23-æм марты нæ горæты 6-æм астæуккаг скъолайы актон зал йедзаг уыд цытджын уазджытæй. Уырдæм уыйбæрц адæм æрбамбырд æмæ дзы сæрибар бынат нал уыд. Скъолайы уагъд æрцыд мадзал «Я в Болдине писал, как давно уже не писал», зæгъгæ, кæцы баст уыд зынгæ уырыссаг фыссæг Александр Пушкины зынгæ Болдинаг фæззæджы 190 азы юбилеимæ, афтæ ма поэзийы бонимæ дæр. Мадзалмæ æрбацыдысты РХИ-йы Уæрæейы æххæстбарджын минæвар Марат Кулахметов, Россотрудничествойы æмæ РХИ-йы Ахуырад æмæ зонады министрады минæвæрттæ, ХИПУ-йы ахуыргæнджытæ Остъаты Джульеттæ, Джиоты Циалæ, Тедеты Зæлинæ æмæ æндæртæ, Сывæллæтты сфæлдыстады галуаны кусджытæ Джиоты Арянæйы æмæ скъолайы ахуыргæнджытæ Бедойты Элеонорæйы сæргълæудæй.
Мадзал сорганизаци кодта уырыссаг æвзаг æмæ литературæйы ахуыргæнджытæ ахуырадон уагдоны цур уæвæг «Русский мир»-ы кабинеты æххуысæй, кæцыйы сæргълæууæг у Инна Зубко æмæ уагдоны къухдариуæгады фарсхæцынадæй. Хайад дзы райстой 2-11 кълæсты ахуыргæнинæгтæ. Мадзал амыдта Свиткова Диана.
«Ацы аз мах нысан кæнæм диссаджы пушкинаг цау – 1830 азы зынгæ Болдинаг фæззæджы 190 азы юбилей. 190 азы размæ А.Пушкин æрцыд Болдиномæ йæ фыды зæхмулкмæ (имение), цыран иунæгæй æмæ удцырынæй арвыста æртæ даргъ фæззыгон мæйы, кæцытæ уырыссаг лите-ратурæйы историмæ бацыдысты «Болдинская осень»-ы номимæ æмæ систы æнахуыр æнтыстджын литературон куысты символ. 1830 азы ацы æртæ фæззыгон мæйы æрæмбырд кодта æнахуыр литературон тыллæг: кæронмæ фыст фæцис йæ роман «Евгений Онегин», фæзындысты «Повести Белкина», «Маленькие трагедии», «Сказка о попе и о работнике его Балде», поэмæ «Домик в Коломне», диссаджы литературон-критикон статьятæ, «История села Горюхина», æртын æмдзæвгæйы-шедевртæ», – дзырдтой ахуыргæнинæгтæ. Пушкинæн ацы зæхмулк йæ фыд балæвар кодта Наталья Гончароваимæ чындзæх-сæвы размæ».
Ахуыргæнинæгтæ кастысты Пушкины фыст æмдзæвгæтæ. Уыцы рæстæджы-иу балы вальсæй райдыдта уарзондзинад æмæ мазуркæйæ та скъуыддзаг цыд хъысмæт. Скъоладзаутæ равдыстой Иогелы хæдзары балы инсценировкæ, кæцы сын рауд тынг рæсугъд. Чызджытæ уæды рæстæджы даргъ къабаты æмæ лæппутæ та костюмты, афтæмæй рæвдз зылдысты вальс кафгæйæ. Чызджытæй сæ иу вальс акафынмæ фæхуыдта Хуссар Ирыстоны УФ-йы минæвар Марат Кулахметовы æмæ уый дæр йæ фæндыл сразы. Æрæмбырдуæджытæ сын кодтой тыхджын къухæмдзæгъд. 1928 азы ахæм балы Пушкин фембæлд æвзонг рæсугъд чызг Наталья Гончароваимæ. Поэты дисы баппæрста йæ рæсугъдддзинад. Пушкины æмæ Гончаровайы ролты тынг хорз ахъазыдысты 7-æм в къласы ахуырдзаутæ Бесаты Михаил æмæ Гаглойты Вероникæ.
