Уӕлахиз уӕд рӕстдзинад! Уӕлахиз уӕд Донбасс! Уӕлахиз уӕд Путин! Ахӕм уӕлтӕмӕны зӕгъинӕгтӕ хӕлбурцъ кӕнынц ныртӕккӕ милуангай рӕстаг хъуыдыйыл хӕст адӕмты зӕрдӕты. Кӕрон ӕрцыд Донбассы цӕрӕг адӕмы авдазон хъизӕмарӕн – стыр Уӕрӕсе банымадта Донецкы Адӕмон Республикӕ ӕмӕ Луганскы Адӕмон Республикӕйы хӕдбардзинад.
О, Уӕрӕсе. Фӕлӕ, ӕнӕдызӕрдыгӕй, нӕ бон зӕгъын у, афтӕ бакӕнын та йӕ ныфс нӕ бахастаид Путины размӕйы Уӕрӕсе, Хуссар Ирыстон ӕмӕ Абхазы хӕдбардзинад банымайынмӕ куыднӕ хаста йӕ ныфс, афтӕ. Уый фӕрцы у абон Уӕрӕсе дзырдхъом паддзахад, йӕ ныхас зӕгъынхъом, рӕстдзинады сӕрвӕлтау бӕрндзинад райсынхъом. Путины фӕрцы ма слӕууыд йӕ къахыл, йӕ зонгуытыл кӕй ӕрлӕууын кодтой, уыцы кӕддӕры хъомысджын Уӕрӕсе, уый ӕрлӕууыд ӕрмӕстдӕр Америкӕ ӕмӕ Ныгуылӕны бӕстӕты ӕгъатыр политикон терроры ныхмӕ. Ацы рӕстаг уынаффӕ райсынмӕ, ӕвӕццӕгӕн, Донбассы цӕрджытӕй къаддӕр ӕнӕрхъӕцдзинадимӕ не ‘нхъӕлмӕ кастысты Республикӕ Хуссар Ирыстоны цӕрӕг адӕм дӕр, уымӕн ӕмӕ йӕ нӕхиуыл бавзӕрстам, хӕдбардзинады банымад куыд стыр амонд у, уый. Куыддӕр Владимир Путин йӕ рахӕсгӕ уынаффӕ фехъусын кодта, афтӕ ацы ахсджиаг цауӕн комментаритӕ скодта нӕ республикӕйы Президент Бибылты Анатоли: «Уӕрӕсейы Федераци Донецкы Адӕмон Республикӕ ӕмӕ Луганскы Адӕмон республикӕйы хӕдбардзинад кӕй банымадта, уый у, кӕмӕ ӕнхъӕлмӕ кастыстӕм, бындур кӕмӕн уыд, ахӕм ахъуыдыгонд уынаффӕ.
Украинӕйы территориалон ӕнӕхъӕндзинадӕн кӕрон скодта Киеваг режим, Донбассы цӕрӕг адӕммӕ ахасты ӕгъатыр террор кӕй райтынг кодта, уымӕй. Уӕрӕсе фенын кодта диссаджы хиуылхӕцынад, уымӕй Киеваг къухдариуӕггӕнджытӕн ахъуыды кӕныны фадат ратгӕйӕ, Минскаг баныхӕсты бындурыл националон кӕрӕдзиӕмбарынады курс равзаргӕйӕ ӕрвонг зонд кӕй фӕуӕлахиз уыдзӕн, ууыл ӕууӕндгӕйӕ.
