Горӕт Цхинвалы милицийы управленийы ӕнахъомты хъуыддӕгты фӕдыл хайадмӕ мидхъуыддӕгты министрады кусӕг Уалыты Заринӕ ӕвӕрӕз бинонты сывӕллӕттӕн бахаста 80 фӕлысты бӕрц къахыдарӕс ӕмӕ 50 фылдӕр та – уӕлӕдарӕс. Ахӕм ӕххуыс Уалыты чызг фыццаг хатт нӕ бакодта.
Ӕнахъомты хъуыддӕгты фӕдыл хайады инспектортӕ хорз зонгӕ сты ӕвӕрӕз бинонты царды уавӕртимӕ, чи сӕ цӕуыл тыхсы ӕмӕ фыццаграды кӕмӕн хъӕуы баххуыс кӕнын, уый. Исчи сӕм баххуыс кӕныны охыл куы бахаты ӕмбӕстӕгтӕй, кӕнӕ бӕрнон кусджытӕй, уӕд уайтагъд байуарынц ратгӕ ӕххуыс цыбыркъух бинонтыл. Ныр дӕр сӕм райсгӕ къахыдарӕс ӕмӕ уӕлӕдарӕсӕй иу фӕлыст дӕр нал ис – иууылдӕр сӕ радтой, хыгъды сӕм цы ӕвӕрӕз бинонтӕ лӕууынц, уыдонӕн.
«Ахӕм ӕххуыс бакӕнын уды бӕстӕ у. Мӕнӕн ма уӕлдай ӕхсызгон вӕййы, не ‘мкусджытӕ куы баххуыс кӕнынц ӕвӕрӕз бинонтӕн, уӕд. Стыр бузныг ӕмӕ сӕрыстыр дӕн Заринӕйӕ, ӕмӕ йын арфӕ кӕнын ӕппӕт ӕвӕрӕз бинонты номӕй. Заринӕйы хуызӕттӕ нӕм бонӕй-бонмӕ фылдӕр кӕнынц ӕмӕ уый хорзыл дзурӕг у. Ныфс мӕ бацӕуы, нӕ кӕстӕр фӕлтӕрӕн рухс сомбон кӕй уыдзӕн, уымӕй», – зӕгъы милицийы ӕнахъомты фӕдыл хайады хистӕр Гатайты Лали.
