2008 азы августы цаутæй дæс азы рацæуыны фæстæ дунеон информацион фæрæзтæ ногæй стыр цымыдис кæнынц Хуссар Ирыстонмæ, йæ хъысмæтмæ, куыд æндидзы уæды хæстон æрбабырсты фæстæ уымæ. Цымыдис кæнынц куыд уæрæсейаг егъау агентадтæ РосБизнесКонсалтинг æмæ НТВ, афтæ ныгуылæйнаг егъау информацион фæрæз Би-Би-Си-йы уырыссаг службæ, францаг æмæ немыцаг информацион фæрæзтæ. Уый тыххæй дзырдта дунеон информацион агентад Спутникы пресс-центры Хуссар Ирыстоны Информаци æмæ мыхуыры паддзахадон комитеты сæрдар Хъотайты Мария.
2008 азы августы нæ бæстæйы ныхмæ Гуырдзыстоны агрессийы райдианыл æмæ Уæрæсейы Федераци Хуссар Ирыстоны паддзахадон хæдбардзинад куы банымадта, ууыл дæс азы сæххæсты цытæн уагъд цæудзæн егъау, гуырахстджын мысæн æмæ бæрæгбонон мадзæлттæ. Хъотайты Марияйы ныхæстæм гæсгæ дунейы информацион фæрæзты минæвæрттæ стыр цымыдис кæй равдыстой ныртæккæ нæ бæстæйы хъысмæтмæ, уый дзурæг у нæ бæстæйы популярондзинадыл.
Журналисттæн, зæгъгæ, цымыдис кæнынц, республикæ фæсхæст куыд фæивта, арæзт дзы цы æрцыд, уыдæттæм. Бирæты цымыдис кæны, арæнгæрон районты гуырдзиæгтæ æмæ ирæттæ куыд цæрынц, уымæ.
Информаци æмæ мыхуыры паддзахадон комитетмæ дунеон информацион фæрæзтæй куырдиæттæ цæуы нæ республикæмæ æрцæуыны тыххæй. Фæлæ фæсарæйнаг журналисттæн аккредитаци радтын комитеты æххæсттæм нæ хауы, визæтæ радтыныл кусынц фæсарæйнаг хъуыддæгты фæдыл министрад æмæ Паддзахадон æдасдзинады комитеты арæнгæрон службæ.
Хуссар Ирыстоны кусынц уæрæсейаг «Российская газета»-йы уацхæсджытæ, уыдонæн республикæйы территорийыл кусынæн ницы цæлхдуртæ ис. Уыдон æрмæг бацæттæ кодтой, ног хирургион комплексы цæгатирыстойнаг хирургы хайадистæй цы онкологон операци конд æрцыд, уый фæдыл.
Æввахс рæстæджы та нæм æрцæудзысты телеканал НТВ-йы исæн къорд.
«Фæсарæйнаг информацион фæрæзты минæвæрттæ информацион комитетмæ фыстæджы хуызы сæ домындзинад куыд æвдисынц, уый бирæбæрцæй дзурæг у сæ фæндæттыл.
Мах хорз хъуыды кæнæм, 2008 азы хæстон цаутæ куыд æвдыстой ныгуылæйнаг бæстæты журналисттæ æмæ нæ нæ фæнды æмæ мадзæлттæ ныр уæлæнгай зæрдæйæ æвдыст цæуой»,- банысан кодта Мария.
Уый ма куыд загъта, афтæмæй сæ фæнды æппæт журналистты дæр райсын, цæмæй ахæм хъуыды ма сæвзæра, ома, Хуссар Ирыстон æхгæд концлагерь у. Дунеон информацион фæрæзты минæвæртты фæнды комкоммæ эфиртæ аразын, бæстæйы сæргълæууæгæй интервьютæ райсын. Æппæт уыцы процедурæтæ æмразы цæудзысты бæрнон органтимæ.
Къæбулты Маринæ
Comments are closed, but trackbacks and pingbacks are open.