СПИД-ы ныхмæ тохы бон бирæ бæстæты у æрвылазон. Уæвгæ ацы инфекци сбæрæг ис 1981-æм азы Америкæйы æмæ уæдæй нырмæ ахуыргæндтæ нæма ссардтой йæ ныхмæ хос. Инфекцион эпидеми ахаста бирæ адæмы цард æмæ алы фыццæгæм декабры дæр медицинон æмæ æхсæнадон иугондтæ сæ тыхтæ баиу кæнынц йæ ныхмæ тохы.
Фæсивæд куыдфæндыйы цæстæй кæсынц ацы низмæ, нæма йæ зонынц æмæ сæм афтæ кæсы, нæ сæм æрбахæццæ уыдзæн. Уый тыххæй фылдæр хъæуы семæ кусын. Дохтыртæ кæсынц лекцитæ скъолаты, институтты, цæмæй адæм зоной, куыд хизы ацы низ адæймагæй адæймагмæ, цæмæй сæхи хъахъхъæной.
Инфекци раиртасынæн анализтæ раттын хъæуы СПИД æмæ æндæр низты ныхмæ тохы æмæ профилактикæйы республикон центры. Йæ дохтыртæ кусынц, куыд профилактикон мадзæлттæ уадзыныл, афтæ низ йæ райдайæны, ома, фыццаг, дыккаг æмæ æртыккаг къæпхæны дзæбæх кæныныл дæр. Инфекцион низы цыппæрæм æмæ фæндзæм къæпхæныл та рынчынтимæ кусынц тагъд æххуысы клиникон рынчындоны инфекцион низты кафедрæйы дохтыртæ.
Уыцы рынчынтæ æнæпълан цард куы фæкæнынц, уæд ахæм рынчынты нымæц фылдæр кæны. Стыр куыст кæнын хъæуы æхсæнады, уæлдайдæр та – фæсивæды ‘хсæн. Цæмæй нæ фидæн дзæбæх уа, уый тыххæй хъæуы кæнын профилактикон мадзæлттæ æмæ лæмбынæгæй ацы фарстамæ бацæуын æмæ æркæсын.
Иннæ бæстæты бирæ вæййы ахæм акцитæ, æмæ нæ фæнды, цæмæй махмæ дæр уагъд цæуой ахæм акцитæ, цæмæй адæм зоной ацы низы тыххæй фылдæр æмæ сæхи хъахъхъæной.
Ныр медицинæ тынг бæрзонд къæпхæнтæм схызти æмæ нæ уырны, кæй æрхъуыды кæндзысты ног хостæ дæр.
СПИД тынг карз низ у. Куыд æй зонæм, афтæмæй ахæм хостæ дæр нæма ис, кæронмæ йæ чи дзæбæх кæны. Æмæ, Иры фæсивæд, курæм уæ, уæхи хъахъхъæнут, æрыгонæй уæ цард ма халут. Æнæниздзинадæй зынаргъдæр ницы ис.
ДРИАТЫ Лейла
Comments are closed, but trackbacks and pingbacks are open.