Ацы аз 26 октябры Гуырдзыстоны ауадздзысты радон парламентон æвзæрстытæ æмæ сæм сæ разамынад развæлгъау сæхи цæттæ кæнын райдыдтой. Гуырдзыстоны парламентон ӕвзӕрстытӕ фыццаг хатт цӕудзысты пропорционалон системӕйы хуызы ӕмӕ парти хъӕлӕстӕ ӕнӕмӕнг фондз процентӕй фылдӕр хъуамӕ сиса, цæмæй парламентмæ бахауа, уый тыххæй. Ныридӕгӕн сӕм политикон уавӕр ӕндыгъд у, оппозици сӕм стыхджын ӕмӕ ныгуылӕн бӕстӕты ӕндӕвдад дӕр егъау у ӕхсӕнадыл, æмæ ныры разамынад уымæн тӕрсы фембылдæй.
Гуырдзыстоны сӕйраг политикон парти «Грузинская мечта» зынгӕ миллиардер Бидзина Иванишвилийы кӕй у, уый алчидӕр зоны. Фӕстаг азты Гуырдзыстоны политикон царды ӕргомӕй ницы хайад иста, фӕлӕ ныр йæ хъуыды аивта. 2023 азы 30 декабры партион ӕмбырды ӕвзӕрст ӕрцыд партийы кадджын сӕрдарӕй ӕмӕ раныхасы банысан кодта, зӕгъгӕ политикӕмӕ ногӕй раздӕхт коррупцийӕн аккаг ныхкъуырд раттыны тыххӕй.
Иу мӕй дӕр нӕ рацыд ӕмӕ ныр та Гуырдзыстоны премьер-министр Ираклий Гарибашвили цæуы йæ бынатæй. Ахӕм фӕндон рахастой партийы политсоветы ӕмӕ йӕ хъуамӕ сфидар кодтаиккой партийы радон ӕмбырды 1 февралы. Фӕлӕ Гарибашвили уӕдмӕ нал банхъӕлмӕ каст ӕмӕ сӕрмагонд брифингы рӕстӕджы фехъусын кодта йӕ ацыды хабар. Йӕ бынатмӕ йын цӕттӕ кӕнынц парти «Грузинская мечта»-йы сӕрдар Ираклий Кобахидзейы. Раздӕры премьер-министры та фӕстӕдӕр равзардзысты партийы сӕрдарӕй. Куыд уынӕм, афтӕмӕй сарӕзтой рокировкӕ, сӕ бынӕттӕ баивтой. Ис ма ахӕм информаци дӕр, ома Гарибашвили партийы сӕрдар рӕстӕгмӕ уыдзӕн, йӕ бынатмӕ йын цӕттӕ кӕнынц Иванишвилийы фырт Утайы, кӕцы цӕры Францы.
Гарибашвили йӕ ацыд афтӕ бамбарын кодта, ома паддзахадон бӕрнон бынӕтты бахъуыд ротаци саразын, цӕмӕй демократон системӕйӕн дзуапп дӕттӕм. «Ӕз цӕсгомджынӕй лӕггад кодтон мӕ райгуырӕн бӕстӕйӕн, хъахъхъӕдтон ын йӕ интерестӕ ӕмӕ буц дӕн мӕ, бакӕнгӕ куыстӕй. Ныр та фӕндаг раттын хъӕуы нӕ партийы ӕрыгон лидертӕн. Стӕй ма, фӕззӕджы ӕвзӕрстытӕм дӕр хъӕуы нæхи хорз бацӕттӕ кӕнын, цӕмӕй та ныл радон хатт се ‘ууӕнк бафтауой не ‘мбӕстӕгтӕ».
Фыццаг хатт Ираклий Гарибашвили премьер-министрӕй нысан ӕрцыд 2013 азы ӕмӕ ацы бӕрнон бынаты баивта Бидзина Иванишвилийы. 2015 азы ацыд отставкӕйы, фӕлӕ ӕгуыстӕй бирӕ рӕстӕг нӕ баззад – снысан ӕй кодтой Хъахъхъӕнынады министрады сӕргълӕууӕгӕй. 2021 азы 21 февралы ногӕй нысан ӕрцыд премьер-министрӕй Георгий Гахарияйы бӕсты.
Ныры отставкӕ политологтӕ ӕмбарын кӕнынц Гарибашвилиимӕ баст алыгъуызон хъаугъатӕй. Фыццаджы уал нӕ фидыдтой президент Саломе Зурабишвилиимӕ ӕмӕ уый фӕдыл Гуырдзыстоны разамынад зындзинӕдтӕ ӕвзӕрста ныгуылӕн бӕстӕтимӕ. Зурабишвили ӕппынӕдзух дӕлдзиныг кодта Гарибашвилийы, ӕфхӕрдта йӕ ныгуылӕн бӕстӕты минӕвӕрттӕн, хъавыд ын комкоммӕ санкцитӕ рахӕссынмӕ, цӕмӕй йын фӕсарӕйнаг бӕстӕты разамынадимӕ ӕнтыстджын куыст бакӕныны фадат ма уыдаид. Дыккаджы та, рабӕрӕг ис, Гарибашвили хицауады хӕдтӕхӕгыл фӕсарӕнтӕм кӕй ласта йӕ фырты уӕлдӕр ахуыргӕнӕндонмӕ. Стӕй ма ноджы рабӕрӕг, йе ‘мкъайыл ӕнӕзакъонӕй фыст кӕй ӕрцыдысты зӕххытӕ.
Ӕппӕт факттӕ хынцгӕйӕ бӕрӕг у, Гарибашвилийы аххосӕй Иванишвилийы партийы кад дӕлӕмӕ кӕй ӕрхаудта. Уымӕ гӕсгӕ хъуыд исты ивындзинӕдтӕ бахӕссын. Ӕвзӕрстыты хорз бӕрӕггӕнӕнтимӕ куы нӕ рамбулой, уӕд сын фидӕны Саакашвилийы политикон парти цӕлхдуртӕ ӕвӕрдзӕн, ног хуызджын революци аразынмӕ ӕрхъавдзысты.
Гуырдзыстоны паддзахадон системӕ парламентон у ӕмӕ фактон ӕгъдауӕй отставкӕйы ацыдис ӕххӕстгӕнӕг орган. Закъонмӕ гӕсгӕ премьер-министримӕ сӕ куысты бынӕттӕй сӕрибар ӕрцыдысты ӕгас хицауад. Ираклий Кобахидзейы бахъӕудзӕн ног министртӕ снысан кӕнын. Дзырдӕуы, зæгъгæ, цалдӕр министры ногӕй фидаргонд нал ӕрцӕудзысты – Фӕсарӕйнаг хъуыддӕгты, Ӕнӕниздзинады, Юстицийы, Культурӕйы ӕмӕ спорты.
Иумæйагӕй паддзахадон политикӕйыл куы дзурӕм, уӕд дзы кардиналон ивындзинӕдтӕ не ‘рцӕудзӕн. Кобахидзейӕн йӕ позици у Гуырдзыстоны интеграцион процесстӕ НАТО ӕмӕ Евроцӕдисимӕ арфдæр кæныны фарс æмæ Уӕрӕсеимӕ та сын цæмæй уа пайдаджын ӕмӕ ӕнгомдӕр ахастытӕ, ӕмӕ се ‘ддагон политикон курс æввахс рӕстӕджы ма фӕивой.
ДЖИОТЫ Алыксандр
