Нæ республикæйы бюджетон фадыджы кусджытæн фæфылдæр уыдзысты сæ куыстмыздтæ, схиздзысты Цæгат Кавказы Федералон зылды уыцы категорийы кусджыты мыздты æмвæзадмæ.
25-æм майы Мæскуыйы Республикæ Хуссар Ирыстоны Хицауады Сæрдар Бекъойты Геннади æмæ Уæрæсейы фæллойы министр Антон Котяков сæ къухтæ æрфыстой, РХИ-йы паддзахадон æмæ муниципалон уагдæтты кусджытæн сæ куыстмызд фæфылдæр кæныны фæтк æмæ æмфинанскæнынады уавæрты тыххæй Республикæ Хуссар Ирыстон æмæ Уæрæсейы Федерацийы ‘хсæн Сразыдзинадмæ æмæ Сразы-дзинады Суагъæмæ ивындзинæдтæ бахæссыны тыххæй Суагъæйыл.
Бекъойты Геннади куыд банысан кодта, афтæмæй документы руаджы, кæцымæ гæсгæ ивындзинæдтæ хаст æрцыдысты 2016 азы Республикæ Хуссар Ирыстон æмæ Уæрæсейы Федерацийы ‘хсæн арæзтæрцæуæг Сразыдзинадмæ æмæ 2019 азы Суагъæмæ, фæфылдæр уыдзысты бюджетон фадыджы кусджыты куыстмыздтæ.
Цы ивындзинæдтæ бахастæуыдзæн, уыдонмæ гæсгæ Республикæ Хуссар Ирыстоны паддзахадон æмæ муниципалон уагдæтты кусджыты куыстмыздтæ схиздзысты Цæгат Кавказы Федералон зылды уыцы категорийы кусджыты мыздты æмвæзадмæ.
«Кæд раздæр нæ бюджетон кусджыты куыстмыздтæ уыдысты 2017 азы куыстмыздты æмвæзады онг, уæд ныр та, ног Суагъæйыл къухтæ æрфыссыны фæстæ, Хуссар Ирыстоны æмæ Цæгат Кавказы Федералон зылды бюджетон фадыджы кусджытæ исдзысты æмхуызон мыздтæ. Уый та фæбæрзонддæр кæндзæн Хуссар Ирыстоны уыцы категорийы кусджыты царды æмвæзад», – банысан кодта Бекъойты Геннади.
РХИ-йы Хицауады Сæрдар бузныг загъта УФ Фæллойы министр Антон Котяковæн, уыимæ иумæ Уæрæсейы Федерацийы къухдариуæгадæн Хуссар Ирыстоны æмбæстæгты фарсмæ балæууыны æмæ сын æххуысы тыххæй.
Йæ рады Уæрæсейы Федерацийы Фæллойы министр банысан кодта, цы документыл æрфыстой къухтæ, уый ахсджиагдзинад, афтæ ма Сразыдзинады ахсджиагдзинад дæр, кæцы хауы паддзахадон службæйы органты кусджыты финансон ифтонгадмæ, кæцыйыл къухтæ æрфысдзысты тагъд рæстæджы.
Фембæлды рæстæджы Бекъойты Геннади æмæ Антон Костяков ма æруынаффæ кодтой æмархайды фарстатыл дæр, кæцытæ здæхт сты Хуссар Ирыстоны социалон-экономикон рæзтмæ.
Comments are closed, but trackbacks and pingbacks are open.