11-æм апрелы Уанеты Захары номыл Хуссар Ирыстоны зонад-иртасæн институты уыд хыгъдон конференци. Институты æндæр æмæ æндæр хайæдты ахуыргæндтæ сæ бакæнгæ куыстыты фæдыл сарæзтой докладтæ. Ардæм æрбацыдысты æмæ дзы хайад райстой зонадон кусджытæ æмæ студенттæ.
Хыгъдон конференци бацæуæн ныхасæй байгом кодта зонад-иртасæн институты директор, историон зонæдты кандидат Гаглойты Роберт. Уый загъта, зæгъгæ, конференцийæн ис традицион характер. «Зонад-иртасæн институты ахуыргæндтæм сæ зонадон æмæ иртасæн куыстыты фæстæ æмбæлы хыгъд радтын. Уый хауы куыд сæ архайдмæ, афтæ планон куыстытæм дæр. Уымæ гæсгæ мах абон байхъусдзыстæм цалдæр докладмæ», – загъта институты директор.
Конференцимæ хаст æрцыдис æхсæз доклады. Институты алкæцы хайадæй дæр иу зонадон кусæг бацæттæ кодта æмæ сарæзта доклад. Уыдон уыдысты ахæм темæтыл: «Змееборческие сюжеты в искусстве кобанцев, скифов и осетин» – (историон зонæдты кандидат, рагон истори æмæ археологийы хайады хистæр зонадон кусæг Джиоты З. А.), «Научное изучение репрессий (1937-1938гг) в Южной Осетии и их художественное осмысление в творчестве Хсара Гассиева», (философон зонæдты кандидат, ног æмæ ногдæр историйы хайады хистæр зонадон кусæг Гасситы М. А.), «Концепт как эмоционально-оценочное средство», (ирон æвзаджы хайады зонадон кусæг Тъехты А. Г.), Проза Скифирона» – (ирон литературæйы историйы хайады зонадон кусæг Квагинидзе Ж. Э.), «Об одном отголоске эпохи великого переселения народов в европейской геральдике» – (этнологийы хайады зонадон кусæг Коцты К. К.), «Трансформация экономических систем: методология, теория, ретропрактика» – (экономикон зонæдты кандидат, экономикæ æмæ социалон иртасынæдты хайады хистæр зонадон кусæг Джиоты И. К.).
Конференцийы кæрон докладгæнджытæ дзуаппытæ радтой, конференцийы фæлгæтты сæм цы фарстытæ лæвæрд цыдис, æппæт уыдонæн. Уый фæстæ институты директор Гаглойты Роберт банысан кодта, зæгъгæ, фæнд кæнынц зонад-иртасæн институты конференциты цы докладтæ саразынц, уыдон хицæн æмбырдгæндтæй рауадзын.
Нæ уацх.
