Знон нæ республикæмæ кусæгон балцы æрцыдысты цæгатирыстойнаг информацион фæрæзты сæргълæуджытæ æмæ журналистты егъау къорд Цæгат Ирыстон-Аланийы Мыхуыр æмæ массон коммуникациты хъуыддæгты фæдыл комитеты сæргълæудæй.
Хуссар Ирыстоны иууыл фенддагдæр бынæттимæ зонгæ кæныны нысанæн цæгатирыстойнаг коллегæтæ уыдысты, Инвестицион фæрæзты фæлгæтты цы дзидзагуыстгæнæн завод «Растдон» арæзт æрцыд, уый уазджытæ. Уыцы куыстуатæн разамынад кæны уæрæсейаг егъау агрохолдинг «Евродон»-ы Генералон директор, не ‘мзæххон Уанеты Вадим.
Продукци уадзыны фæдыл Генералон директоры хæдивæг Томайты Вадим информацион фæрæзты минæвæртты базонгæ кодта дзидзагуыстгæнæн заводы куыст æмæ архайдимæ, йæ аразыны фæдыл финансон хæрдзтæ æмæ æндæртимæ. Йæ ныхæстæм гæсгæ, ныртæккæ завод уадзы 40 хуызы бæрц алыгъуызон дзидзайы хæрзгъæд продукци. Продукцийы иу хай у гогыз æмæ бабызы дзидза. Уый республикæмæ ласт цæуы Ростовы областæй агрохолдинг «Евродон»-æй. Стурвосы дзидза та ныртæккæ завод амал кæны бынаты. Ацы завод куысты бынæттæй сифтонг кодта 40 адæймагæй фылдæры. Куыд зонæм, афтæмæй ацы заводы хæрзгъæд продукци самалгæнæн ис, йæ разы цы дукани конд æрцыд, уым. Уый фæстæ ма йын цæрджыты æнцонвадатæн филиал конд æрцыд горæты бæстыастæу дæр. Уымæй дарддæр завод йæ продукцийæ ифтонг кæны горæт æмæ районты дуканиты. Зæгъын хъæуы уый, æмæ завод кæй кусы æппæт нырыккон кондады технологитæ хынцгæйæ.
Цæгатирыстойнаг информацион фæрæзты минæвæрттæн уыд, ацы кондады рауадзгæ продукцийæ ацаходыны фадат, æмæ дзы адджынæн хæргæ дæр кодтой.
Балц Монастъеры кувæндонмæ
Цæгатирыстойнаг информацион фæрæзты минæвæрттæ стыр цымыдисимæ хъуыстой Карсанты Гураммæ ацы кувæндоны раз. Уый сын радзырдта ацы рагон кувæндоны истори, куыд арæзт цыд, цы таурæгътæ йыл ис конд. Нæ коллегæтæ кувæндоны раг историмæ æрмæст цымыдис нæ кодтой, фæлæ ацы алæмæтон бынаты истой зæрдылдарæн къамтæ дæр.
Цæгат Ирыстоны Мыхуыр æмæ дзыллæйон коммуникациты хъуыддæгты фæдыл комитеты сæрдар Фидараты Юри нын куыд радзырдта, уымæ гæсгæ рагæй фæнд кодтой æмæ сын планмæ хаст уыд Хуссар Ирыстонмæ æрцæуын.
Балцы нысаныл дзургæйæ Комитеты сæрдар банысан кодта, зæгъгæ, ахсджиаг у, цæмæй нæ хуссарирыстойнаг коллегæтимæ арæхдæр æмбæлæм, иумæ кусæм нæ иумиаг Ирыстоны пайдайæн, йæ хæрзæбонæн.
«Абон мах, сæйраджыдæр, нæ коллегæтимæ бауынаффæ кæндзыстæм, дарддæр цы мадзæлттæ хъæудзæн райсын, цæмæй информацион фадыджы иу тыгъдады уæм, уый тыххæй. Уымæн æмæ Ирыстонæн дихгæнæн нæй, нæдæр дунеон картæйыл, нæдæр политикон æгъдауæй. Формалон æгъдауæй кæд дих стæм, уæддæр зæрдæйæ иу стæм æмæ нæ информацион фæлгæттæ дæр иу хъуамæ уой», – дзырдта Юри.
Ныфс бавæрдта, Хуссар Ирыстоны информацион комитетимæ æнгом куыстæй, цæмæй журналисттæ дæр æнгом æмæ кæрæдзи æмбаргæйæ кусой. Ирыстоны хуссар æмæ цæгаты æхсæн ацы балц фæстаг нæ уыдзæн.
Къæбулты Маринæ
Comments are closed, but trackbacks and pingbacks are open.