Ӕрраниз у хæцгæ низтæн сæ тæссагдæртæй иу, уымæн æмæ адæймагæн халы йæ нуæртты системæ æнæхъæнæй дæр. Ӕрранизы  вирусхæссæг сты хъæддаг сырдтæ (рувас, бирæгъ, енотгъуыз куыдз), стæй хæдзарон цæрæгойтæ дæр, уыимæ дзæгъæл куыйтæ æмæ гæдытæ дæр. Нæ дзы рынчын кæнынц æрмæстдæр, уазалтуг кæй хонынц, ахæм цæрæгойтæ (калм, гæккуыри, хæфс)  æмæ уырынгонтæ.  Гæнæн ис æмæ  адæймагыл низ бахæца æндæр цæрæгойтæй дæр, зæгъæм, низæфтауæг  разынынц хъуццытæ, фыстæ, сæгътæ, хуытæ, бæхтæ, уырытæ, уызынтæ, тæхаг мыстытæ. Рынчын цæрæгой адæймагыл фæхæцыд, зæгъгæ, æрмæст уый тæссаг нæу, тæссаг ма у, цæст кæй нæ уыны, гыццылдæр цъæррæмыхст буарыл куы уа, æмæ ууылты рынчын цæрæгойы сæт  организммæ куы бахæццæ уа, уæд уый дæр.

Хæдзарон фосыл низ бафты, æрранизæй рынчын хъæддаг сырд кæнæ уыры куы фæхæцы кæнæ сæм сæ сæт куы бахауы, уæд афтæмæй.  Ӕрранизæй   рынчын куыйтæ хæринагæй сæхи иуварс ласынц æмæ æрхæндæг кæнын райдайынц, тæрсынц донæй, рухсæй, фæстæдæр сæзнæт вæййынц  æмæ уæд, сæ фæндагыл цыдæриддæр æмæ чидæриддæр разына, ууыл фæхæцдзысты. Уæлдай тæссаг у, рынчын цæрæгой куы фæхæца адæймгæн йæ цæсгомыл  кæнæ  хъуырыл,  къаддæр тæссаг та – къах кæнæ къухыл  куы фæхæца, уæд. Рынчын сырд цалдæр хатты куы фæхæца, уæд та æрраниз бафтынæй у бирæ тæссагдæр.

 Адæймагыл æрраниз куы бахæцы, уæд бахауы æнтъыснæг æнкъарæнты уацары, свæййы æгъуыссæг, хæрын æм нал фæцæуы, улæфт ын нал фæфаг кæны,  цæрæгой цы бынаты фæхæцы, уый къуырма рыст кæнын райдайы. Уый фæстæ адæймаг сызнæт вæййы, буар æлхынцъытæ кæнын райдайы, дон нынныхъуырын йæ бон нал вæййы, уый нæ, фæлæ донæн йæ уындæй дæр тæрсын райдайы, тæрсы суанг рог дымгæйы уддзæфæй дæр. Уый фæстæ йæ æндзыгниз иу иннæйы фæстæ цæвын райдайы,  зæрдæ æмæ дадзинты систæмæйы, стæй улæфæнты, æндзыгнизы аххосæй адæймаг амæлы, йæ фæрынчынæй 3-8 боны куы рацæуы, уæд.

Адæймагыл хъæддаг кæнæ хæдзарон цæрæгой фæхæцыд кæнæ йæм йæ сæт бахæццæ, уæд цы бакæнын хъæуы? Фыццаджыдæр цæрæгой кæм фæхæцыд, уыцы ран хъæуы дон æмæ сапонæй дзæбæх æрыхсын, æхсын æй хъæуы иу 10 минуты дæргъы. Дыккаджы, хъæдгомæн йæ алыварс айсæрдын хъæуы карз спиртæй, стæй йæ бабæттын.  Уый фæстæ хъæуы тагъд ацæуын дохтыртæм  судзин аразынмæ æрранизы ныхмæ. Ӕрранизы ныхмæ вакцинæ у лæвар.  Прививкæтæ аразын хъæуы бæлвырд фæткмæ гæсгæ, се  ̀хсæн цы рæстæг хъуамæ уа, уымæн аиргъæвæн нæй.  Рынчын йæ низæй цæмæй фервæза, уый бирæ аразгæ у, дохтыры æххуыс куыд тагъд бацагуырдта, уымæй.

Цæрæгой кæуыл фæхæцыд, уыдон æнæмæнг хъуамæ рæстæгыл саразой  æрранизы ныхмæ прививкæ.  

Хъуыддаг афтæ у, æмæ æрранизæй адæймаджы бахъахъхъæндзæн æрмæстдæр прививкæ. Ӕмæ ма уæ зæрдыл бадарут – дохтыры æххуыс цас тагъддæр бацагурат, уый бæрц профилактикон æгъдауай прививкæ уыдзæн æнтыстджындæр.  Йæ саразын ын иу бонæй иннæмæ куы аргъæват, уæд та уæ цардæн уыдзæн тæссагæй тæссагдæр.

Comments are closed, but trackbacks and pingbacks are open.