Редакцимæ нæм фæуазæг сты Цхинвалы скъола-интернаты хъомылгæнджытæ Козаты Раисæ æмæ Джиоты Фатимæ. Уыдон нæм бахатыдысты, цæмæй газет «Хурзæрин»-ы фæрцы бузныг зæгъой сæ раздæры хъомылгæнинаг æмæ рауагъдон Зассеты Василийæн.
«Ног азы размæ нæм фæдзырдта Васили æмæ нын загъта, зæгъгæ, йæ фæнды скъола-интернаты хъомылгæнинæгтæй уым æхсæвиуат чи кæны, уыдон цал адæймаджы сты, уый базонын, цæмæй сын бакæна ногазон лæвæрттæ. Æцæг ын йæ фæнд сæххæст кæнын Ног азмæ нæ рауад, фæлæ нæм Зæронд Ног азмæ йæ фыд Зассеты Роланд æрбаласта 50 ногазон лæвары. Кæй зæгъын æй хъæуы, æхсызгон нын уыд нæ раздæры рауагъдоны хæрзаудæн акци, æгайтма нæ рох кæны йæ уарзон скъолайы. Интернаты фæкæсынхъуаг сывæллæттæ ахуыр кæнынц æмæ фæцин кодтой сæ лæвæрттыл».
Зассеты Васили Цхинвалы скъола-интернат каст фæцис 2019 азы. Уый фæстæ фæсаууонмæ ахуыр кæнынмæ бацыд Цæгат Ирыстон-Аланийы хъæууонхæдзарадон институты ветеринарон факультетмæ. Уæдмæ йæм æрсидтысты йе ‘мбæстагон хæс бафидынмæ. Службæ кодта Кемеровойы областы горæт Юграйы.
Йæ фыд Роланды ныхæстæм гæсгæ, æфсадæй æрыздæхт январы мæйы æмæ йæ ахуыр адарддæр кæндзæн хъæууонхæдзарадон институты. Ныртæккæ ис 4-æм курсы. Чысылæй фæстæмæ тынг уарзы хæдзарон цæрæгойты æмæ ветеринарон факультет дæр уымæн равзæрста. Цалынмæ йæ дæсныйады специалист суа, уæдмæ уал æххæст кæны алыгъуызон куыстытæ.
Банысан кæнын хъæуы уый дæр, æмæ интернаты коллективæн иумиагæй тынг æхсызгон уыд Василийы æрхъуыдыдзинад. Сæ зæрдæ йын зæгъы дарддæры æнтыстджын цард. Уадз, йæ хорздзинæдтæ нæм хъуысæд алыхатт дæр.
Нæ уацх.
