Моралон-психологон æмæ службæйон-хæстон планы фæлгæтты Мидхъуыддæгты министрады рæнхъон скондæн уагъд цæуынц ахуыртæ. Фыццаг уал райдыдтой медицинæйæ, ома тыхст адæймагæн куыд æмæ цахæм хуызы хъæуы баххуыс кæнын дохтырты æрбацыдмæ. Милицийы кусджытæн ацы предметæй лекци бакаст милицийы медикон-санитарон хайы хистæр Мæргъиты Георги.
Милицийы кусджытæ фылдæр хæттыты алыгъуызон цаутæм бацæуынц фыццаг æмæ сæ уымæ гæсгæ бахæсджын кодтой, цæмæй сæ бон уа фыццаг медицинон æххуыс бакæнын. Уы-мæн æмæ уыцы цалдæр минутыл бирæ хæттыты баст вæййы адæймаджы цард, кæцы бахауы бæллæхы, райсы травмæтæ æмæ афтæ дарддæр. Дохтырты æрбацыдмæ рынчынæн æмбæлон æххуыс куы ничи бакæна, йæ рыстытæ йын куы ничи фæрог кæна, уæд гæнæн ис æмæ амæла. Æмæ ахæм æнамонд цаутæ дæр æрцæуы.
«Фыццаг æххуыс рынчынæн бакæнын хъæуы æвæстиатæй, цæмæй мæлæтæй аирвæза дохтырты æрбацыдмæ кæнæ йæ цалынмæ рынчындонмæ хæццæ кæной, уæдмæ. Ахæм æххуыс бакæнын у алы милицийы кусæджы хæс дæр. Уымæ гæсгæ мидхъуыддæгты органты кусæг хъуамæ æнæмæнг зона фыццаг æххуыс бакæныны методикæ, сбæлвырд кæна рынчыны уавæр, цахæм травмæ райста, куыд тæссаг у йæ цардæн æмæ йын фыццаг рады куыд хъæуы баххуыс кæнын, æппæт уыдæттæ. Хъуамæ зона, адæймаджы зæрдæ массажы хуызы куыд хъæуы скусын кæнын, тугуагъд куыд хъæуы æрлæууын кæнын, стæг куы ацъæл уа кæнæ куы фелвæса, уæд цы хъæуы саразын», – æмбарын кæны Мæргъиты Георги.
Медицинæйы фадыджы зонындзинæдтæ милицийы кусджытæн фæахъаз уыдзысты сæ дарддæры службæйы æмæ ма уыимæ иумæ сæ профессионалон цæттæдзинад дæр фæбæрзонддæр уыдзæнис.
Ахуыртæ ма уагъд цæуы табелон æхсæнгарзимæ архайынæй æмæ æхсынæй дæр. Мидхъуыддæгты министрады профессионалон цæттæдзинады центры инструктортæ рæнхъон скондæн амонынц табелон æхсæнгæрзты тактикон-техникон характеристикæтæ. Милицийы алы кусæг дæр хъуамæ зона æхсæнгарзæй æхсыны цæттæдзинады нормативтæ æмæ хибахъахъхъæныны домæнтæ. Зонгæ ма сæ кæнынц алыгъуызон нæмгуыты хуызтимæ, сæ нысанмæздæхтытæ, цахæм уавæрты сæ хъæуы пайда кæнын æмæ афтæ дарддæр. Амонынц ма сын, æхсæнгæрзтæ цавæр хæйттæй конд сты æмæ йæ куыд хъæуы райхалын æмæ сæмбырд кæнын. Фæстæдæр теоретикон ахуыртæй дæтдзысты зачеттæ æмæ хорз зонындзинæдтæ кæмæ уа, уыдон ахиздзысты иннæ этапмæ – полигоны æхсдзысты табелон æхсæнгæрзтæй.
Ахæм ахуыртæ милицийы дæлхæйтты уагъд цæудзысты азы дæргъы.
ДЖИОТЫ Алыксандр
Comments are closed, but trackbacks and pingbacks are open.