Кæронмæ бахæццæ сты Мидхъуыддæгты министрады хаххыл Уæрæсейы Федерацимæ курсанттæ ахуырмæ арвитыны тыххæй бацæуæн фæлварæнтæ. Кандидаттæ фæстаг фæлварæн радтой физикон цæттæдзинадæй республикон стадионы территорийыл æмæ сæ истой ХИПУ-ы физикон хъомылады кафедрæйы ахуыргæнджытæ. Фæлварæнтæм ма сæ хъус дардтой Мидхъуыддæгты исæн къамисы уæнгтæ йæ сæрдар рæнхъон скондимæ куысты фæдыл министры хæдивæг Джабиты Æхсар æмæ ма ардæм ноджы фæуазæг Мидхъуыддæгты министр Наниты Игорь дæр.
Иууыл иумæ кандидаттæ уыдысты 27 бæрц, фæлæ дзы 15 адæймаг йеддæмæ нæ ацæудзæнис ахуырмæ, уымæн æмæ Уæрæсейы уæлдæр ахуыргæнæндæтты æндæр нæ рахицæн кодтой бынæттæ ацы аз. Фыццаджы уал лæппуты бахъуыд турникыл иууыл къаддæр фæйнæ 12 хатты хи сисын, стæй та 3 километры дæрддзæг алидзын 13 минут æмæ 20 секундмæ. Чызджытæн сæ нормативтæ чысыл лæмæгъдæр уыдысты. Хуыздæр чи радта фæлварæнтæ, уыдоны номхыгъд фæстæдæр бæрæг уыдзæн.
Ахуырмæ чи цæуы, уыцы кандидаттæ развæлгъау рацыдысты специалон басгæрст Мидхъуыддæгты министрады æмæ Падзахадон æдасдзинады комитеты хаххыл, уыдысты медицинон къамисы æмæ ма сæ басгæрста психолог дæр. Уый фæстæ фæлварæнтæ радтой уырыссаг æвзагæй, историйæ æмæ æхсæнадзонынæй (обществознание). Фæлварæнты иууылдæр райстой ХИПУ-йы ахуыргæнджытæ æмæ ма сæм йæ хъус дардта Мидхъуыддæгты исæн къамис дæр, кæцы арæзт æрцыд сæрмагондæй ацы абитуриентты тыххæй.
Дарддæр та паддзахад йæхимæ исы уыцы хæстæ, цæмæй курсанттæ сæ ацæуынæй фæстæмæ ифтонг уой алцæмæй дæр. Ахуыр фæуыны фæстæ та æрæздæхдзысты сæ райгуырæн бæстæмæ æмæ службæ хæсдзысты Мидхъуыддæгты министрады рæн-хъыты.
ДЖИОТЫ Александр
Comments are closed, but trackbacks and pingbacks are open.