Ахуырдзаутæ равдыстой инсцениров-кæтæ Пушкины уацау «Барышня-крестьянка», «Евгений Онегины» скъуыддзæгтæй. Тынг цымыдисон рауад Пушкины аргъау «Сказа о рыбаке и рыбке»-йæ инсценировкæ. Сывæллæттæ афтæ хорз ахъазыдысты сæ ролтæ раст цыма æцæг актертæ уыдысты. Адæймаг аныгъуылд Пушкин куы цард, уыцы рæстæджы. Скъоладзаутæ сæххæст кодтой зарджытæ Пушкины фыст æмдзæвгæтыл. Ахуырдзау Гуыбеты Виктория та тынг хорз азарыд поэты дыууæ романсы.
Мадзалы кæрон 9-æм «а» къласы ахуырдзау Гæбæраты Лизæ аив бакаст ирон æвзагмæ Нафийы тæлмацæй Пушкины æм-дзæвгæ «Памятник». Ацы номыр мадзалы барæсугъд кодта уæлдай тынгдæр.
Уый фæстæ мадзалы оранизатортæ æмæ йæ хайадисджытæн арфæйы ныхæстæ загътой уазджытæ дæр. «Æвзонг артисттæ равдыстой сæ курдиат. Тынг æхсызгон мын у æрвылаз дæр уагъд кæй æрцæуынц алыгъуызон мадзæлттæ. Стыр бузныг скъолайы коллективæн», – загъта Марат Кулахметов.
«Æрвылхатт дæр æмæ алы бон дæр æз дзурын нæ сывæллæттæ тынг курдиатджын кæй сты, уый. Мадзалы рæстæджы мах ногæй бакастыстæм Пушкины поэзи, нæ зæрдыл æрлæууын кодтам зынгæ поэты хъæздыг сфæлдыстад. Абон Пушкины æмдзæвгæтæ чи бакаст, уыцы скъоладзаутæ сæ цæрæнбонтæм бахъуыды кæндзысты», – банысан кодта 1-æм скъолайы директор Гобозты Русудан.
Хуссар Ирыстоны уырыссаг æвзаг æмæ литературæйы ахуыргæнджыты ассоциацийы президент Тедеты Залинæ дæр бузныджы ныхæстæ загъта мадзалы организатортæ æмæ йæ хайадисджытæн ахæм диссаджы мадзал кæй сорганизаци кодтой, уый тыххæй: «Абон нын сымах сарæзтат поэзийы диссаджы бон, Пушкины бæрæгбон. Сымах нын бауырнын кодтат, мах Пушкины фæдонтæ кæй стæм, уый. Балæвар нын кодтат циндзинад. 6-æм июны Пушкины цырты цур мадзалы хъуамæ хайад райсой ацы мадзалы хайадисджытæ æмæ ралæууой сæ абоны номыртимæ».
Æрхонгæ уазджытæн бузныджы ныхæстæ загъта 6-æм астæуккаг скъолайы директор Бедойты Элеонорæ рæстæг кæй ссардтой æмæ сын сæ хъомылгæнинæгты арæхстдзинадмæ кæй бакастысты, уый тыххæй.
«Бузныг зæгъын мадзалы хайадисджытæн иууылдæр. Уæлдай арфæйы ныхæстæ та мæ зæгъын фæнды скъолайы директор Элеонора Христофоры чызгæн мадзал сорганизаци кæнын æмæ йæ ауадзыны фæдыл йæ алыварсон æххуысы тыххæй. Тынг нын фæахъаз сты йæ реко-мендацитæ дæр», – банысан кодта мадзалы организатортæй сæ иу Свиткова Диана.
Банысан кæнын хъæуы уый дæр, æмæ скъолайы актон залы къултыл конд кæй уыдысты Пушкин æмæ Гончаровайы портреттæ, афтæ ма балы рæстæджы вальс кафгæйæ Пушкин æмæ иннæ хайадисджыты стыр ныв. Экраныл æвдыст цыдысты Пушкины цард æмæ сфæлдыстадимæ баст нывтæ æмæ кадртæ.
Пушкинаг бал фæцыд æрæмбырдуæвджыты зæрдæмæ, райстой дзы æхцондзинад æмæ райгондæй здæхтысты мадзалæй.
ДЖИОТЫ Екатеринæ
Comments are closed, but trackbacks and pingbacks are open.