Бацæуæн фæлварæнтæ райдыдтой журналистикæйы факультетæй

Знон Тыбылты Алыксандры номыл Хуссар Ирыстоны паддзахадон университеты бацæуæн фæлварæнтæ райдыдтой журналистикæйы факультетмæ. Фæлварæнтæ истой журналистикæйы кафедрæйы гæс, РХИ-йы сгуыхт журналист Хъодалаты Хансиат, журналистикæйы кафедрæйы сæйраг специалист, РХИ-йы сгуыхт журналист Джиоты Аллæ.

Бацæуæн фæлварæн куыд ацыдис, абитуриенттæ цавæр темæтæ равзæрстой æмæ куыд цæттæ уыдысты, уый тыххæй нын радзырдта ХИПУ-йы журналистикæйы кафедрæйы гæс Хъодалаты Хансиат. Уый райгондæй баззадис бацæуæн фæлварæны фæстиуджытæй æмæ бамбарын кодта абитуриенттæ сæ равзаргæ дæсныйадмæ куыдфæндыйы цæстæй кæй нæ кæсынц æмæ журналистикæйы факультетмæ æнæнхъæлæджы нæ, фæлæ нысанмæздæхтæй кæй не ʻрбацыдысты.

– Фыцццаджыдæр зæгъдзынæн уый, æмæ махмæ æрвылаз дæр бацæуæн фæлварæнтæ кæй райдайынц сфæлдыстадон конкурсæй. Зæгъæм, стыр уæлдæр ахуыргæнæндæтты ацы фæлварæн конд вæййы дыууæ хайæ. Фыццаг хай вæййы фыссынæй, абитуриенттæ ныффыссынц сæрибар темæйыл. Фæлварæны дыккаг хай та ацæуы ныхасы кæныны хуызы. Фæлæ мах уыдон баиу кодтам æмæ сæ исæм иу бон. Раздæр уал ныффыссынц сæ равзаргæ сæрибар темæтыл æмæ уый фæстæ та фæныхас кæнæм семæ. Æнæуи, сæрибар темæты нымæц иумиагæй вæййы ссæдзы бæрц. Мах уыдон развæлгъау, иу кæнæ дыууæ къуыри раздæр бакæнæм нæ университеты къулыл, цæмæй сæ зоной æмæ сфæлдыстадон фæлварæнмæ сæхи бацæттæ кæной. Темæтæ вæййынц дыууæ паддзахадон æвзагыл дæр æмæ абитуриенттæн сæ бон у сæрибарæй равзарой сæ иуы. Бацæуæн фæлварæнмæ нын бацæттæ кодтой æртæ конверты, кæцыты уыдис æхсæзгай темæтæ æмæ дзы алчидæр систа иу темæ. Мах сын радтам дыууæ сахаты бæрц, цæмæй ныффыссынæн.

Ацы аз нæ факультетмæ бар ис, райсæн уыдис 20 адæймаджы. Мæ зонæнтæм гæсгæ цæмæ æнхъæлмæ кастыстæм, уымæй сты къаддæр. Фæлæ нæм уæддæр фаронимæ абаргæйæ ацы аз фылдæр абитуриенттæ æрбацыдис. Уæд нæм æрбацыдис æхсæз. Уый фæстæ ма уæлæмхас фæлварæнтæ кæмæй райстам, уыдонимæ систы иуæндæс. Ныр та нæм æрбацыдысты дыууадæсæй æмæ стæм райгонд. Чизоны ма фæстæдæр уæлæмхасæн райсæм  æмæ  уæд  фæфылдæр уыдзысты», – загъта Хъодалаты Хансиат.

Журналистикæйы факультетмæ цы дыууадæс абитуриенты æрбацыдис, уыдон се ʻппæт дæр сты чызджытæ. Уыдонæй се ʻрдæг сæ равзæрст темæтæ ныффыстой мадæлон æвзагыл æмæ се ʻннæ ‘рдæг та – уырыссаг æвзагыл.

Цхуырбаты Ларисæ