Фæстаг рæстæджы хуссарирыстойнаг цæрджыты уавæртæ бæрæг фæхуыздæр сты. Афтæ кæй у, уый бæрæг у Республикæ Хуссар Ирыстоны сæйраг горæт Цхинвалы уынгты уындæй дæр. Кæд арæх æрцæуын мæ уарзон горæтмæ, уæддæр дзы мæ алы æрцыды рæстæджы дæр цыдæр хорз ногдзинад æнæ рахатгæ нæ фæвæййын.
Нæ республикæйы къухдариуæгад Президент Тыбылты Леониды сæргълæудæй æппæт тыхтæй дæр архайы сæ хæстæфхæрд адæмæн исты хорзы бацæуыныл, сæ царды уавæртæ сын фæхуыздæр кæныныл. Кæй зæгъын æй хъæуы, рох сæ нæу республикæйæ дæрддзæф Ленингоры район дæр. Ацы район бирæ рæстæджы гуырдзыйы дæлбар кæй уыд, уымæ гæсгæ алы къабазы дæр фæстæмæ алæууыд. Фæлæ, 2008 азы августы хæстæй фæстæ-мæ Ленингоры район ис Хуссар Ирыстоны къухдариуæгады дæлбар æмæ сын саразын бирæ бантыст, кæд дзы нырма аразинæгтæ бирæ ис, уæддæр. Кæй зæгъын æй хъæуы, раууатмæ æрцыд поселочы Культурæйы хæдзар дæр, арæзт æрцыд ивгъуыд æнусы 50-æм азты. Ленингоры районмæ йæ иу балцы рæстæджы Президент Тыбылты Леонид районы цæрджытæн баныфсæвæрдта ацы культурæйы уагдон сцалцæг кæнынæй æмæ йæ ныхасы хицау разынд.
Ленингоры районы Культурæйы хæдзар капиталон цалцæг æрцыд Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты. Ацы аз 6-æм апрелы Ленингоры поселочы Культурæйы хæдзар цытджын æгъдауæй йæ дуæрттæ куы бакодта, уæдæй фæстæмæ культурон уагдоны арæх уагъд фæцæуынц алыгъуызон бæрæгбонон мадзæлттæ. Бæстыхайы ис стыр зал, техникон хатæнтæ, гримгæнæнтæ æмæ æндæртæ. Сценæ ифтонг у нырыккон техникæ æмæ ифтонггæрзтæй. Иудзырдæй, Культурæйы хæдзары уындæй рухс кæнынц адæмы зæрдæтæ.
28-æм июны Ленингоры поселочы Культурæйы хæдзары уыд хыгъдон концерт ацы районы Цъинагары хъæуы Культурæйы хæдзары ансамбль «Арвырон» æмæ Ленингоры администрацийы культурæйы хайады ансамблы хайадистæй. Уыцы бон поселочы Культурæйы хæдзары иунæг афтид бынат дæр нал баззад. Уырдæм æрбамбырд бирæ адæм, куыд поселочы цæрджытæ, афтæ æввахс хъæуты цæрджытæ дæр. Хыгъдон концертмæ ма æрбацыдысты Ленингоры районы администрацийы кусджытæ дæр.
Цъинагары Культурæйы хæдзары ансамбль «Арвырон»-ы къухдариуæггæнæг у курдиатджын æвзонг адæймаг Гуссойты Ласко æмæ Ленингоры поселочы ансамблæн та — Заурашвили Таймураз. Дыууæ ансамблы архайджытæ дæр æвдыстой иттæг хорз цæттæдзинад. Сæ арæхстдзинадæй барухс кодтой æрæмбырдуæвджыты зæрдæтæ. Фæлæ уæддæр сценæмкæсджыты зæрдæмæ иууыл тынгдæр фæцыд Цъинагары Культурæйы хæдзары ансамблы хайадисæг, Хуриты Гивийы номыл Цъинагары астæуккаг скъолайы ахуыргæнинаг Хъайсынты Иринæ алы кафты размæ дæр æмдзæвгæтæ иттæг хорз æмæ аивæй кæй каст, уый. Сценæмæкæсджыты зæрдæмæ ма тынг фæцыд, цъинагайрæгтæ æртæ уæливых, бæгæныйы кæхц æмæ ирон тырысаимæ сценæмæ кæй рахызтысты, уый дæр.
Хыгъдон концерты кæрон æрæмбырдуæвджытæн раарфæ кодта Ленингоры районы администрацийы культурæйы хайады хистæр Дудайты Динæ. Уый ма бузныджы ныхæстæ загъта Президент Тыбылты Леониды адресыл дæр, сæ куыстæн сын ахæм хорз уавæртæ кæй сарæзта, уый тыххæй.
Уалыты Зоя, Цъинагар
Comments are closed, but trackbacks and pingbacks are open.