Ахсджиаг æмæ скъуыддзаггæнинаг фарст

   Нӕ республикӕ аграрон зонæйыл нымад цӕуы, йӕ мӕры скондмӕ гӕсгӕ дзы хицӕн бынӕтты хорз зайы ӕфсирон ӕмӕ нӕмыгон культурӕтӕ, дыргъ, цӕхӕрадоны халсæрттæ, картоф ӕмӕ ӕндӕр культурæтæ. Советон дуджы иу гӕппӕл дӕр ӕгуыстӕй нӕ зад ӕмӕ уый та хорзӕрдӕм ӕндӕвта хъӕууон цӕрӕджы фӕрныгадыл. Фӕлӕ уавӕр цӕхгӕр фæивта дуджы фæивдимæ. Раууатмæ æрцыд хъӕууон хӕдзарад, йӕ кусӕн техникӕ паплой ӕрцыд. Дзырд дардыл у, фӕлӕ абоны бонмӕ нырма хъӕууон хӕдзарад размӕ не ‘ггуырсы ӕмӕ уымӕн та йӕ сӕйраг аххосаг у, хъӕууон-хӕдзарадон техникӕ фаг кӕй нӕй, уый. Цӕвиттонӕн фаг у, нӕ республикӕйы ӕрмӕст тыллӕгӕфснайӕн комбайнтӕ 9 йедтӕмӕ кӕй не сты. Уыдон сты хӕрз цъус ӕмӕ уымӕ гӕсгӕ нӕ фаг кӕнынц сезонон куыстытӕ рӕстӕгыл ӕххӕст кӕнынӕн. Куыддӕр хуымгӕрдӕн ӕрбалӕууыд, афтӕ Ленингоры районы хӕдзарадтӕм ӕрвыст ӕрцыд 4 комбайны, сӕ иннӕ хай та сты Знауыры районы хӕдзарадты. Ӕрмӕст Цхинвалы районӕн уыдонӕй радих кодтой иу комбайн ӕмӕ уый та цасы фаг хъуамӕ суа. Зындгонд куыд у, афтӕмӕй махмӕ ӕфсирон культурӕтӕ кæрдынæн сбӕззынц уыцы иурӕстӕг. Иутӕ сӕ тыллӕг ӕфснайгӕ куы фӕкӕнынц, уӕд иннӕ хӕдзарадты хуымтӕ та ӕнхъӕлмӕ фӕкӕсынц сӕ хицаумӕ, кӕд сӕ бабӕстон кӕндзӕн, уымӕ. Фӕлӕ йӕ къухы рæстæгыл нӕ вæййы  хъӕуӕг техникӕ ӕмӕ йӕ афӕдзы фыдӕбоны иу хай фесӕфы, кӕй фӕиппӕрд вӕййы, уый аххосӕй. Зӕгъӕм, абоны онг иу гӕппӕл дӕр карст нӕй Къостайыхъӕуы Цхуырбаты Лев, Джиоты Ацӕмӕз, Хуыбиаты Азӕмӕт, Батрадз ӕмӕ ӕндӕрты ӕфсирон культурӕтӕй. Афтӕмӕй рӕстӕг та ӕнхъӕлмӕ нӕ кӕсы, кӕм мӕгуырау боныгъӕд фӕкӕны, куы та хур бӕстыл атулы ӕмӕ  ӕфсирӕн йӕ уӕлӕ ницыуал баззайдзӕн. Зӕхкусӕг та тыхсы, хъуыды кӕны, абон йӕ куыстӕй нӕ барухс йӕ зӕрдӕ, уӕд ма фидӕн аз цы зӕрдӕйӕ балӕудзӕн йӕ быдырты уӕлхъус. Тӕссаг у, нӕ хуымзӕххытӕм йӕ чъылдым куы фездаха ӕмӕ сӕ куынӕ уал кусой. Ацы фарст ахъуыдыйаг у ӕмӕ йӕм рӕстӕгыл хъуамӕ йӕ хъус ӕрдара Хъӕууон хӕдзарады министрад, гӕнӕн уӕвгӕйӕ, хъæуы фӕфылдӕр кӕнын  тыллӕгӕфснайӕн комбайнты нымӕц.

          Хуыбиаты Никъала