, нæ горæты ныртæккæ цы дыууæ уæззау рынчын сывæллон ис æмæ æххуыс чи агуры, уыдоныл. «Мах хъуамæ æххуыс кæнæм нæ уыцы кæстæртæн, кæцытæ æййафынц зындзинæдтæ. Фæнды мæ, Нафийы номыл мын цы стыр лæвар радтат, уый адих кæнон уыдонимæ. Мæнæн та фаг у, Джусойты Нафийы хуызæн стыр адæймаджы премийы аккаг мæ кæй скодтат, уый», – загъта Чехойты Оля æмæ йыл мадзалмæ æрбацæуæг адæм сæмбæлдысты тыхджын къухæмдзæгъдимæ.
Дарддæр университеты ректор Нафийы номыл аив литературæйы конкурсы активон архайджытæй цалдæры схорзæхджын кодта Кады грамотæтæй æмæ уый фæстæ арфæйы æмæ бузныджы ныхæстæ загъта мадзалы организатортæн.
Стыр ахуыргонд Джусойты Нафийы номыл 2-аг премийы лауреат та ссис газет «Рæстдзинад»-ы уацхæссæг Хетæгкаты Оксанæ æмæ йæ схорзæхджын кодта Цæгат Ирыстоны Культурæйы министры хæдивæг Дудайты Чермен. Уый ма банысан кодта Нафи æмæ Грис цы стыр лæггæдтæ бакодтой ирон адæмæн æмæ сæ фæстæ æнусон цыртытæ кæй ныууагътой, уый.
Джусойты Нафийы номыл национ литературæйы 3-аг преми радтыны тыххæй сценæмæ рахызт Цæгат Ирыстоны Паддзахадон университеты ирон фило-логийы факультеты декан Хозиты Барис. Уый, фыццаджыдæр, банысан кодта ахæм мадзал ауадзыны хъуыддаг ахсджиаг кæй у æмæ йын стыр нысаниуæг кæй ис æхсæнадон царды, уый. «Махмæ, Цæгат Ирыстоны дæр стыр аргъ кæнынц Джусойты Нафи æмæ Плиты Грисæн. Дзæуджыхъæуы уынгтæй сæ иу у Грисы номыл. Ирон факультет та ныффыста куырдиат нæ республикæйы хицау Битарты лæппумæ æмæ йын йæ номыл нæ университеты сæдæ азы юбилеймæ, снысан кæндзысты паддзахадон стипенди. Абон стыр бæрæгбон у Ирыстоны. Аивадон литературæ у адæмы цæсгом æмæ цас ирддæрæй æмæ парахатæй æвдыст цæуа, уыййас адæмæн пайда æмæ кад у», – банысан кодта Хозиты Барис. Аив ирон литературæйы йе стыр æнтыстыты тыххæй 3-аг преми Хозиты лæппу радта поэт, публицист, тæлмацгæнæг Хохойты Энверæн æмæ бузныг загъта хæрзаудæн фонд «Амонд»-æн.
Ацы аз сæрмагонд преми радтой Абхазы республикæйы зындгонд æхсæнадон архайæг, поэт Геннадий Аламиайæн, кæцы сæхи æвзагмæ ратæлмац кодта Хетæгкаты Къостайы «Ирон фæндыр»-ы. Уый тыххæй йын сæрмагондæй нæ республикæйы къухдариуæгады номæй арфæ æмæ бузныджы ныхæстæ загъта РХИ-йы Хицауады Сæрдар Пухаты Эрик æмæ йæ схорзæхджын кодта Джусойты Нафийы номыл националон премийæ. «Мæн фæнды банысан кæнын уый, æмæ ирон адæмæн фыдæлтæй цы баззадис, уыдон сты не ‘ввзаг æмæ нæ культурæ. Фæнды мæ стыр бузныг зæгъын ирон æвзагыл сфæлдыстадон куыст чи кæны, æппæт уыцы фысджытæн дæр. Ис нæм курдиатджын фæсивæд, кæцытæ сæ мадæлон æвзагыл фыссынц æмдзæвгæтæ. Ахæмтæн мах сæ фарсмæ хъуамæ балæууæм, уыцы хæс æз, фыццаджыдæр, исын мæхимæ, уымæн æмæ ис, цæуыл хъæуы ахъуыды кæнын, уый. Бирæ фæцæрæт хистæр кары чи ис, уыцы фысджытæ, фæлæ нæ сомбоныл дæр хъуамæ ахъуыды кæнæм. Мæхицæн стыр хæсыл нымайын, абон Геннадий Аламиайы кæй хорзæхджын кæнын, уый. Арфæ йын кæнын йе стыр лæггæдты тыххæй сфæлдыстадон къабазы. Бузныг ын зæгъын, «Ирон фæндыр»-æй дарддæр ма йæхимæ ахæм хæс кæй райста æмæ Нафийы поэзи дæр кæй ратæлмац кæндзæнис абхазаг æвзагмæ, уый тыххæй», – загъта Хицауады Сæрдар.
Премитæ дæттыны цымыдисон æмæ нысаниуæгджын мадзалы ма бузныджы æмæ арфæйы ныхæстæ загъта Нафийы хо Джусойты Клавдия æмæ уый фæстæ Плиты Грисы номыл премитæ радта ХИПУ-йы ирон филологийы факультеты студенттæн Нарыкъаты Таирæ æмæ Папашвили Александрæн. Студенттæй ма Гуыззыттаты Ирэнæ, Гæджиты Иринæ æмæ Къуылыхты Аннæ хорзæхджын æрцыдысты Кады грамотæтæй, конкурсы хайад кæй райстой, уый сæраппонд.
Цытджын мадзалы адæмы зæрдæтæ ирон музыкалон номыртæй барухс кодтой Галаты Барисы номыл зард æмæ кафты ансамбль «Симд»-ы нæлгоймæгты зарæггæнджыты къорд, университеты сфæлдыстадон къорд æмæ æндæртæ.
Уæлахиздзаутæ хорзæхджын æрцыдысты æхцайы премитæй. Фыццаг бынатæн лæвæрд æрцыд 150 мин сомы, дыккагæн – 100 мин сомы, æмæ æртыккагæн та – 50 мин сомы.
Цхуырбаты Ларисæ
Comments are closed, but trackbacks and pingbacks are open.