75 азы размæ 22-æм июны бон куы æрбацъæх ис, уæд Советон цæдисы адæмыл айхъуыстис уæззау хабар — фашистон Герман æрбабырста нæ зæххмæ æмæ йын дæргъвæтин тугкалæн хæст бацайдагъ ис Советон Цæдисы адæмы ныхмæ. Фондз азы дæргъы Советон Цæдисы цæрæг адæм æмвæнд æмæ æмзондæй тох кодтой сæ цыфыддæр знаджы ныхмæ. Уыцы æвирхъау хæсты ныккалдис бирæ милуангай адæймæгты туг, фæлæ уæддæр фæуæлахиз сты гермайнаг фашизмыл æмæ æрхастой сæрибардзинад.

Стыр Фыдыбæстæйон хæст цы бирæ зиæнттæ æрхаста, уыдоны нымæц у æнæкæрон. Хæсты азты рæстæджы Советон Цæдисæй æфсæддон службæгæнджытæ æмæ сабыр цæрджытæ фæмард 26 600 000 адæймаджы. Хæсты рæстæджы Советон цæдисы Гарзджын тыхты зиæнттæ уыдысты 8 668 400 адæймаджы, чи фæцæфтæ, чи фæрынчын сты æмæ уазæлтты чи басыдысты, уыдоны нымæц уыдис 15 205 592 адæймаджы, 5 597 000 адæйма-джы, уацары бахаудтой — 4 559 000 адæймаджы, гитлерон мæлæты лагерты куынæг æрцыдысты Советон Цæдисы 11 000 000 æмбæстаджы, хæсты рæстæджы пырх æрцыдысты 1710 горæты æмæ горæтон типы поселочы, куынæг æрцыдысты — 70 000 хъæуы, пырх æрцыдысты 31 850 заводы æмæ фабрикæйы, 1135 шахтæйы, 65 000 км — æфсæнвæндаджы, тауæн фæзуæттæ фæкъаддæр сты 36 800 000 гектары.

Æппæт ацы зиæнттæ бандæвтой ирон адæмыл, кæд хæст Хуссар Ирыстоны онг не ’рхæццæ ис, уæддæр Райгуырæн бæстæ бахъахъхъæнынмæ алы ирон хæдзарæй дæр ацыдис цалдæргай æвзонг адæймаджы, кæцытæй бирæтæ нал æрыздæхтысты сæ фыды уæзгуытæм.

Кæд 75 азы рацыдис уыцы тугкалæн хæстæй, уæддæр.

Стыр Фыдыбæстæйон хæсты алкæйы зæрдæйы дæр уæззау æнкъарæнтæ æвзæрын кæны. Ацы бон æрымысыны охыл 21-æм июны изæры 20:20 сахатыл Театралон фæзуаты ауагъд æрцыдис Дунеон номарæн акци. Йæ организатортæ уыдысты Æфсæддон-патриотон акци «Æнæмæлгæ полк» бацæттæ кæныны фæдыл хуссарирыстойнаг штаб. Мысæн акцийы сæйраг девиз та уыдис алкæмæндæр зындгонд ныхæстæ: «Ничи ферох, ницы ферох».

Номарæн акцимæ æрбацыдысты нæ республикæйы разамонджытæ — Президент Тыбылты Леонид, Хицауады Сæрдар Хъуылымбегты Доменти, Парламенты Сæрдар Бибылты Анатоли, нæ горæты администрацийы сæргълæууæг Æлборты Алан, нæ республикæйы æндæр бæрнон адæймæгтæ æмæ нæ горæты цæрджытæ.

Мадзалмæ æрбацæуæг адæмы раз Стыр Фыдыбæстæйон хæсты æмæ йæ рбакæнгæ зиæнтты тыххæй æрдзырдтой акцийы организатортæ. Номарæн мадзалы ма айзæлыдысты хæстон æнкъард зарджытæ дæр. Акцийы хайадисджытæ хæсты чи фæмард сты, уыдоны рухс нæмттæ ссардтой иу уысм æмырæй алæууынæй.

Нæ горæты Театралон фæзуаты цы номарæн акци уагъд цыдис Стыр Фыдыбæстæйон хæсты райдайæны цытæн, уырдæм Мæскуыйæ Æбæрæг салдаты æнусон артæй ссудзгæ цырагъ æрхастой Хуссар Ирыстоны столицæ Цхинвалмæ. Æнусон артæй ссудзгæ цырагъ æрхæццæ ис хæдтæхæгыл Мæскуыйæ Цæгат Ирыстонмæ, уырдыгæй та йæ Хуссар Ирыстоны Уæрæсейы арæны онг æрластой машинæйыл, уым лæвæрд æрцыдис нæ республикæйы Фыдыбæстæ хъахъхъæнджыты экипажмæ. Номарæн цырагъ æрхæццæ ис, акци йе ’мбисмæ куы бахæццæ, уæд. Фыдыбæстæ хъахъхъæнджытæ номарæн цырагъ радтой нæ республикæйы Президент Тыбылты Леонидмæ. Акцийы хайадисджытæ Стыр Фыдыбæстæйон хæсты чи фæмард, уыдон рухс нæмттæ ссарыны тыххæй сæ цырæгътæ ссыгътой Мæскуыйы Æбæрæг салдаты Æнусон артæй æрхæсгæ цырагъæй.

Акцийы кæронбæттæны ма уæларвмæ суагътой урс къоритæ дæр.

ТУАТЫ Ларисæ

Comments are closed, but trackbacks and pingbacks are open.