Баныхӕсты фынгыл ӕрбадыны бӕсты Донбасс йӕхиуыл бавзӕрста геноциды фӕлгӕтты ӕнӕадӕймагондзинады ног акттӕ. Бӕрӕг уыд, цыфӕнды баныхӕстӕ дӕр Киевы хъуыдысты ӕрмӕстдӕр уый тыххӕй, цӕмӕй рӕстӕг рамбула. Уыйразмӕйы райсгӕ уроктӕ ӕнӕхъуаджы фесты, Киев аскъуыддзаг кодта ногӕй тыхон мадзӕлттӕй спайда кӕнын, уымӕй уӕлдай бацархайдта ядерон тасдзинадӕй ӕртхъирӕнтӕ кӕнынмӕ рахизыныл. Уый у Киеваг къухдариуӕгады ӕнӕсӕрфатдзинады ӕвдисӕн, уый у хиуылхӕцындзинады рохтӕ кӕронмӕ атоныныл дзурӕг, ӕмӕ ӕнӕ райсгӕ нал уыд, чи хъуыд ахӕм уынаффӕйӕн, ӕмӕ уыцы уынаффӕ ист ӕрцыд.
Республикӕ Хуссар Ирыстон, 2014 азӕй фӕстӕмӕ, Донецкы Адӕмон Республикӕ ӕмӕ Луганскы Адӕмон Республикӕйы хӕдбардзинад банымайгӕйӕ ӕххӕстбӕрцӕй хӕцы Донбассы республикӕты банымайыны фӕдыл Уӕрӕсейы райсгӕ уынаффӕйы фарс. Уыцы уынаффӕ у ӕфсымӕрмарӕн ӕнӕсӕрфат хӕст бауромыны бындур, уый у мингай адӕймӕгты цард бахъахъхъӕныны, уый у Украинӕйӕн фадат радтӕг, цӕмӕй ӕрыздӕха нормалон цардмӕ ӕмӕ хъуыды кӕнын райдайа йӕ фидӕныл.
Донбассы банымад нысан кӕны милуангай адӕймӕгтӕн хуыздӕр фидӕныл ӕууӕндындзинад. Растӕндӕр афтӕ, Уӕрӕсейы ‘рдыгӕй хӕдбардзинад банымайын ныр 13 азы дӕргъы сабырдзинад ифтонг кӕны Республикӕ Хуссар Ирыстоны зӕххыл».
Кӕй зӕгъын ӕй хъӕуы, Украинӕйы уавӕр барӕй чи карздӕр кодта ӕмӕ Уӕрӕсейы Федерацийы къухдариуӕгады фӕндвидар архайд карды рӕхуыстау кӕмӕн уыд, уыцы Америкӕйы Иугонд Штаттӕ ӕмӕ Ныгуылӕны бӕстӕты разамонджыты реакцимӕ бирӕ ӕнхъӕлмӕ кӕсын нӕ бахъуыд. Уайтагъд равдыстой се ‘нæразыдзинад ӕрцӕугӕ историон цаумӕ, банымадтой йӕ Уӕрӕсейы ‘рдыгӕй радон агрессийыл. Æмӕ та фенын кодтой политикон культурӕ ӕмӕ хиуылхӕцындзинад нӕ, фӕлӕ политикон ӕнӕсӕрфатдзинад ӕмӕ лӕмӕгъдзинад. Уӕдӕ ӕндӕр цахӕм аргъ хъуамӕ скӕнӕм Джо Байдены уынаффӕйӕн – туг ӕмӕ цӕссыджы амӕхст адӕмӕн, баххуыс кӕныны бӕсты, санкцитӕ чи расидт… Цы у уый, цы нысан кӕны? Политикон тӕппуддзинад ӕмӕ адӕймагон лӕмӕгъдзинад. Æндӕр ницы. Æниу уыцы санкцитӕй, куыд фӕзӕгъынц, Донбассы цӕрджытӕн нӕ дӕр уазал уыдзӕн, нӕ дӕр тæвд, уымӕн ӕмӕ сын Америкӕимӕ бынтондӕр ницы политикон ӕмӕ экономикон бастдзинӕдтӕ ис. Ныр йӕ риуыдзаг сулӕфдзӕн хӕстарыд Донбасс, уый фадат ын радта ӕфсымӕрон Уӕрӕсе, йӕ хъомысджын Президент Владимир Путины фӕрнджын къухӕй.
Comments are closed, but trackbacks and pingbacks are open.