Хуссар Ирыстоны Тыбылты Алыксандры номыл паддзахадон университеты фыццæгæм июлæй райдыдтой абитуриентты документтæ исын. Рауагъдонтæн ис фадат боны æмæ фæсаууонмæ хайадтæм равзарын 20 дæсныйадæй фылдæр.

Ивгъуыд аз ХИПУ-йы студенттæ систы 550 абитуриенты. Уыдонæй боны хайад равзæрстой 200 студенты. Ацы аз Хуссар Ирыстоны скъолатæ каст фесты 489 рауагъдоны. Уæрæсейы уæлдæр ахуыргæнæндæттæм уыдонæй ахуырмæ бацыд 144 абитуриенты.

Нæхи университеты боны хайадмæ ахуырмæ чи цæуынц, уыдонæн ис фадат равзарын ахæм факультеттæ: биологи æмæ хими, журналистикæ, фæсарæйнаг æвзæгтæ, истори, математикæ æмæ информатикæ, ирон æвзаг æмæ литературæ, уырыссаг æвзаг æмæ литературæ, педагогикæ æмæ райдиан ахуырады методикæ, психологи, сæудæджерадон æмæ æмбæстагон арæзтад, экономикæ æмæ юриспруденци.

Фæсаууонмæ хайады та ис равзарæн ахæм дæсныйæдтæ: биологи, скъолайы агъоммæ педагогикæ æмæ психологи, ирон æвзаг æмæ литературæ, физикон культурæ, педагогикæ æмæ райдиан ахуырады методикæ.

Фидгæ бындурыл ахуыр кæндзысты паддзахадон муниципалон управленийы фæсаууонмæ хайадтæ, финанстæ æмæ кредиттæ, истори, æхсæнадæмон ахастытæ, автомобилтæ æмæ автомобилон хæдзарад, сæудæджерадон æмæ æмбæстагон арæзтад, формаци, юриспруденци æмæ психологи.

Равзаргæ дæсныйадмæ нæ кæсгæйæ, абитуриенттæ иууылдæр хъуамæ радтой бахыгъд (зачет) ирон æвзагæй.

Иттæг хорз нысæнттимæ скъола каст чи фесты, уыдон ратдзысты æрмæстдæр иу фæлварæн.

Документтæ исдзысты 15 июлмæ. Фидгæ бындурыл фæсаууонмæ хайадмæ та – 20 июлмæ.

Паддзахадон университеты исæн къамисы бæрнон секретарь Намшуридзе Генриетта куыд загъта, афтæмæй абитуриенттæ иууыл хуыздæр цæуынц ахæм факультеттæм, куыд экономикæ, юриспруденци, сæудæджерадон æмæ æмбæстагон арæзтад, фæсарæйнаг æвзæгтæ æмæ журналистикæмæ.

Исæн къамисы бæрнон секретарь йæ катайдзинад равдыста, педагогон фæдыздæхтимæ цы дæсныйæдтæ ис, уырдæм бæрæг къаддæр абитуриенттæ кæй цæуы.

Факультеттæй исæн фæлварæнтæ 16 июлы иууыл раздæр райдайдзысты журналистикæйы факультетмæ. Ардæм цы абитуриенттæ балæвæрдтой куырдиæттæ, уыдон ныффысдзысты сфæлдыстадон сочиненитæ æмæ стæй уый бындурыл уагъд цæудзысты иннæ фæлварæнтæм дæр.

Уазæгты М.

Comments are closed, but trackbacks and pingbacks are open.