Централон æвзарæн къамисы пресс-службæ куыд фехъусын кодта, афтæмæй 17 апрелы Централон æвзарæн къамис æмбырд ауагъта, цыран къамисы уæнгтæ уынаффæ кодтой округон æвзарæн къамисты сырæзтимæ баст проблемæтыл, уыцы нымæцы Цхинвалы администрацийы сæргълæууæг къамисмæ куынæ æрбавдиса, Хуссар Ирыстоны парламентон æвзæрстыты хъæлæс дæттыны бар кæмæн ис, уыцы æвзарджыты номхыгъдтæ, уæд фадыгон æвзарæн къамистæн цы проблемæтæ сæвзæрдзæн, уый тыххæй.
Рабадты рæстæджы Централон æвзарæн къамисы сæргълæууæг Гæджиты Эмилия банысан кодта, зæгъгæ, горæт Цхинвалы администраци нырма дæр не ‘рбавдыста æвзарджыты нымæцы тыххæй æнæмæнгхъæуæг бæрæггæнæнтæ.
Къамисы уæнгтæ схъæлæс кодтой, документтæ чи иса æмæ сæ чи бæрæг кæна, уый тыххæй цы кусæгон къорд арæзт æрцыд, уый сконд аивыны тыххæй. Уыцы къордæй, йæхи куырдиатмæ гæсгæ, рахызт къамисы сæрдары хæдивæг Годжыцаты Гултамзе, уыцы иурæстæджы ЦÆК-ы контролон-ревизион службæйы уæнг кæй у, уый тыххæй.
Уымæй дарддæр ма дзырдтой, зæгъгæ, æвзарæн фадгуытæ хъуамæ арæзт æрцæуой æвзæрстытæй 50 бон раздæр, бæлвырддæрæй та – 19 апрелмæ. Уыцы рæстæгмæ фидар хъуамæ æрцæуой округон æвзарæн къамисты скондтæ дæр.
Централон æвзарæн къамисы сæрдар бахæс кодта къамисы уæнгтæн, цæмæй æвзарæн зылдтæ фадгуытыл адихтæ кæной, уыимæ ма фадгуытæ конкретонæй цы бæстыхæйтты уой, уыдоны номыртæ банысан кæной.
«Конкретон адресты тыххæй сæм бæрæггæнæнтæ куы нæ уа, уæд, гæнæн ис, фæрæдиой фадыгон æвзарæн къамисы уæнгтæ. Уыдон хъуамæ зоной, æвзарæг уыдонмæ хауы æви нæ, æмæ æвзарæг хъæлæс кæм хъуамæ радта, уый», – загъта Гæджиты Эмилия.
Централон æвзарæн къамисы уæнг Цоциты Игорь бацымыдис кодта, зæгъгæ, хъæлæс дæттæн боны дæргъы къамис цы бæрæггæнæнтæ хъуамæ дæтта процентмæ гæсгæ, округты цы æвзарджытæ ис, уыдоны нымæц куынæ зона, уæд.
Централон æвзарæн къамисы нымæрдар Аулохты Кристинæ фæндон бахаста, цæмæй фадыгон къамистæм радтой, 2019 азы парламентон æвзæрстыты рæстæджы кæмæй спайда кодтой, иумандатон округты æвзарджыты уыцы номхыгъдтæ.
«Уыцы бæрæггæнæнтæм гæсгæ, гæнæн ис, сарæзтæуа алкæцы фадыджы æвзарджыты номхыгъд», – банысан кодта Кристинæ.
Годжыцаты Гултамзе зæрдыл æрлæууын кодта, зæгъгæ, Парламент ныридæгæн райста иумандатон округты схемæ, районты сæргълæуджытæ цы бæрæггæнæнтæ радтой, уыдон бындурыл, республикæйы районты æвзарджыты нымæцимæ.
О, фæлæ уый фæстæ республикæйы æртæ районы парламентаритæ фæфылдæр кодтой æвзарджыты нымæц: Дзауы, Знауыры æмæ Цхинвалы районты, æвзарджыты нымæц 2019 азы иумандатон æвзарæн округты æвзарджыты схемæйы бæрæггæнæнтимæ сраст кæнгæйæ.
Гæджиты Эмилия куыд банысан кодта, афтæмæй иуæй-иу депутаттæ ЦÆК-ы фæаххосджын кодтой, зæгъгæ, дам, æвзарджыты нымæцы тыххæй раст бæрæггæнæнтæ нæ радтой, кæд Къамис Парламентмæ алæвæрдта, Конституцион закъон куыд домы, æвзарджыты тыххæй ахæм дырыс бæрæггæнæнтæ, уæддæр. Бæрæггæнæнтæ сæм уæд дæр не ‘рбавдыста горæт Цхинвалы администраци. Централон æвзарæн къамис бæрæггæнæнтæ исы, æрмæстдæр, республикæйы районты æмæ горæты администрациты сæргълæуджытæй.
«ЦÆК æппæт дæр сарæзта закъоны домæнмæ гæсгæ, æмæ дзурын нæ хъæуы, зæгъгæ, раст бæрæггæнæнтæ нæ радтам», – фехъусын кодта Гæджиты Эмилия.
Уый бахæс кодта, цæмæй æртæ районы сæргълæуджытæм арвитой официалон фыстæджытæ, æвзарджыты тыххæй раст бæрæггæнæнтæ радтыны тыххæй. Уымæй дарддæр ма бахæс кодта къамисы уæнгтæн, цæмæй æркæсой 2019 азы æвзарджыты номхыгъдтæм æмæ сæхæдæг бафæлварой æвзарджыты фадгуытыл æмæ округтыл адих кæнын.
Централон æвзарæн къамис сæрмагонд хыгъд бакæныны бар радта, Парламенты депутаттæм йæхи раразмæ кæныны фæнд чи кæны, ноджы уыцы æртæ æмбæстагæн – Плиты Константин, Дыгъуызты Олег æмæ Елбачиты Александрæн. Уыдон ныридæгæн сæ документты пакеттæ балæвæрдтой ЦÆК-мæ.
ЦÆК-мæ бацыд фыстæг Адæмон партийы сæрдар Харебаты Сергейæ, цыран уый домы, цæмæй бамбарын кæной, кандидатты цензы тыххæй бæрæггæнæнтæ кæцы орган хъуамæ æрбавдиса.
Депутаттæм кандидаттæ раразмæ кæныны тыххæй съездтæ ауадзыны тыххæй фехъусын кодтой Коммунистон парти, Социалистон парти «Фыдыбæстæ» æмæ Адæмон парти.
Осиаты Индира
