Æхцондзинад балæвар кодта йæ комбæсты цæрджытæн

Чысангомæй рацæугæ Гуццаты Нодары ном хорз зындгонд у куыд Хуссары, афтæ Цæгат Ирыстоны дæр. Уый йæ диссаджы хъæлæс æмæ зардæй йæхи бауарзын кодта йæ радтæг адæмæн, æмткæй сценæмкæсджытæн. Нодар райгуырд æмæ схъомыл Ленингоры районы Дзукъаты хъæуы. Каст фæцис Цъинагары астæуккаг скъола. Нодарæн хæрзæвзонгæй фæбæрæг йæ курдиат музыкалон аивадмæ. Йæ концертты рæстæджы залы сæрибар бынат нæ вæййы æмæ йын сценæмæкæсджытæ фæкæнынц тыхджын къухæмдзæгъд.

Гуццаты Нодар ныртæккæ кæд Цæгат Ирыстоны цæры, уæддæр нæ рох кæны йæ райгуырæн комбæсты æмæ йын куыддæр фадат фæвæййы, афтæ йæ абæрæг кæны. Ныр дæр та уыд афтæ. 17-æм декабры изæрырдæм Ленингоры районы Цъинагары зонæйы  хъæутæ – Абреу, Дзукъаты хъæу, Цъинагар æмæ Гдулеты хъæуты цæрджытæ æмбырд кæнын райдыдтой Цъинагары Культурæйы хæдзармæ. Æрбамбырдуæвджытæ æнæрхъæцæй æнхъæлмæ кастысты сæ уарзон зарæггæнæгмæ.  Уалынмæ фæзындысты æрхонгæ цæгатирыстойнаг уазджытæ дæр, ансамбль «Ирис»-ы хайадисджытæ-зарæггæн-джытæ сæ сæргълæууæг Гуццаты Нодаримæ. Уыдон Чысангоммæ концертон программæимæ æрцыдысты РХИ-йы Президент Бибылты Анатолийы хъæппæрисæй. Ома, хъæуты цæрджытæн паддзахады сæргълæууæг концерты хуызы бакодта  ногазон лæвар.

Уазджытыл сæмбæлдысты Ленингоры районы администрацийы сæргълæууæджы хæдивæг Быценты Вадим, бынæттон хъæууон администрацийы сæргълæууæг Хуыбылты Маирбег. Концерт сорганизаци кæныны активон хайад райстой районы  администрацийы культурæйы хайады сæргълæууæг  Битарты Бессарион æмæ ацы хайады  кусджытæ Дзукъаты Артем, Елойты Нана æмæ Чъыбылты Эльзæ.

Хъæууон клубы сценæйыл ралæууыдысты Цæгат Ирыстон-Аланийы адæмон артист, РХИ-йы сгуыхт артист Дауыраты Эдуард, РЦИ-Аланийы адæмон артист Персаты Тамарæ æмæ æндæртæ. Ацы хатт дæр та семæ уыд негр лæппу Ричард. Артисттæ цы зарджытæ æххæст кодтой, уыдоныл сценæмæкæсджытæ æмбæлдысты тыхджын къухæмдзæгъдимæ. Ричард дæр ирон æвзагыл сæххæст кодта Ирыстоныл фыст зарæг. Гуццаты Нодар зарджытæ æххæст кæныны рæстæджы сценæмæ фæхуыдта райдиан кълæсты ахуыргæнинæгты æмæ сын хъæлдзæг рæстæг арвитын кодтой.

Уыцы бон Цъинагары ног сцалцæггонд Культурæйы хæдзармæ уыйбæрц адæм æрбамбырд æмæ дзы, æгæрыстæмæй, алкæмæн бынат дæр не сфаг.  Концертæй райгондæй баззадысты  комбæсты цæрджытæ æмæ хорз тæлмæнтимæ здæхтысты сæ хæдзæрттæм. Афтæ ма бузныгæй баззадысты  Президент Бибылты Анатолийæ, ахæм ногазон лæвар сын кæй бакодта, уый тыххæй. Артисттæ  дæр  райгондæй баззадысты сæ уазæгуарзон фысымтæй æмæ райзæрдæйæ здæхтысты фæстæмæ. Афтæ ма уыдон банысан кодтой, ног сцалцæггонд Культурæйы хæдзар раздæримæ абаргæйæ, йæ хуыз цæхгæр кæй фæивта, уый тыххæй дæр.

УАЛЫТЫ Зоя,

РХИ-йы Культурæйы сгуыхт кусæг