АРФÆТÆ

Зынаргъ хæлæрттæ!

Мах лæууæм 2022 азы къæсæрыл. Ныридæгæн нæ хæдзæрттæм æрцыд бæрæгбон, æмæ мах уæлтæмæны æнкъарæнтимæ æнхъæлмæ кæсæм Ног азы æрбалæудмæ, плæнттæ кæнæм  æмæ бæллицтæ нывæндæм.

Фыццаграды мах плæнттæ кæнæм, нæ бинонтæ æмæ æввахс адæмы фидæны тыххæй. Æмæ иууылдæр иумæ бæллæм нæ Ирыстоны ног æнтыстытæ æмæ дидинæфтыдмæ.

Мах нæ Райгуырæн бæстæ нæ дих кæнæм, нæ къуыхцытæ дæр æмæ нын не ‘нтыстытæ дæр иумæйаг кæй сты, уый æмбаргæйæ, афтæ ма нын иумæйаг сты нæ традицитæ, нæ дин æмæ æнусон æргъадты æнæфæивгæдзинад.

Ног азыл æмбæлын – уый у бинонты уарзон бæрæгбон, циндзинад, кæцы нæ æмбырд кæны бæрæгбоны фынгыл не ‘ввахс адæмимæ, цæмæй иумæ афæндараст кæнæм ацæугæ аз æмæ дуæрттæ уæрæх байгом кæнæм ног азимæ фембæлыны тыххæй.

Ног азы æмбæлццон хъуамæ уа диссæгтæ æмæ зæрдæхæлардзинады атмосферæ. Æмæ уыцы атмосферæ мах хъуамæ саразæм нæхæдæг – æввахс адæммæ ахасты, лæвæрттæ æмæ æнæнхъæлæджы хорзракæндтæй, хæдзары аивдзинад æмæ  хорз ахастæй, рæвдыд ныхас æмæ бинонты традицитæй.

Тагъд æрбалæудзæн Ног аз æмæ сымахæй алкæмæн дæр мæ зæрдæ зæгъы уарзондзинад æмæ амонд! Æмæ уадз сæххæст уæнт нæ иууыл рæсугъддæр бæллицтæ!

 

Республикæ Хуссар Ирыстоны Президент

 БИБЫЛТЫ Анатоли

 

***

 

Зынаргъ æмзæххонтæ!

Æрбалæууы ног, 2022 аз – ныфсыты, зæрдæбын фæндиæгты бæрæгбон æмæ фидæн хуыздæрыл æууæндын.

Ацæугæ аз не ‘ппæтæн дæр хуымæтæджы аз нæ уыд. Мах дæр, куыд æнæхъæн бæстæ, æнæхъæн дуне, тох кодтам, бирæ фыдæвзарæнтæ нын чи бавзарын кодта, уыцы ног коронавирусы ныхмæ, кæцы ивындзинæдтæ бахаста нæ царды алы къабазмæ дæр. Фæлæ мах уыдыстæм кæрæдзийы фарсмæ, кæрæдзийы рыст истам, кæрæдзийы æнцой лæууыдыстæм. Алчи дæр нæ йæхи бынаты арæзта, цы йæм хауд, уый, цæмæй аккагæй скъуыддзаг кодтаиккам нæ проблемæтæ. Мах бирæ æмæ ахадæн куыст бакодтам. Нæ адæм ногæй фенын кодтой, бахъуаджы рæстæджы нæ бон кæй у кæрæдзийы фарсмæ балæууын, цæсгомджынæй кусын иумæйаг фæрныгадæн. Æмæ нын уый дæтты фидар ныфс, нырæй фæстæмæ дæр кæй уæлахиз кæндзыстæм дуджы цыфæнды фæлварæнтыл дæр.

Мæхирдыгæй фарс дзырд дæттын, æрбалæугæ азы дæр афтæ активон æмæ бæрнонæй кæй скъуыддзаг кæндзыстæм социалон-экономикон потенциал, æнæниздзинад хъахъхъæныны системæ, ахуырад, культурæ  æмæ спорты рæзтимæ баст хæстæ. Ирыстоны алы цæрæджы интерестæ æмæ алы бинонты фæрныгад бæрзонддæр кæнын кæддæриддæр уыдысты æмæ уыдзысты хицауиуæгады органты сæйраг хæс.

Зынаргъ хæлæрттæ. Зæрдæбынæй мæ фæнды, цæмæй æппæт зындзинæдтæ дæр баззайой ивгъуыды æмæ уын ног, 2022 аз æрхæсса бирæ циндзинæдтæ, амонд, балæвар уын кæна цард æмæ куысты ног фадæттæ, фидар æнæниздзинад æмæ оптимизм! Мæ зæрдæ уын зæгъы сабырад, æнтыстытæ æмæ дидинæфтыд!

 

Республикæ Цæгат Ирыстон-Аланийы

 Сæргълæууæг Сергей МЕНЯЙЛО