Нæ республикæйы арæхæй-арæхдæр уагъд цæуынц алыгъуызон нысаниуæджы хъæлдзæг мадзæлттæ. Уыдонæй алкæмæн дæр вæййы йæхи сæрмагонд нысан, фæлæ се ‘ппæты дæр иу кæны не ‘хсæнады царды уавæртæ фæхуыздæр кæнын, афтæ ма нæ бæстæ æмæ национ культурæимæ дунейы æхсæнады зонгæ кæнын.
Иу ахæм нысаниуæджы мадзал æввахс рæстæджы уагъд æрцæудзæн нæ республикæйы фенддагдæр бынæттæй сæ иу – Эрцъойы цады былыл. Мадзалы сæйраг организатор Хъуылымбегты Лейлæ нын куыд радзырдта, афтæмæй уымæн йæ сæйраг бæллицтæй иу у, æппæт Уæрæсейы барды зарæггæнджытæ æмæ уымæн табугæнджыты Ирыстонмæ æрхонын æмæ ам авторон зарæджы æрвылазон фестиваль ауадзын.
«Рагæй мæм ис мæ чысыл Ирыстоны æфхæрд адæмæн исты хæрзиуæджы бацæуыны фæнд. Хъысмæты фæндонмæ гæсгæ, кæд мæ царды фылдæр хай мæ райгуырæн бæстæйæн æддейæ арвыстон, уæддæр мæ адæмыл, мæ бæстæйыл мæ зæрдæ никуы сивтон, Ирыстоны æрдз, сатæг уæлдæф æмæ йæ адæмы уазæгуарзондзинады æнгæсыл никуы амбæлдтæн. Мæ хъысмæт мæ баиу кодта авторон зарæггæнджытимæ, аивады ацы фæдыздæхтæн аргъгæнджытимæ, æмæ мæ фæнды ацы уникалон аивадуарзджыты мæ райгуырæн бæстæмæ æрхонын», – загъта Лейлæ.
Барды зарæггæнджыты фестиваль у æрвылазон æмæ уагъд фæцæуы дунейы алы бæстæты. Лейлæ куыд загъта, афтæмæй фестиваль нæ республикæйы ауадзыны нысæнттæй иу у туризм райтынг кæнын.
«Кæй зæгъын æй хъæуы, цас фылдæр адæм цæуой æмæ зонгæ кæной нæ бæстæимæ, уыййас æнгомдæр кæндзысты дунейы æмæх-сæнадимæ алыварсон ахастытæ дæр. Æз дызæрдыг нæ кæнын, иу хатт Ирыстонмæ чи ‘рцæуа, чи базонгæ уа йæ адæмимæ, уый æнæ банкъаргæ нæ фæуыдзæн, Ирыстон кæй у сабырадуарзаг æмæ уымæ тырнæг бæстæ. Мæнмæ гæсгæ, ахæм фестивальтæ нæ республикæйы уадзын фæахъаз уыдзæн туризм æмæ æхсæнадæмон бастдзинæдтæ райтынг кæ-нынæн. Йæ рæстæджы францаг фыссæг Санчо Панса загъта, «зарæг кæм хъуысы, уым фыдбылызтæн нæй æрцæуæн», – зæгъгæ, уыцы хъуыдыимæ разы дæн æз дæр», – загъта уый.
Фестивалы сæйраг организатор ма куыд загъта, афтæмæй барды зарæджы фестиваль уагъд æрцæудзæн 15 æм августæй 19 августмæ. Фестивальмæ хуынд æрцыдысты постсоветон территорийы алы бæстæты зарæггæнджытæ, аивады ацы фæдыздæхтæн табугæнджытæ, æхсæнады минæвæрттæ. Фестивалы алы бонæн дæр арæзт æрцыд ма-дзæлттæ уадзыны сæрмагонд план. Уазджытæ æмæ фестивальмæ æрбацæуджытæ ифтонг æрцæудзысты хæлцæй, æхсæвбынæттæ æмæ боны дæргъы æппæт æнæмæнгхъæуæг уавæртæй. Фестивалы хайадисджытæн лæвæрд цæудзысты призтæ æмæ алыгъуызон лæвæрттæ, Ирыстоны æрдзы нывтимæ эмблемæтæ сæ уæлæ, афтæмæй.
Фестиваль уадзынæн финансон æххуыс бакодта нæ республикæйы Президент Бибылты Анатоли.
«Сæйраджыдæр мæ фæнды бузныг зæгъын нæ республикæйы Президент Бибылты Анатолийæн, финансон æххуыс нын кæй бакодта, уый тыххæй. Афтæ ма чидæриддæр йе ‘ххуысы къух фæдаргъ кодта æмæ фестиваль ауадзынæн баххуыс кодта, уыдонæн. Кæй зæгъын æй хъæуы, нырма нын ис аскъуыддзаггæнинаг фарстатæ, фæлæ мæн уырны, æппæт дæр кæй уыдзæн нывыл», – загъта Хъуылымбегты Лейлæ.
ХУЫГАТЫ Миленæ
Comments are closed, but trackbacks and pingbacks are open.