Хуссар Ирыстоны паддзахадон университеты исæн къамис абитуриенттæй куырдиæттæ исынмæ æрæвнæлдта 1-æм июлæй. Исæн къамисы бæрнон нымæр-дарæй нысан æрцыд Гаглойты Евелинæ. Куырдиæттæ ист цыдысты 16 июлмæ. Дунеон журналистикæйы факультеттмæ та 12 июлмæ. Университеты исæн къамисмæ боны æмæ фæсаууонмæ ахуырмæ сæ гæххæттытæ балæвæрдтой 500 абитуриенты бæрц. Исæн къамисы нымæрдар куыд зæгъы, афтæмæй боны хайадмæ куырдиæттæ ист цыд ахæм дæсныйæдтæм: биологи æмæ хими, дунеон Журналистикæ, Англисаг æвзаг немыцаг æвзаджы уæлæмхас дæсныйадимæ, Истори, æхсæнадæмон ахастыты истори, прикладон математикæ æмæ информатикæ, Ирон æвзаг æмæ литературæ, уырыссаг æвзаг æмæ литературæ, Райдиан ахуырады педагогикæ æмæ методикæ, Психологи, Кондадон æмæ æмбæстагон арæзтад, арæзтады механизаци æмæ автоматизаци, Куыстуаты экономикæ æмæ разамынад, юриспруденци.
Гаглойты Евелинæ куыд зæгъы, афтæмæй фæсау-уонмæ ахуыры та ис куыд бюджетон, афтæ коммерцион бындурыл ахуыр дæр. Бюджетон бындурыл равзарæн ис ахæм дæсныйæдтæ куыд: биологи, скъолайы агъоммæйы педагогикæ, ирон æвзаг æмæ литературæ, ризикон хъомылад, райдиан ахуырады педагогикæ æмæ мето-дикæ. Фæсаууонмæ ахуыры фидгæ дæсныйæдтæм хауынц – паддзахадон муниципалон управлени, Финанстæ æмæ кредиттæ, истори, автомобиль æмæ автомобилон хæдзарад, Дунеон журналистикæ, формаци, Юриспруденци, психологи. Уырдæм ист цæудзысты абитуриенттæ куыд уæлдæр, афтæ астæуккаг ахуыры бындурыл дæр.
Исæн къамисы нын радзырдтой ацы аз абитуриенттæ иууыл зæрдиагдæрæй, кæцы факультеттæм цыдысты: «юриспруденция, экономикæ, прикладон математикæ, англисаг æвзаг немыцаг æвзаджы уæлæмхас дæсныйадимæ æмæ психологийы факультеттæм куырдиæттæ нал исæм, уымæн æмæ уырдæм ист æрцыд, цас хъæуы, уыйбæрц. Фæлæ куырдиæттæ дарддæр исдзысты абитуриенттæй мæнæ ахæм дæсныйæдтæм, куыд: ирон æвзаг æмæ литературæ, уырыссаг æвзаг æмæ литературæ, дунеон журналистикæ, Æхсæнадон Ахастыты истори, Медицинон биохими, Кондадон æмæ æмбæстагон арæзтад, Райдиан ахуыры педагогикæ æмæ методикæмæ. Ацы факультетмæ куырдиæттæ ист цæудзæнис 20-æм августмæ. Цы дæсныйæдтæ ранымадтам, уыдон сты боны хайад. Фæлæ фæсаууонмæ хайадмæ та, бюджетон æмæ коммерцион базæйыл, исæн къамисы уынаффæмæ гæсгæ, адарддæр кодтам абитуриенттæй гæххæттытæ исын алкæцы факультетмæ дæр, физикон культурæйы цæттæдзинадæй дарддæр. Уымæн æмæ ацы факультетмæ дæр æрбацыд бирæ студенттæ», – зæгъы Гаглойты Евелинæ.
Исæн къамисы сæрдар ма нын радзырдта, фаронмæ абаргæйæ ацы аз æхгæд кæй æрцыд боны хайады Актерон дæсныйады факультет. Уымæй дарддæр ивгъуыд аз популярон уыд кондадон æмæ æмбæстагон арæзтады факультет, фæлæ йæм ныр æрбацыд къаддæр абитуриенттæ. Уый ма зæгъы, фаронимæ абаргæйæ ХИПУ-мæ ахуыр кæнынмæ кæй фæнды, уыдон нымæц кæй нæ фæкъаддæр. Коронавирусы аххосæй абитуриентты нымæц нæ фæкъаддæр. Фарон дæр æмæ ныр дæр документтæ исынæн бар лæвæрд цыд онлайн режимы.
Исæн къамисы зонæнтæм гæсгæ ХИПУ-мæ сæйраджыдæр, ахуыр кæнынмæ цæуынц РХИ-йы иумæйаг ахуыргæнæн скъолаты рауагъдонтæ. Фæлæ се ‘хсæн ис Цæгат Ирыстон-Аланийæ, Дагестан, Цæцæн æмæ æндæр республикæтæй чи æрцыд, ахæм абитуриенттæ дæр.
Нæ уацх.
Comments are closed, but trackbacks and pingbacks are open.