Стыр Уӕлахизы боны цытӕн алы аз дӕр ауагъдæуы мадзӕлттӕ, акцитӕ. Иу ахӕм акци уадзынц Мидхъуыддӕгты министрад дӕр ахӕм номимӕ – «Войны священные страницы навеки в памяти людской».
Акцийы нысан у Стыр Фыдыбӕстӕйон хӕсты цыртдзӕвӕнтӕ ӕмӕ мемориалтӕм базилын. Кӕцыдӕрты дзы хъӕуы цалцӕг кӕнын, сӕ алыварс ныссыгъдӕг кӕнын, барӕсугъд кӕнын.
Рӕнхъон скондимӕ куысты фӕдыл управленийы хистӕр Джиоты Созыр куыд зӕгъы, афтӕмӕй ацы акцийы фӕлгӕтты фылдӕр хъусдард аздахдзысты районты территориты уӕвӕг цыртдзӕвӕнтӕм.
Ныссыгъдӕг уал кодтой, 50-ӕм азты Згъудеры уӕлмӕрды цы цыртдзӕвӕн сарӕзтой Стыр Фыдыбӕстæйон хӕсты фӕмардуӕвджытӕн, уый. Йӕ алыварс къутӕртӕ йын сцагътой, хӕмпӕлтӕй йӕ асыгъдӕг кодтой ӕмӕ йӕ ногӕй сахуырстой. Ӕфснайӕн куыстытӕ бакодтой рӕнхъон скондимӕ куысты фӕдыл управленийы кусджытӕ ӕмӕ профессионалон цӕттӕгӕнӕн центры ахуыргӕнджытӕ ӕмӕ курсанттӕ.
«Ахӕм акцитӕй мах бузныг зӕгъӕм уыцы хъайтартӕн, кӕцытӕ фашизмы дæрæн кодтой. Рӕзгӕ фӕлтӕр ма хъуамӕ рох кӕной сӕ дадаты хъайтардзинӕдтӕ. Цыртдзӕвӕнтӕ сыгъдӕг ӕмӕ цалцӕг куы уой, уӕд уый кӕстӕртӕн хорз цӕвиттон у. Нӕ фыдӕлты хорз хъуыддӕгтӕ куы нӕ хъуыды кӕнӕм, уӕд нын фидӕн нӕ уыдзӕн», – банысан кодта Джиоты Созыр.
Джиоты Алыксандр
