Стыр Уæлахизы 73 азы бон банысан кодтой Цхинвалы скъола-интернаты. Ауагътой музыкалон-поэтикон изæр æмæ йæм фæхуыдтой Стыр Фыдыбæстæйон хæсты ветеранты.
Изæр бацæттæ кодтой скъолайы ахуыргæнджытæ æмæ ахуыргæнинæгтæ. Уый байгом рæсугъд хореографион композицийæ æвзонг чызджытæ æмæ лæппутæ æрдæгталынг сценæйыл хæстон рæстæджыты гимнастеркæты акафыдысты вальс.
Уый фæстæ аив сæххæст кодтой ахæм тематикон сценкæтæ, куыд «Дети войны», «На Мамаевом кургане».
Интернаты ахуыргæнинæгтæ ма азарыдысты хæстон зарджытæ, бакастысты хæстон темæтыл фыст æмдзæвгæтæ. Сæвæрдтой ма И. Васильевы уацмыс «А зори здесь тихие»-мæ гæсгæ инсценировкæ, кæцыйы хистæркъласонтæ равдыстой, уыцы хи царды аргъæй немыцаг диверсантты чи æрурæдтой, уыцы æвзонг чызджыты фæлгонцтæ.
Иу минут æмырæй алæугæйæ ссардтой Стыр Уæлахизы 73 азы бонмæ чи нæ фæцард, уыцы хæстонты рухс нæмттæ.
Цхинвалы администрацийы культурæйы хайады сæргълæууæг Тасойты Игорь Уæлахизы бæрæгбоны цытæн раарфæ кодта хæсты ветерантæн æмæ мадзал чи бацæттæ кодта, уыдонæн.
Нæ уацх.
Comments are closed, but trackbacks and pingbacks are open.