Акци Зæххы боны цытæн

Нæ республикæйы Æрыгон натуралистты станцы кусджытæ уадзынц æрвылазон акци «Зеленый росток».  Уый уагъд цæуы республикон æмвæзадыл. Æрвылаз дæр дзы хайад райсынц горæты æмæ районты ахуырадон уагдæттæй кæй фæнды, уыдон се ‘ппæт дæр.

Акцийы сæйраг нысан у: рæзгæ фæлтæрæн æрдзмæ аудгæ ахаст дарын амонын, уарзын сын кæнын сæ райгуырæн зæхх; ахуыргæнинæгты æрдзы проблемон фарстатимæ зонгæ кæнын æмæ се скъуыддзаг кæнынмæ рæхсын; сывæллæтты цайдагъ кæнын зайæгойтимæ архайын; зайæгойты хуызтæ фылдæр кæнын республикæйы территорийыл. Акцийы организатортæ сты æрыгон натуралистты станцы кусджытæ Гæбæраты Зæринæ æмæ Битеты Аллæ.

«Акцийы хайадисджытæ хъуамæ сæ ахуырадон уагдæтты кæртытæ, æндæр организациты æмæ хисæрмагонд хæдзæртты рæзтæ хæрзæфснайд бакæной. Уый  фæстæ сæ алыгъуызон зайæгойтæ æмæ дидинджытæ байтауой. Ауадзой викторинæтæ, тематикон беседæтæ, презентацитæ, сæрмагондæй акцийы темæимæ баст æндæр мадзæлттæ, саразой къулын газеттæ.

Ныртæккæ уал горæты скъолатæ-хайадисджытæн мах арвыстам алыгъуызон зайæгойты тауинæгтæ æмæ талатæ. Ацы бонты арвитдзыстæм Дзау, Знауыр æмæ Ленингоры районты скъолатæм дæр. Дарддæр сыл кусдзысты бынаты æмæ акцийы кæрон хъуамæ радтой хыгъд», – радзырдта Гæбæраты  Заринæ.

Уый ма куыд загъта, афтæмæй акцийы фæуды йæ хайадисджыты куыстытæн хатдзæгтæ скæндзысты жюрийы уæнгтæ. «Алы скъолайæ дæр кæронбæттæн мадзалы хайад райсы 3 ахуыргæнинаджы. Уыдон семæ æрбахæссынц сæ бакæнгæ куыстыты нывтæ, видеоæрмæджытæ. Уыдонмæ гæсгæ жюрийы уæнгтæ равзарынц уæлахиздзауты æмæ сын раттынц хорзæхтæ – грамотæтæ æмæ зæрдылдарæн лæвæрттæ», – радзырдтой организатортæ.

Жюрийы уæнгтæ сты Бестауты Бала, Буджиты Замирæ, Гæбæраты Залинæ, Гæбæраты Дзерассæ æмæ Джиоты Любæ.

Акци уагъд цæудзæн 22 мартæй 22 апрелмæ. Бæл-вырддæр зонæнтæ райсæн ис мæнæ ахæм номыртыл: 8 929 806 92 45; 8 929 809 00 29, кæнæ ахæм адресыл; г. Цхинвал, Путины уынг 82.

ХУЫГАТЫ Миленæ

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.