Куыд ма хъусын кодтам, афтæмæй майы мæйы фæуды нæ республикæмæ кусæгон балцы æрцыдысты Республикæ Цæгат Ирыстон-Аланийы информацион фæрæзты сæргълæуджытæ æмæ журналистты къорд Мыхуыр æмæ массон коммуникациты хъуыддæгты фæдыл комитеты сæргълæудæй, кæцыйæн ныртæккæ разамынад кæны Фидараты Юри.
Цæгатирыстойнаг журналисттæ уыцы иу боны мидæг азылдысты æмæ бабæрæг кодтой, ахсджиагдæр æмæ цымыдисондæр бынæттæ æмæ объекттыл. Цæгатирыстойнаг æмæ хуссарирыстойнаг журналисттæн уыцы бон тымбыл фынджы фарсмæ хъарм, хæларадон æмæ кæрæдзиæмбаргæ уавæрты ацыдис сæ ныхас дæр. Уыдон æввахсдæр базонгæ сты дыууæ республикæйы информацион фæрæзты проблемæтæ æмæ æнтыстытимæ. Ныхас дзы цыд æмгуыстады фарстатæ æмæ сæм дарддæр уый фæдыл цы фæндтæ æмæ плæнттæ ис, уыдоны тыххæй. Зæгъæм, æмгуыстады фæдыл дзургæйæ, газет «Рæстдзинад»-ы сæйраг редактор Битарты Маринæ банысан кодта, кæй баныхас кæндзысты дыууæ Ирыстоны дыууæ сæйраг ирон газетты фæрстыл кæрæдзийæ фылдæр хабæрттæ исын æмæ сæ мыхуыр кæныны тыххæй. Уымæй дарддæр ма фæндон бахаста, цæмæй сног кæной «Рæстдзинад» æмæ «Хурзæрин»-ы традицион фембæлдтытæ, кæцытæ бæрæг аххосæгтæм гæсгæ æрцыдысты хæлд. Ахæм æнгæс хъуыддæгтæ æмæ проблемæты фæдыл ныхас кодтой цæгатирыстойнаг информацион фæрæзты æндæр сæргълæуджытæ æмæ сæ хуссайраг коллегæты ʻрдыгæй ссардтой фарстытæ куыд хуыздæр аскъуыддзаг кæныны фæдыл æмбарындзинад. Уыцы фарстытæ иумæйагæй лыг кæндзысты æмгуыстады фæлгæтты.
Ныр та Цæгат Ирыстон-Аланимæ ахæм æнгæс кусæгон балцы знон афæндараст сты хуссарирыстойнаг журналисттæ. Сæ балцы тыххæй 5-æм июлы информагентад «Спутник»-ы пресс-центры æрвылкъуырион брифинджы рæстæджы Республикæ Хуссар Ирыстоны Информаци æмæ мыхуыры комитеты сæргълæууæг Хъотайты Мария радзырдта цыбыртæй. Уый банысан кодта, сæ цæгаттаг коллегæтимæ æмгуыстады фæлгæтты ныр та хуссарирыстойнаг журналисттæ хуынд кæй æрцыдысты Цæгат Ирыстонмæ, уый тыххæй. «Мах 6-æм июлы журналистты къордимæ дзуаппон пресс-туры цæуæм Цæгат Ирыстонмæ. Уырдæм афæндараст уыдзысты æртын журналисты бæрц. Нæ программæ у иубонон æмæ дзы информацион æмгуыстады фæдыл ис бирæ ахсджиаг фарстытæ. Пресс-туры рæстæджы планмæ гæсгæ арæзт цæудзысты актуалон проблемæтимæ баст тымбыл фынгтæ, афтæ нæ къухтæ æрфысдзыстæм къорд бадзырдыл дыууæ республикæйы информацион ведомствоты æхсæн. Тымбыл фынджы рæстæджы уынаффæ цæудзæнис дыууæ информацион ведомствойы ʻхсæн æмархайды перспективæтыл. Йæ фæстиуæг та хъуамæ уа мæ коллегæ Фидараты Юриимæ нæ фембæлд бадзырдыл нæ къухтæ æрфыссыны тыххæй», – банысан кодта Хъотайты Мария.
Уый ма куыд радзырдта, афтæмæй пресс-туры хайадисджытæ хъуамæ æруынаффæ кæной сæрмагонд уацхæсджыты фарстыл дæр. Мария куыд загъта, уымæ гæсгæ ныридæгæн Цæгат Ирыстоны газет «Хурзæрин»-æн ис йæхи сæрмагонд уацхæссæг, фæлæ ма хъæуы саразын афтæ дæр, цæмæй ахæм уацхæсджытæн сæ куыст фæактивондæр уа дыууæ фарсæрдыгæй дæр.
«Пресс-туры боны фæткмæ ма бахаст æрцыдис æндæр ахсджиаг фарст дæр. Уый та у республикæйæн æдтейæ хуссар-ирыстойнаг дзыллон информацийы фæрæзтæ популяризаци кæнын, сæрмагондæй та уынаффæ кæндзыстæм нæ газетты «Роспечать»-ы каталогмæ бахæссыны тыххæй», – загъта Хъотайты чызг.
Цхуырбаты Лариса
Comments are closed, but trackbacks and pingbacks are open.