Республикæ Хуссар Ирыстоны Культурæйы министрад радон хатт бацæттæ кодта цымыдисон программæ августы мæйæн. Ацы мæйы нæ республикæйы кæддæриддæр æрæмысынц 2008-æм азы хæсты трагедион бонтæ, ныр дæр та горæты уагъд цæудзысты мысæн мадзæлттæ. Фæлæ уымæй уæлдай цæрджытæн уагъд цæудзысты æндæр æмæ æндæр культурон мадзæлттæ, уыдон нымæцы нæ республикæйы хæдбардзинад банымайыны боны цытæн дæр.
РХИ-йы Культурæйы министрады пресс-секретарь Хуыгаты Аланæ нын куыд фехъусын кодта, афтæмæй программæмæ гæсгæ 7-æм августы изæры 18:00 сахатыл паддзахадон драмон театры сценæйыл æвдыст цæудзæнис спектакль «Фæстаг æвдисæн», кæцы дзурæг у ирон адæмы ивгъуыд æнусы 20-æм азы геноцидыл. 8-æм августы та боны 14:00 сахатыл нæ горæты Анахарсисы номыл национ библиотекæйы кæсæн залы уыдзæн литературон-поэтикон изæр «Пять дней ада», зæгъгæ, ахæм номимæ. Ам мадзаламонджытæ æрæмысдзысты 2008 азы хæсты уæззау бонтæ. 12-æм августы изæры 18:30 сахатыл паддзахадон драмон театры сценæйыл æвдыст цæудзæнис комедион спектакль «Файнустытæ», кæцыйы æвæрæг режиссер у Хъотайты Сæрмæт. 15-æм августы та изæры 18:30 сахатыл нæ театры сценæйыл хуссарирыстойнаг театрдзауты рæгъмæ радон хатт рахæсдзысты Джелыты Хъазбегы æвæрд спектакль «Сау нымæт». 17-æм августы бакæсæн уыдзæн Дзуццаты Тамерланы æвæрд комеди «Сæтти æмæ Бæтти»-мæ. 18-æм августы изæры 18:00 сахатыл театры сценæйыл концерт равдисдзæн Галаты Барисы номыл кафт æмæ зарды падзахадон ансамбль «Симд». 24-æм августы изæры 18:00 сахатыл та «Симд» æмæ Абхазы республикæйы Кафт æмæ зарды паддзахадон ансамбль «Кавказ»-æн уыдзæнис иумæйаг концерт «Танец дружбы», зæгъгæ, ахæм номимæ. 25-æм августы боны 16:00 сахатыл Къостайы цырты раз уыдзæн фоторавдыст «Цхинвал до и после 2008», «Ровесники признания». Уыцы бон ма изæрæй 18:00 сахатыл нæ театры сценæйыл Цæцæны республикæйы адæмон зарджыты ансамбль «Нур-Жовхар» æмæ нæ республикæйы адæмон инструментты паддзахадон ансамбль «Айзæлд» иумæ равдисдзысты концерт. 29-æм августы та изæры 18:30 сахатыл æвдыст цæудзæн режиссер Роман Габриайы премьерон спектакль «Ревизор». Ацы спектакль ногæй равдисдзысты дыккаг бон дæр. 31-æм августы изæрæй 18:30 сахатыл театрдзаутæн фадат уыдзæнис комеди «Æз ус нæ курын»-мæ бакæсын.
