Уæрæсейы Федерацийы Мидхъуыддæгты органты уæлдæр ахуыргæнæндæттæм ацæуын кæй фæнды, уыцы абитуриенттæ райдыдтой фæлварæнтæ дæттын. Экзаментæ сын исынц ХИПУ-йы физикон хъомылады кафедрæйы ахуыргæнджытæ æмæ уал фыццаг райдыдтой физикон цæттæдзинадæй, ома нормативтæй. Уымæн æмæ Мидхъуыддæгты министрад тыхон структурæ у æмæ йæ курсанттæ хъуамæ физикон æгъдауæй цæттæ уой, цæмæй фидæны сæ бон уа сæ службæйон хæстæ æххæст кæнын.
Нормативтæ дæттой Цхуырбаты Гурамы номыл республикон стадионы.Фæлварæнты рæстæджы ма сæм сæ хъус дардтой исæн къамисы уæнгтæ æмæ милицийы медицинон хайы кусджытæ. Уымæй уæлдай ма ардæм æрбацыдысты абитуриентты ныййарджытæ, хиуæттæ æмæ æмбæлттæ.
Абитуриентты ралæууын кодтой рæнхъæй æмæ сын Мидхъуыддæгты рæнхъон скондимæ кусыны фæдыл управленийы хистæр Джиоты Созыр бамбарын кодта, Уæрæсейы уæлдæр ахуыргæнæндонмæ ацæуынæн кæй хъæуы æмбæлон домæнтæ сæххæст кæнын.
«Сæйраджыдæр, курсант хъуамæ уа æнæниз, стæй та йын кæсдзыстæм йæ физикон цæттæдзинадмæ æмæ фæлварæнты нысæнттæм».
Чызджыты æмæ лæппуты адих кодтой, уымæн æмæ сæ домæнтæ хицæн кæнынц. Лæппутæн сæ норматив уыд, иууыл къаддæр, 12 хатты хи сисын турникыл æмæ 3 километр дæрддзæг та 13 минут æмæ 20 секундмæ алидзын. Чызджытæн та зачетон фæстиуæгыл нымад цыдис 100 метры дæрддзæг 18 секундмæ алидзын æмæ иу километр та 4 минут æмæ 35 секундмæ алидзын.
Иууыл-иумæ сæ гæххæттытæ бадæттой 55 абитуриенты, фæлæ дзы 18 адæймаджы нæ рацыдысты тесттæ, медицинон æмæ психодиагностикон басгæрстытæ. Физикон цæттæдзинады нормативтæм дзы уагъд æрцыдсты 36 адæймаджы. Нормативтæ иттæг хорз чи ратта, уыдон та дарддæр ахиздзысты фæлварæнтæм – уырыссаг æвзагæй, историйæ æмæ æхсæнадзонынадæй.
Фæлварæнты рæстæджы рабæрæг уыдзысты хуыздæр абитуриенттæ æмæ æрвыст æрцæудзысты Уæрæсемæ, Мидхъуыддæгты министрады хаххыл уалдæр ахуыргæнæндонмæ. Ахуыры рæстæджы курсанттæ алцæмæй дæр ифтонг цæудзысты хицауады хардзæй. Диплом райсыны фæстæ æрæздæхдзысты Хуссар Ирыстонмæ æмæ адарддæр кæндзысты сæ службæ барадхъахъхъæнæг органты.
ДЖИОТЫ Алыксандр
Comments are closed, but trackbacks and pingbacks are open.