Нæ республикæйы иууыл ахсджиагдæр ног бæрæгбонтæй иу у Республикæ Хуссар Ирыстоны хæдбардзинад банымайыны бон. 2008 азы 26-æм август алы хуссарирыстойнаг цæрæгæн дæр ссис йæ иууыл уарзондæр бæрæгбон, уымæн æмæ уыцы бон сæххæст ирон адæмы цæрæнбонты бæллиц.

Куыд æрвылаз, афтæ та ныр дæр Ленингоры районы администрацийы кусджытæ сорганизаци кодтой бæрæгбонон мадзал. Бацæттæ йæ кодтой районы администрацийы культурæйы хайады хистæр Дудайты Динæ æмæ Культурæйы хæдзары директор Елхъанты Нуну. 26-æм августы Ленингоры районы Культурæйы хæдзармæ æрбамбырд бирæ адæм, уырдæм æрбацыдысты районы администрацийы кусджытæ Бараташвили Александры сæргълæудæй.

Цытджын мадзал бацæуæн ныхасæй байгом кодта æмæ доклад бакаст Елхъанты Нуну. Уый æрдзырдта ацы нысаниуæгджын бонмæ хуссарирыстойнаг адæм цы зын фæндагыл рацыдысты, уый тыххæй. Уый фæстæ та раныхас кодта ацы рæнхъыты автор Уалыты Зоя.

Цытджын мадзалы ныхасы рацыд Хуриты Гивийы номыл Цъинагары астæуккаг скъолайы директор Гуссойты Ласко. Уый лæмбынæг радзырдта ацы ахсджиаг бæрæгбоны тыххæй. «Бирæ азты дæргъы зындзинæдты сæрты хизгæйæ, æппынфæстагмæ стыр Уæрæсейы руаджы нæ къухты бафтыд цæмæ бæллыдыстæм уый – хæдбардзинад. Ныр аст азы цæрæм сабыр арвы бын. Ныр аст азы нæ сывæллæттæ нал сты тасы бын. Абон нæ республикæ рæзы, стыр къахдзæфтæй размæ цæуы æмæ махæй алчидæр хъуамæ тырна нæ ног паддзахады рæзтмæ йæ хайбавæрд бахæссынмæ. Хуыцау зæгъæд æмæ азæй-аз фылдæр цы кæна нæ республикæйы скъолаты ахуырдзауты нымæц», – банысан кодта уый.

Ленингоры районы администрацийы культурæйы хайад Дудайты Динæйы сæргълæудæй районы культурæйы фадыджы раззагон кусджытæн бакодтой зæрдылдарæн лæвæрттæ. Уый фæстæ райдыдта бæрæгбонон концерт. Районы культурæйы хæдзары сценæйæ райхъуыстысты ирон музыкæйы æхцон зæлтæ. Концерты хайад райстой Цъинагары хъæуы Культурæйы хæдзары хореографион къорд æмæ Ленингоры районы администрацийы культурæйы хайады хореографион къорды хайадисджытæ Гуссойты Ласко æмæ Зангурашвили Темурийы сæргълæудæй. Дыууæ хореографион къорд дæр сæххæст кодтой ирон дзыллон кафт «Симд», «Хонгæ кафт», «Чызджыты кафт» æмæ æндæртæ.

Банысан кæнын хъæуы уый дæр æмæ Ленингоры районы Культурæйы хæдзар ног сцалцæггонд кæй у, уымæй адæймаджы зæрдæ кæй рухс кодта, йæ уындæй радис сценæмæкæсæджы зæрдæ. Залы иу сæрибар бынат дæр нал баззад. Бæрæгбонон мадзалмæ фæуазæг РХИ-йы Культурæйы министрады минæвар Джиоты Костя. Уый йæ тæлмæнтæ нæ басусæг кодта бæрæгбонон мадзалы тыххæй æмæ йæ зæрдæмæ тынг кæй фæцыд, уымæ гæсгæ арфæйы ныхæстæ дзырдта йæ организатортæн.

 

УАЛЫТЫ Зоя,

Цъинагар

 

Comments are closed, but trackbacks and pingbacks are open.