2009 азы Республикæ Хуссар Ирыстоны Мидхъуыддæгты министрад Уæрæсейы Федерацийы Мидхъуыддæгты министрадимæ сарæзта бадзырд, кæцымæ гæсгæ, нæ бæстæйы скъолаты рауагъдонтæ Уæрæсемæ æрвыст цæуынц милицийы хаххыл уæлдæр ахуыргæнæндæттæм. Уæдæй нырмæ æрвылаз дæр Уæрæсейы æндæр æмæ æндæр горæттæм ацæуынц ахуыр кæнынмæ цалдæргай рауагъдоны.
Ацы аз кæй фæндыд ацæуын милицийы хаххыл ахуыр кæнынмæ, уыдон уыдысты 35 рауагъдоны. Уыдон радтой фæлварæнтæ уырыссаг æвзагæй, историйæ, математикæйæ, æхсæнадзонынадæй, рацыдысты медицинон æмæ психологон басгæрст æмæ радтой физикон цæттæдзинадæй нормативтæ. Конкурсон æвзæрстыты фæстиуæгæн ма дзы баззадис 22 адæймаджы æмæ ныридæгæн уыдон хаст æрцыдысты Мидхъуыддæгты министрады кусджыты номхыгъдмæ. Ацы аз сын бынæттæ рахицæн æрцыдис Нижегороды академийы, Волгограды академийы, Воронежы институты, В.В.Лукьяновы номыл Орловы юридикон институты æмæ Ростовы юридикон институты ахæм дæсныйæдтæм, куыд «Правовое обеспечение национальной безопасности», «Компьютерная безопасность», «Специальные радиотехнические системы», «Информационная безопасность телекоммуникационных систем» æмæ «Эко-номическая безопасность».
«Цæмæй конкурсон æвзæрстытæ объективон уыдаиккой æмæ сæ фæстиуджытыл мачи дызæрдыг кодтаид, уый фæдыл арæзт æрцыдис исæн къамис, кæцыйы сконды уыдысты Хуссар Ирыстоны Паддзахадон университеты ахуыргæнджытæ. Уæлдæр ахуыргæнæндонмæ райсгæ кандидаттæ рацыдысты специалон басгæрст Мидхъуыддæгты министрады æмæ Паддзахадон æдасдзинады комитеты. Ныр та сæ Мидхъуыддæгты министрады Профессионалон цæттæдзинады центры цайдагъ кæнынц æфсæддон рæнхъон цыдыл, цæмæй сын сæ дарддæры ахуыры æнцондæр уа», – банысан кодта Мидхъуыддæгты министрады кадрты управленийы кусæг Джиоты Созыр.
Мидхъуыддæгты профессионалон центры ахуыргæнджытæ курсанттæн амонынц рæнхъон цыд, æфсæддон салам дæттын, æфсæддон дисциплинæ, пистолет æмæ Калашниковы автоматимæ архайын æмæ æххæст кæнынц сæ къухдариуæггæнджыты хæслæвæрдтæ, цæмæй сæ уæлдæр ахуыргæнæндæттæм бацæуой цæттæйæ. Ацы амындтытæ йæ зæрдæмæ тынг фæцыдысты милицийы фидæны кусæг Æлборты Ланæйæн. «Æз раздæр никуы ахуыр кодтон рæнхъон цыд æмæ мæм ныр алы къахдзæф, алы хæслæвæрд дæр æвзæрын кæны цымыдисдзинад. Куыд æнхъæлдтон, афтæ зын нæу», – зæгъы уый.
Курсант Хъæцмæзты Хетæгæн ацы амындтытæ æнæзонгæ не сты, уымæн æмæ каст фæцис Хъахъхъæнынады министрады кадетон скъола, æмæ ма хайад иста æфсæддон парады дæр. Афтæ ин-нæтæ дæр тынг зæрдæргъæвдæй кусынц сæхиуыл æмæ архайынц, цæмæй райсой æмбæлон зонындзинæдтæ.
Сæ ахуыры рæстæджы сæ паддзахад ифтонг кæндзæнис алцæ-мæй дæр. Ахуыр фæуыны фæстæ сын лæвæрд æрцæудзæнис “Милицийы лейтенант-ы” специалон ном æмæ фæстæмæ æрæздæхдзысты Хуссар Ирыстонмæ, цæмæй сæ службæ адарддæр кæной барадхъахъхъæнæг органты.
ДЖИОТЫ Александр
Comments are closed, but trackbacks and pingbacks are open.