Æнхъæлмæ кæсын хъæуы хуыздæрмæ, æвзæрмæ та – цæттæ кæнын

Республикæ Хуссар Ирыстоны Президент Бибылты Анатоли бабæрæг кодта, Цхинвалы инфекцион рынчындон коронавирусон инфекцийы фæзынды рæстæджы пациенттæ райсынмæ куыд цæттæ у, уый.

Президентимæ ма уыдысты Æнæниздзинад хъахъхъæнын æмæ социалон рæзты министр Тотчиты Георги, республикæйы сæйраг санитарон дохтыр Коцты Маринæ æмæ Æнæниздзинад хъахъхъæныны æмæ социалон рæзты министрады сæйраг инфекцион дохтыр Джиоты Элеонорæ. Джиоты Элеонорæ радзырдта, абоны бон Инфекцион рынчындоны изоляцийы кæй ис æртæ пациенты.

«Иу пациент нæм æрбацыд, йæ рæуджытæ хъыгдард кæй сты, уый тыххæй. Уымæн хос кæнæм. Йæ уавæр фæхуыздæр ис. Коронавирусы тыххæй цы тест ауагътам, уый уыд æп-пæрццаг, куыд иннæ пациентты тестытæ, афтæ», – загъта уый.

Бибылты Анатоли бацымыдис кодта рынчындоны дох-тырты хи хъахъхъæнæн фæ-рæзты уавæрмæ. Уый банысан кодта, зæгъгæ, медицинон персонал хъуамæ ифтонг æрцæуа  æппæт æнæмæнгхъæуæг хи хъахъхъæнæн фæрæзтæй, цæмæй сын фадат уа сæ хæс-тæ  æдас уавæрты æххæст кæнæн.

«Æз тыхсын уыцы дохтыртыл, кæцытæ архайдзысты рынчынтимæ. Рынчынтыл, кæй зæгъын æй хъæуы, хъуамæ тыхсæм, уый нæ сæйраг нысан у, фæлæ, Хуыцау бахизæд æмæ дохтыртæ фæрынчын уой, чи сын хос кæндзæн? Фыццаджы уал хъуамæ æдасы уой медицинон кусджытæ сæхæдæг», – загъта Президент.

Æнæниздзинад хъахъхъæнын æмæ социалон рæзты министр банысан кодта, зæгъгæ сæм ис хи хъахъхъæнæн халатты фæсауæрц.

«Куыст цæуы уыцы фæсауæрц фæфылдæр кæныны фарстыл. Уымæй уæлдай ма, абон мах æнхъæлмæ кæсæм хи хъахъхъæнынæн химикон уæлæдарæс райсынмæ. Уыдонæй мах пайда кæндзыстæм уæлвæткон уавæрты», – загъта Тотчиты Георги.

Паддзахады сæргълæууæгæн фенын кодтой инфекцион бокстæ (сты 18), афтæ ма интенсивон терапийы палатæтæ рæуджыты  вентиляцийы аппараттимæ. Уымæй уæлдай ма сæм ис карантины тыххæй хатæнтæ.

Иумæйагæй инфекцион рынчындоны план цыд, цæмæй дзы уа  рæуджыты   вентиляцийы дæс аппараты, фæлæ Бибылты Анатоли æрдомдта, цæмæй максималон æгъдауæй бацæттæ кæной, республикæйы рæуджыты вентиляцийы тыххæй цыдæриддæр аппараттæ ис, уыдон.

«Ардæм сæ рахæссут, сæвæрут сæ æмæ кæд уавæр фæкарздæр уа, уæд мах нал бахъæудзæн уыдон рахæсс-бахæсс кæнын, мах зондзыстæм, уыдон цæттæ кæй сты, уый. Афтæ ацы фарст хауы хостæ, дезинфекци æмæ хи хъахъхъæныны фæрæзтæм дæр. Ома, мах хъуамæ фидарæй зонæм, цыфæнды рæстæджы дæр нæ бон кæй суыдзæн оперативонæй пациентты егъау нымæц райсын. Æз дзурын ахæм цæттæдзинады тыххæй, цæмæй мацыуал хъæуа рахæсс-бахæсс кæнын», – загъта Президент.

Уынаффæ ма цыд республикон медицинон центры сæйраг корпусæй спайда кæныны фадæттыл дæр. 

Паддзахады сæргълæууæг йæ инспекцийы фæстиуджытыл дзургæйæ, банысан кодта, зæгъгæ, хъæуы хорзмæ æнхъæлмæ кæсын, фæлæ æвзæрмæ та – цæттæ кæнын.